ယနေ့ပွဲနေ့ရှင်သည် ယေဇူးသခင် လောက၌ သက်ရှိထင်ရှားရှိပြီး၊ ဒေသစာရီ လှည့်လည်သွားလာစဉ်က တပည့်တော်ကြီး (၁၂) ပါးတွင် မဟုတ်ခဲ့ပေ။ သို့သော် တပည့်တော်ကြီး (၇၂) ပါး စာရင်းဝင် ဖြစ်ခဲ့ပါသည်။ (သံလုကာ ၁၀း ၁) အဘယ်ကြောင့်ဆိုသော် တပည့်တော်ကြီးတို့သည် ယေဇူးသခင်အား ရောင်းစားသော အပြစ်ကြောင့် မိမိကိုယ်ကို ခွင့်မလွှတ်နိုင်ဖြစ်ကာ အဆုံးစီရင်သွားခဲ့သော ယုဒအီစကာရီရုဒ်အစား (တမန်တော် ၁း၁၅-၁၈) တပည့်တော်တစ်ပါးကို ရွေးချယ်ရန် စီစဉ်ခဲ့သည်။ ထိုသို့ ရွေးချယ်ရာတွင် သတ်မှတ်ချက်အဖြစ် “ယေဇူးသခင် ရှိတော်မူစဉ်ကပင် ငါတို့နှင့် လိုက်ပါလာခဲ့သူဖြစ်ပြီး၊ ယောဟန်ဆေးကြောခြင်း ပေးသည့်အချိန်မှစ၍ ကိုယ်တော် ကောင်းကင်သို့ ပင့်ဆောင်ခံရသည့် နေ့တိုင်အောင် ရှိခဲ့သူ တစ်ဦးသည် ကိုယ်တော်၏ ရှင်ပြန်ထမြောက်ခြင်း အကြောင်းကို ငါတို့နှင့်အတူ သက်သေခံသူ ဖြစ်ရမည်” ဟုဆိုထားပါသည်။ ဤအချက်သည် တပည့်တော်ကြီး ဖြစ်ခွင့်ရှိသည့် လိုအပ်ချက် တစ်ချက်အဖြစ် တမန်တော်ကြီးများ သတ်မှတ်ကြသည်။ (တမန်တော် ၁း၂၁-၂၂) ၄င်းအပြင် တပည့်တော်ကြီးတို့၏ အရေအတွက်ကို ယေဇူးသခင် သက်ရှိထင်ရှား ရှိစဉ်ကလည်း (၁၂) ပါးဟု သုံးနှုန်းလျှင် ယုဒအီကာရီရုဒ် ပါ၀င်ပြီး၊ ယေဇူးသခင် ကောင်းကင်ဘုံ ပြန်တက်ပြီးနောက်မှ တပည့်တော်ကြီး (၁၂) ပါးဟု သုံးနှုန်းပါက ယုဒအီစကာရီရုဒ်အစား မာသီးယာစ်ကို ထည့်သွင်းရေတွက်ခြင်း ဖြစ်သည်။ ယေဇူးသခင် လောက၌ရှိစဉ်က ရှိခဲ့သော တမန်တော်ကြီးတို့၏ အရေအတွက်ကို မလျော့နည်း စေလိုသောကြောင့် ပြန်လည်ရွေးချယ်ခဲ့သည်။ ဤသို့ရွေးချယ်ရာတွင် တမန်တော်ကြီးတို့က ဘာဆာဘာစ့် အမည်ရသော ဂျိုးဇက်နှင့် မာတီးယာစ်တို့ နှစ်ဦးအပေါ် လက်တင်ဆုတောင်းပေးပြီး၊ မဲဖြင့် ရွေးချယ်ခဲ့ကြသည်။ (တမန်တော် ၁း၂၃-၂၄)

#Fr.ကလေးမင်း(အားတယ်) (ဘာသာပြန်)