အသက်ရှင်မှုဘဝခရီးသည် စိတ်ပြဌါန်းချက် စွမ်းအားကိုစွဲကိုင်လျက် တိုက်ရမည့်စစ်ပွဲတခုဖြစ်၏။ စိတ်ပြဌါန်းချက်စွမ်းအားသည် ကြီးသည်ဖြစ်စေ၊ ငယ်သည်ဖြစ်စေ ဘုရားသခင်ထံမှ ခံစားရသောကျေးဇူးတော်သာလျှင်ဖြစ်၏။ သို့ဖြစ်၍၊ ၎င်းကိုနွမ်းလျကာ အသက်မဲ့သောအဖြစ်သို့ရောက်အောင် လှုပ်ရှားမှုမပေးဘဲ ပစ်ထားခြင်း၊ မသင့်မလျော်အသုံးချခြင်းမပြုရာ။ ဆိုးသွမ်းသူများသည် စိတ်ပြဌါန်းခြင်းကို မသင့်မလျော် အသုံးချခြင်းဖြင့် အပြစ်အမှားအယွင်းကို ပြုကြသကဲ့သို့၊ ကောင်းသောသူများလည်း ၎င်းကိုလျောက်ပတ်စွာ အသုံးပြုခြင်းအားဖြင့် အကျိုးအမြတ်ဖြစ်စေသော အလေ့အကျင့်ကို ရနိုင်ကြပေသည်။

ရေစီး၌ မျောပါသောသစ်ရွက်များကဲ့သို့ မိမိကိုယ်ကို မကောင်းသော အကျင့်အလေ့များ၌ မျောပါမသွားစေရအောင် လူငယ်တိုင်းပင်ပန်းခြင်း၊ ဥတုအပူအအေး၊ ဆာလောင်မွတ်သိပ်ခြင်း၊ အကျင့်ဆိုးများစွဲငြိခြင်းနှင့် မကောင်းသောပုံသက်သေများကို ခုခံတွန်းလှန်ရန် အချိန်ရှိစဉ်လေ့လာဆည်းပူးကြရမည်။ ဤနည်းအားဖြင့်လူငယ်သည် သူ့အိမ်ထောင်စု၏ မှားယွင်းသောပညာပေးနည်းစံနစ်၊ ပတ်ဝန်းကျင်၏မကောင်းသောပုံသက်သေများကြောင့် တွေ့ကြုံနိုင်သည့် အခက်အခဲများကို အကုန်အစင်မဟုတ်သော်လည်း အနည်းဆုံးတပိုင်းတစ အောင်မြင်နိုင်လိမ့်မည်။

စိတ်ပြဌါန်းချက်ကို လေ့ကျင့်ပေးမှုသည် ကိုယ်အင်္ဂါဆိုင်ရာချို့တက်မှုအချို့ကို အောင်မြင်ရန်အတွက်လည်း တခါတရံကြီးမားသော အထောက်အပံ့ကိုဖြစ်စေလေသည်။ ထင်ရှားသောပုဂ္ဂိုလ်အချို့တို့သည် ၎င်းတို့၏ကျန်းမာရေး အလွန်ချို့တဲ့မှုနှင့် ကိုယ်အင်္ဂါချို့တဲ့မှုများကို ခုခံတွန်းလှန်ခဲ့ကြသဖြင့် စိတ်ပြဌါန်းချက်လည်းခိုင်မာလာကြောင်း ရာဇဝင်သမိုင်းများတွင် တွေ့ရှိရလေသည်။ ထင်ရှားသောသိပ္ပံပညာရှင် အဲလင်အိုစ့် ၌ ပြင်းထန်သော ထိတ်လှန့်ကြောက်ရွံ့ခြင်း ရှိ၏။ စိတ်ပညာရှင် စပီနိုစာနှင့် ကဗျာဆရာကြီး ရှီလာတို့သည် ခြေမစွမ်းသူများဖြစ်ကြ၏။ ဒေရှာခန့် မီလတန်နှင့် လီယိုနာဒိုဒါဗင်ချီ ပုဂ္ဂိုလ်များတို့မှာ ကျန်းမာရေးအလွန်ချိနဲ့ကြ၏။ သူတို့သည် ထိုသို့ ချို့တက်မှုများကို တွန်းလှန်ခဲ့ကြသဖြင့် ရည်ရွယ်ချက် အောင်မြင်ထမြောက်၍ ထင်ရှားကျော်စောခြင်းသို့ ရောက်လျှက် ခိုင်မာသော စိတ်ပြဌါန်းမှုများကိုလည်း ပြုနိုင်ကြလေသည်။

သို့ဖြစ်၍ အိမ်ထောင်စု၏ မှားသောပညာရေးနှင့် အထူးသဖြင့် ကိုယ်အင်္ဂါချို့တဲ့မှု စသည်များကြောင့် ချို့ယွင်းမှုရှိသူများသည် စိတ်ပျက်အားငယ်လျှက် တွန်းလှန်ခုခံခြင်းမပြုဘဲ မိမိတို့ကိုယ်ကို မကောင်းသော အလေ့အကျင့်ဆိုးထဲသို့ မကျရောက်သင့်။ ထိုအခက်အခဲများကို ဆန့်ကျင်လျှက် စိတ်ဓါတ်ကြံ့ခိုင်ရေးကို အဆက်မပြတ် လေ့ကျင့်ပေးသင့်ကြလေသည်။ မိမိကိုယ်ကိုယ် အောင်နိုင်မှုတိုင်းသည် နောင်တွေ့ကြုံရမည့် ကြီးမားသော ရုန်းကန်မှုအတွက် စိတ်ဓါတ်အင်အားကို တောင့်တင်းခိုင်မာစေ၍ မကောင်းမှု ဒုစရိုက်များကို ခုခံတွန်းလှန်နိုင်သည့် ကိုယ်ကျင့်တရားဆိုင်ရာ တန်ခိုးသတ္တိကို ပို၍ထက်မြက်စေလေသည်။

သေကြပျက်စီးနိုင်သော မတော်တဆ ထိခိုက်မှုများ မရှိရအောင် မော်တော်ကားများ၊ မော်တော်ဆိုက်ကယ်များတွင် ကောင်းမွန်သော ဘရိတ်များတပ်ဆင်ထားကြရ၏။ စီးနှင်းမောင်းနှင်သူများသည်လည်း ထိုဘရိတ်များကို ဘယ်အချိန်တွင် ဘယ်သို့ အသုံးပြုရမည်ကို ကောင်းစွာသိနားလည်ထားကြရ၏။ ထို့အတူ လူတိုင်းလူတိုင်း မိမိတို့ဘဝအသက်ရှင်မှုတွင် အောင်ပွဲရသူများဖြစ်ရန် ကိလေသာများဖြစ်သော မုန်တိုင်းကို အောင်မြင်ရအောင် ခိုင်မာသောစိတ်ပြဌါန်းချက်ရှိရမည်။ ထိုခိုင်မာသောစိတ်ပြဌါန်းချက်သည် အလွန်လိုအပ်သော ဘရိတ် အမှန်အစစ်ဖြစ်၏။ တနည်းဆိုသော် ခံစစ်ပြင်ဆင်ခြင်းထက် ထိုးစစ်ပြင်ဆင်ခြင်းသည် အကောင်းဆုံးသော ဗျူဟာဖြစ်သည်။

ကောင်းသော ကိုယ်ကျင့်သိက္ခာတည်ဆောက်ရာာ၌ ရုန်းကန်အားထုတ်မှုများ ပြုလုပ်ရခြင်းတွင်လည်း ထိုနည်းတူ မှတ်ယူရမည်။ လူငယ်သည် ထိုးစစ်ကို တနေ့ပြီးတနေ့ ရဲ့ရင့်သောသတ္တိနှင့်ဆင်နွဲရမည်။ မိမိအတွင်းသဏ္ဍာန်ရှိ ရန်သူများကို ဘယ်အခါမျှ ရပ်နားခွင့်မပေးရ။ ထိုရန်သူများသည်ကား သူတပါးမနှစ်သက်မည်ကို စိုးရိမ်ခြင်း၊ မိမိကိုယ်ကိုယ် တွယ်တာထောက်ထားလွန်းခြင်း၊ လှည့်စားမှုကို ယုံလွယ်တတ်ခြင်း၊ ထူးဆန်းကို သိမြင်လိုခြင်း စသည်တို့ဖြစ်၏။

တာဝန်ပျက်ကွက်စေတတ်သော မကောင်းသည့် ရုပ်ရှင်ပွဲ ဇာတ်ပွဲများကြည့်ရန်အတွက် မိတ်ဆွေသင်္ဂဟများ၏ ဖိတ်ကြားခြင်း၊ အပြင်၌ ရောင်စုံခြယ်ထားသော ပန်းချီအရုပ်ကားများဖြင့် ဗမ်းပြကာ အတွင်းဆန္ဒ၌ ကိုယ်ကျင့်တရားနှင့် မညီမလျှော် အဆိပ်နှင့်သဏ္ဍာန်တူသော စာအုပ်စာတန်းများ ပေးကမ်းလာြခင်းနှင့် နဂါးကဲ့သို့ မိမိအခွေအလိတ်ထဲသို့ ဆွဲယူရန်ကြိုးစားသော ကိလေသာများ၏ ဆွဲဆောင်ခြင်းများတို့ကို ခိုင်ခံ့သော စိတ်ပြဌါန်းချက်ဖြင့် ငြင်းပယ်နိုင်ရအောင် ရဲစွမ်းသတ္တိနှင့် ပြည့်စုံရမည်။

အပြစ်ငရဲသို့ ဆွဲဆောင်နေသော ကိလေသာနှောင့်ယှက်ခြင်းနှင့် ရင်ဆိုင်ရသော လူငယ်သည် ဤအရာသည် ငါနှင့်မတော်၊ ဤအရာသည် ငါ၏သိက္ခာလမ်းစဥ်နှင့် မလျော်ညီဟူ၍ စိတ်ပညာရှင် ပလေတိုပြောသည့်အတိုင်း မိမိကိုယ်ကို ပြောဆိုဆုံးမသင့်လေသည်။ ဤသို့ပြော၍ ပြောသည့်အတိုင်း ပြုခဲ့ပါလျှင် ၎င်းသည် ယခင်ကထက် ပိုမိုကောင်းမွန်ကြံ့ခိုင်သော ပင်ကိုယ်သဘောထား ရှိလာကြောင်း အမှတ်လက္ခဏာကို ပြသခြင်းဖြစ်ပေသည်။

အတွင်းသဏ္ဍာန်၌ မစင်ကြယ်မှုများ၊ အမျာက်ဒေါသထွက်မှု၊ မနာလိုမှု စသည့် ဒုစရိုက်ကိလေသာ ဟူသမျှထကြွလာသည်နှင့်တပြိုင်နက် အချိန်မှီတားစီးရပ်တန့်နိုင်စေရန် လူငယ်သည် မိမိစိတ်နှလုံးနှင့် အကြံအစည်များကို အစဥ်စောင့်ကြပ် ကြည့်ရှုသော အလေ့ရှိရမည်။ စောင့်ကြပ်ခြင်းဆိုသည်ကား သတိလက်မလွတ်စေဘဲ မိမိအလိုကို ငြင်းပယ်နိုင်ရန် အစဥ်အမြဲအဆင်သင့်ရှိနေခြင်းကို ဆိုလိုသည်။ ပထမဦးအကြိမ်ဖြစ်ပေါ်လာသော ကိလေသာ ကာမကုန်အမှု၌ ယိမ်းယိုင်သောဆန္ဒကို တားဆီးဖိနှိပ်ရမည့် နေရာတွင် မဖိမနှိပ်ဘဲ အလိုသို့လိုက်မိသော လူငယ်သည် ကံဆိုးသဖြင့် ငါးကြီးများ၏ စားမြိုခြင်းကို ခံရသော ငါးကလေးများပမာ အပြစ်ဒုစရိုက်၏ ဝါးမြိုခြင်းကို ခံရပေသည်။

သတိပညာရှိသူအချို့သည် ကိုယ်စိတ်နှစ်ပါးစလုံး ကျန်းမာရွှင်လန်းစေရန် အစဥ်အမြဲသတိတရား လက်ကိုင်ထားကြကုန်သည်။ ၎င်းတို့သည် အဖျားအနာ လွတ်ကင်းစေရအောင် မိမိတို့ ကြိုက်နှစ်သက်သော အစားအစာ အချို့ကိုလည်း ဒုက္ခခံကာ ရှောင်ကြဥ်ကြကုန်သည်။ ကောင်းသော ကိုယ်ကျင့်သိက္ခာရှိသူများသည် ၎င်းတို့၏ဝိညာဥ်များကို ဖျက်ဆီးပစ်မည့် အဆိပ်ဖြင့် ပြည့်ဝသော အကြံအစည် အပြုအမူများကို လက်ခံငြင်းပယ်ကြသည်။ ဤသို့လျှင် ဆန့်ကျင်ဘက်ပြုခြင်းသည် သတိတရားနှင့်ပြည့်စုံခြင်း ပါရမီအတွက် လိုအပ်သော အရာနှင့် အထောက်အပံ့ကြီးတစ်ခု ဖြစ်လေသည်။ မိမိကိုယ်ကိုယ် ပိုလွန်အောင် တန်ဖိုးထားအထင်ကြီးခြင်းမရှိဘဲ လူ၏အားနည်းပျော့ညံ့မှုများကို ကောင်းစွာသိနားလည်သူသည် မိမိကိုယ်ကိုယ် ဘေးအန္တရာယ်၌ မလိုအပ်ဘဲ ကျရောက်စေလိမ့်မည်မဟုတ်။ ၎င်းကို ကြီးစွာသောသတိဖြင့် ရှောင်ကွင်းမည်သာဖြစ်သည်။ သို့ဖြစ်၍သူသည် မကောင်းသော အပေါင်းအဖော်များ၊ မကောင်းသောစာအုပ်များ၊ မကောင်းသောပျော်ရွှင်မှုများနှင့် ပျင်းရိခြင်းစသည်များကို သတိဖြင့်ရှောင်ကြဥ် ပေလိမ့်မည်။

ဤအချက်ကို မြေခွေးနှင့် ခြင်္သေ့တို့၏ ပုံဝတ္ထုတစ်ခုတွင် ထင်ရှားတွေ့မြင်ရသည်။ တနေ့သ၌ အိုမင်းလာပြီဖြစ်သဖြင့် သားကောင်များကို အစာအတွက် ဖမ်းဆီးရန် မတတ်နိုင်တော့သော ခြင်္သေ့အိုတစ်ကောင်သည် မိမိ၏ သားရဲတွင်း၌ လဲလျောင်းကာ အသည်းအသန်ဖျားနေဟန်ပြုလျက် အနီးအပါးမှ ဖြတ်သန်းသွားလာကြသော တိရစ္ဆာန်အပေါင်းတို့အား သူ့ကိုလာရောက် ကြည့်ရှုရန် လှည့်စားကာ ဖိတ်ခေါ်လေ့ရှိ၏။ သူ၏စကားကို ယုံမှားကာ တကယ်ပင်ဖျားနာသည်ဟု ထင်မှတ်လျက် ဝင်ရောက်ကြည့်ရှုလာကြသော တိရစ္ဆာန်များမှာ အတွင်းသို့ရောက်လျှင် ဖမ်းဆီးစားသောက်ခြင်းခံကြရကုန်သည်။ နောက်ဆုံး၌ မြေခွေးတစ်ကောင်သည် တွင်းဝ၌ရပ်တန့်နေစဥ် ခြင်္သေ့က အဘယ်ကြောင့် ရပ်တန့်နေသနည်း။ ကျွန်ုပ်သည် အသည်းအသန် ဖျားနာလျက်ရှိပါ၏။ သင့်အား ရန်မပြုနိုင်ပါ။ ကျွန်ုပ်ကို ဝင်ရောက်ကြည့်ရှုလှည့်ပါဟု ဆိုလေသော် မြေခွေးက ကျွန်ုပ်သည် တွင်းဝရှိခြေရာကလေးများကို ကြည့်ရှုနေပါသည်။ ၎င်းခြေရာအားလုံးတို့သည် အတွင်းသို့သာဝင်ကြ၍ အပြင်သို့ ပြန်ထွက်လာသော ခြေရာကား တစ်ခုမျှ မတွေ့ရပါ။ ထို့ကြောင့် ကျွန်ုပ်သည် အတွင်းသို့ ဝင်ခဲ့ပါလျှင် ကျွန်ုပ်၏အရင်က ဝင်မိကြသော ပညာသတိမဲ့သူများကဲ့သို့ ဆုံးခန်းသို့ ရောက်ရပါလိမ့်မည်ဟု ဆိုလျက် ထွက်ပြေးလေ၏။

ထို့အတူ အပြစ်သို့ပို့သောလမ်းကို လိုက်မှားကြသဖြင့် အဘယ်မျှများပြားလှသော သူများသည် ပျက်စီးခြင်းသို့ ရောက်ကြရကြောင်း ကောင်းစွာသိမြင်ကြသည့် သတိပညာ ရှိသူများသည် အပြစ်သို့ပို့သောလမ်းများကို အတတ်နိုင်ဆုံး ရှောင်ကွင်းရန် ကြိုးစားကြလေသည်။

စာရေးသူ(အမည်မသိ)နှင့်အန်ထော်နီဆရာစိန်။

မေလ.. ၁၉၆၄။