#Advent Wreath ဟုခေါ်သော အာဒ်ဝင်တူးပန်းကွင်း။ #Fr. Dominic
အာဒ်ဝင်တူးကာလနီးလာသည်နှင့်အမျှ ဘုရားကျောင်းကို ပြင်ဆင်ရတော့မှာမို့ အလွဲအမှားများ ရှောင်နိုင်ဖို့ရန်နှင့် ဘုရားကျောင်းကို ရောက်တဲ့အခါ တွေ့လိုက်ရသော အပြင်အဆင်ရဲ့အဓိပါယ်ကို သိခြင်းဖြင့် ပိုပြီးစိတ်ပါဝင်စားစွာ တက်ရောက်နိုင်ရန် ဒီစာလေးကို ရေးပြီး ဝေမျှချင်ပါတယ်။
အာဒ်ဝင်တူးကာလရောက်သောအခါ ဘုရားကျောင်းမှာ Advent Wreath ကိုတွေ့မှာဖြစ်ပါတယ်။ Advent Wreath ကို ဗမာလို အာဒ်ဝင်တူးပန်းခွေလို့သုံးပြီးခေါ်ကြတာတွေ့ရပေမည့် စာရေးသူ ကတော့ အာဝင်တူးပန်းကွင်းလို့ သုံးချင်ပါတယ်။ အကြောင်းကတော့ ပန်းခွေလို့သုံးလိုက်တာနဲ့ အသုဘကို သွားမြင်ယောင်မိလိုပါ။
#အာဝင်တူးပန်းကွင်းကို ဘယ်လိုပြင်ထားရမလဲ
အာဒ်ဝင်တူးပန်းကွင်းကို ပြင်ဆင်တဲ့အခါမှာ
(၁) စက်ဝိုင်းပုံသဏ္ဍာန်ဖြစ်အောင် အတတ်နိုင်ဆုံးလုပ်ထားပါ။
(၂) ထိုစက်ဝိုင်းပုံကို အစိမ်းရောင်းသစ်ရွက်များဖြင့် ရစ်ပတ်ပါ။
(၃) ထို အစိမ်းရောင်ပတ်ထားသောစက်ဝိုင်း (စက်ဝန်း) ပေါ်မှာ ဖယောင်းတိုင် စိုက်တိုင်ရန် လေးနေရာ၊ ဖြစ်နိုင်ရင် အကွာအဝေးညီမျှသောနေရာတွင် ဖယောင်းတိုင် ထွန်းလို့ရအောင် လုပ်ထားပါ။
(၄) ထိုဖယောင်းတိုင်ခွက်များတွင် ဖြစ်နိုင်လျှင် ခရမ်းရောင်ရှိသော ဖယောင်းတိုင် သုံးတိုင်နှင့် ပန်းရောင်ရှိသော ဖယောင်းတိုင် တစ်တိုင် ကိုစိုက်ထားပါ။
(၁) စက်ဝိုင်းပုံသဏ္ဍာန်သည် ဘုရား၏ အစမရှိ အဆုံးမရှိခြင်းကို ဆိုလိုပါသည်။
(၂) အစိမ်းရောင်သည် အသက်ရှင်ခြင်းကို ဆိုလိုပါသည်။
(၃) ဖယောင်းတိုင်လေးတိုင်သည် အာဒ်ဝင်တူးကာလရှိ တနင်္ဂနွေလေးပါတ်ကို ကိုယ်စားပြုပါသည်။
(၄) ခရမ်းရောင်ဖယောင်းတိုင်များသည် အာဒ်ဝင်တူးပထမ၊ ဒုတိယနှင့် စတုတ္ထတနင်္ဂနွေများကို ကိုယ်စားပြုပြီး ပန်းရောင်ဖယောင်းတိုင်မှာ ပျော်ရွှင်ခြင်းတနင်္ဂနွေဟုခေါ်သော အာဒ်ဝင်တူးတတိယ တနင်္ဂနွေကို ကိုယ်စားပြုပါသည်။ ထို့ကြောင့် ဖယောင်းတိုင်ကို မီးညှိထွန်းတဲ့အခါ ပထမ တနင်္ဂနွေမှာ ခရမ်းရောင်တစ်တိုင်ပဲထွန်းရပါမည်။
ဒုတိယတနင်္ဂနွေမှာ ခရမ်းရောင်းနှစ်တိုင် ထွန်းရပါမည်။ တတိယတနင်္ဂနွေမှာ ခရမ်းရောင်နှစ်တိုင်နဲ့အတူ ပန်းရောင်ကိုလည်း ထွန်းရပါမည်။ စတုတ္ထတနင်္ဂနွေမှာတော့ အားလုံးကို ထွန်းရမှာဖြစ်ပါတယ်။
#တွေ့ဖူးသောပုံစံများနှင့် အလွဲများ။
ခရီးသွားတတ်တော့ ခရီးသွားတဲ့အခါမှာ မထင်မှတ်တာတွေလဲ ဲတွေ့ရကြုံရတတ်ပါတယ်။ ထိုအတွေ့အကြုံတွေထဲမှာ အခုရေးနေသော အာဒ်ဝင်တူးပန်းကွင်းအကြောင်းလည်းပါတယ်။ တစ်နေရာမှာ ဘုရားကျောင်းထဲကိုဝင်တော့ ပလ္လင်နားမှာ လက်ဝါးကားတိုင်ပုံစံပေါ်မှာ ဖယောင်းတိုင်လေးတိုင်တွေ့ရပါတယ်။ ဘုရားကျောင်းပြင်တာလှလိုက်တာလို့ချီးမွမ်းပြီး စကားပြောကြရင်း ထိုလက်ဝါးကားတိုင်နှင့် ဖယောင်းတိုင်တို့မှာ အာဒ်ဝင်တူးပန်းကွင်း ဖြစ်နေမှန်း သိလာခဲ့သည်။
နောက်တစ်နေရာမှာတော့ အာဒ်ဝင်တူးပန်းကွင်းကို အရောင်းမျိုးစုံဖြင့် ချယ်သထားတာကို တွေ့ရသည်။ အခြားတစ်နေရာမှာ အာဒ်ဝင်တူးပန်းကွင်းကို နွယ်ပင်လိုလို၊ သစ်ပင်လိုလို ပုံစံလုပ်ထားတာကိုလည်းတွေ့ရသည်။ နောက်တစ်နေရာမှာတော့ အာဒ်ဝင်တူးပန်းကွင်း၏ အလယ်မှာ အဖြူရောင်းဖယောင်းတိုင်တစ်တိုင် ထပ်ထည့်ထားပြီး ဖယောင်းတိုင် ငါးတိုင်ဖြစ်သွားပါသည်။ မေးကြည့်လိုက်တော့မှ အလယ်ကဖယောင်းတိုင်သည် သခင်ယေဇူးကို ကိုယ်စားပြုတယ်ဟု ရှင်းပြပြီး ခရစ္စမတ်နေ့မှာထွန်းရမှာလို့ ပြောသွားပါတယ်။ ဒီလိုပြင်ဆင်တာတွေက တကယ်လှပါတယ်၊ အဓိပါယ်လည်းသူ့ဟာနဲ့သူရှိကြပါတယ်။ ဒါဆိုရင် ဘယ်မှာလွဲမှားနေတာလဲ။
အခုကျွန်တော်တို့ပြောနေ ရေးနေတာက ဘုရားကျောင်းအလှပြင်ရုံသက်သက်မဟုတ်ပဲ ဘာသာရေးယုံကြည်ခြင်းကို အဓိပါယ်ရှိရှိပုံဖော်နေခြင်းဖြစ်ပါတယ်။ ဒါကြောင့် ကြိုက်သလို၊ လှသလို ပုံဖော်ရမည်မဟုတ်ပဲ သူ့အဓိပ္ပါယ်နှင့်အတူ လုပ်ရမှာဖြစ်ပါတယ်။ လက်ဝါးကားတိုင်ပုံ လုပ်ထားတာဟာ အဓိပါယ်အရတအားကိုလှပပေမဲ့ အဓိပါယ်က ကယ်တင်ခြင်းအပိုင်းကို ရောက်သွားပြီး အစမရှိ အဆုံးမရှိသောဘုရားဟူသော အဓိပ္ပါယ် မပေါ်လွင်တော့ဘူး။ သစ်ပင်လိုလို နွယ်ပင်လိုလို မှာလည်း အမြင်အရုဏ်မှာကောင်းပေမဲ့လည်း မူလအဓိပ္ပါယ်နှင့် လွဲသွားပါတယ်။
အာဒ်ဝင်တူးပန်းကွင်းမှာ ဖယောင်းတိုင် ငါးတိုင်ဖြင့်လုပ်ထားတာကို တွေ့ခဲ့တုန်းက ဘုရားကျောင်းကို ပြင်တဲ့သူကိုယ်တိုင် ရှင်းပြပေးတဲ့အထဲမှာ ဖိလိပိုင်နိုင်ငံမှာတွေ့ခဲ့တာလို့ ဆိုပါသေးတယ်။ သူရှင်းပြသွားတဲ့အခါ ဖယောင်းတိုင် လေးတိုင်က အာဒ်ဝင်တူးတနင်္ဂနွေ လေးပါတ်ကို ကိုယ်စားပြုပြီး အလယ်ကဖယောင်းတိုင်က သခင်ယေဇူး (သူငယ်တော်ယေဇူး) ကို ကိုယ်စားပြုတယ်လို့ ဆိုပါတယ်။ ခရစ္စမတ်နေ့မှာထွန်းရမှာလို့ဆိုပါသေးတယ်။ ရှင်းပြသွားတာ ကောင်းသလို အဓိပါယ်အရလည်း ဟုတ်သလိုလိုရှိတယ်။
#ဒါပေမဲ့၊ ဒါပေမဲ့……
အခုကျွန်တော်တို့ပြောနေသောကိစ္စက အာဒ်ဝင်တူးပန်းကွင်းကိစ္စဖြစ်ပါတယ်။ အသင်းတော်၏ သွန်သင်ချက်အရ အာဒ်ဝင်တူးကာလသည် အာဒ်ဝင်တူ းပထမတနင်္ဂနွေနေ့ (မတိုင်ခင်စနေနေ့ ညနေ) မှစပြီး ဒီဇင်ဘာလ ၂၄ ရက်နေ့မနက်အထိ ဖြစ်ပါတယ်။ ဒီဇင်ဘာလ ၂၄ ရက်နေ့မနက် မစ္ဆားပြီးသောအခါ အာဒ်ဝင်တူးကာလကုန်ဆုံးပြီဖြစ်ပါသဖြင့် အာဒ်ဝင်တူးပန်းကွင်းလည်း ဖြုတ်ရပါတော့မည်။ အကယ်၍ မဖြုတ်ပဲဆက်လက်သုံးနေပါက အာဒ်ဝင်တူးပန်းကွင်းမဟုတ်ပဲ အလှဆင်ခြင်းသက်သက် ဖြစ်သွားပါမည်။ ပန်းအလှအနေဖြင့် ဆက်လက်အသုံးပြုလို့ရမရဟု မေးလာခဲ့သော် ရရင်လည်းရမှာပါ။ သို့သော် အာဒ်ဝင်တူးပန်းကွင်းနှင့် အထင်းမှားစရာဖြစ်လာပြီး အာဒ်ဝင်တူးပန်းကွင်း၏ အဓိပါယ်ကိုလျှော့စေသလို ဘာသာတူများကို အမြင်မှားစေနိုင်ပါသဖြင့် မသုံးသင့်ဟု စာရေးသူတော့ ခံယူပါသည်။
ထို့အပြင် ပန်းကွင်းအလယ်မှ ာထားသောဖယောင်းတိုင်သည် သခင်ယေဇူးကို ကိုယ်စားပြုသည် ဆိုပါက ပန်းကွင်း၏စက်ဝန်းကရော ဘာကိုကိုယ်စားပြုနေပါသနည်း။ ကျန်ရှိနေသော ဖယောင်းတိုင် လေးတိုင်က အာဒ်ဝင်တူးတနင်္ဂနွေလေးရက်ကို ကိုယ်စားပြု အစရှိသဖြင့် ဖယောင်းတိုင်က တစ်ချို့ကသခင်ယေဇူး တစ်ချို့ကနေ့ရက်ကို ကိုယ်စားပြုနေကြရင် စိတ်ရှုပ် စရာသာဖြစ်လာပါမည်။ အာဒ်ဝင်တူးကာလပြီးဆုံးသွားသောအခါ အာဒ်ဝင်တူးပန်းကွင်းလည်း ဖြုတ်သိမ်းမည်ဖြစ်သောအခါ အလယ်ကဖယောင်းတိုင်သည် ထွန်းညှိဖို့ရန်အချိန်တောင် မရှိတော့ပြီဖြစ်သည်။ လုပ်ရကျိုးမနပ်သလို အလုပ်ပို ပိပင်ပန်းရုံသာရှိပါတော့သည်။
ထို့ကြောင့် အာဒ်ဝင်တူးပန်းကွင်းကိုပြင်ဆင်တဲ့အခါ ရိုးရှင်းစွာပြင်ဆင်ပြီး အဓိပါယ်ပေါ်လွင်အောင်
- အဆုံးသတ်နှစ်ခု ဆက်ထားသော စက်ဝိုင်းပုံကို အစိမ်းရောင်ဖြင့်ပြုလုပ်ပြီး
- ဖြစ်နိုင်ပါက ခရမ်းရောင် သုံးခုနှင့် ပန်းရောင်တစ်ခု စုစုပေါင်း ဖယောင်းတိုင် လေးတိုင် ကို စက်ဝန်းပေါ်မှာ အကွာအဝေးညီနိုင်သမျှညီအောင် ထားပေးပါ။
အာဒ်ဝင်တူးကာလမှာ ဘုရားကျောင်းကိုပြင်တဲ့အခါမှာ အသင်းတော်ကချမှတ်ပေးသောဝိနည်း၊ သွန်သင်ပေးသောအဓိပါယ်များကို ဖော်ဆောင်ရင်း ဘာသာရေးဗဟုသုတ တိုးပွါးနိုင်ကြပါစေ။
ေဆာင္းပါးမ်ား
