သခင်ယေဇူးကသူ့တပည့်တော်တွေကိုပြောဆိုနေသောအကြောင်းအရာများဖြစ်ပြီး သူ့ကိုဝန်ခံခြင်းအကြောင်းကို ရှင်းလင်းစွာပြောနေပါတယ်။“အကယ်၍ လူတစ်ယောက်ကအခြားသောသူတွေအများရှေ့မှာငါ့ကိုဝန်ခံရင်၊ဘုရားသခင်၏ ကောင်းကင်တမန်ရှေ့မှာထိုသူကိုငါဝန်ခံမယ်။ အများရှေ့မှာငါ့ကိုငြင်းပယ်လျှင် ဘုရား သခင်၏ ကောင်းကင်တမန်တွေရှေ့မှာ ထိုသူကို ငါငြင်းပယ်မယ်။”လို့ဆိုပါတယ်။ကမ္ဘာလောကမှာ သခင်ယေဇူးကိုဝန်ခံခြင်း၊ မဝန်ခံခြင်းက အနာဂတ်ကောင်းကင်နိုင်ငံမှာလူတွေဘယ်လိုဖြစ်မယ်ဆိုတာကို ရှင်းရှင်းလင်းလင်း ဖော်ပြနေပါတယ်။ထိုအချိန်အခါနှင့်သခင်ယေဇူး ကောင်းကင်သို့ ပြန်လည်တက်ကြွသွားသောအချိန်နောက်ပိုင်းတွင်သခင်ယေဇူးကိုလူအများရှေ့မှာဝန်ခံခြင်း၊သခင်ယေဇူးကိုယုံကြည်ခြင်းက လူတို့အဖို့စိန်ခေါ်ချက်များရှိခဲ့သလို ယခုမျက်မှောက်ကာလခရစ်ယာန်အများစုလို၊မိရိုးဖလာခရစ်ယာန်များလိုမဟုတ်ပေ။ ယေဇူးခရစ်တော်ကိုယုံကြည်ကြောင်းဝန်ခံခြင်းအတွက် အချို့သောသူများ၊အချို့သောနေရာများအဖို့ စိန်ခေါ်ချက်များရှိနေဆဲပင်ဖြစ်ပါသည်။ ကျွန်ုပ်တို့သည် နှုတ်ကပတ်တော် မဖတ်ရဲ၊ မပြောရဲ၊ လူအများရှေ့တွင်ဆုမတောင်းရဲပါက ထိုအချက်များကြောင့်လည်း မိမိကိုယ်ကို သုံးသပ်သင့်ကြောင်းဆင်ခြင်ရပါမည်။ ထိုကာလတွင်အချို့သောလူတွေက သခင်ယေဇူးကိုမယုံကြည် ကဲ့ရဲ့အပြစ်တင်ကြသလို၊သခင်ယေဇူးမှတဆင့် သန့်ရှင်းသောဝိညာဉ်တော်၏ လုပ်ဆောင်မှုများကိုလည်း မှားယွင်းစွာ ပြောဆိုကဲ့ရဲ့ခြင်းဖြင့် ပြစ်မှားကြပါသည်။ ထိုသို့ ပြစ်မှားခြင်းကအလွန်အပြစ်ကြီးပါတယ်။ “လူသားကို နှုတ်နှင့်ပြစ်မှားခြင်းကအပြစ်လွှတ်ခြင်းအခွင့်ရနိုင်တယ်။သန့်ရှင်းသောဝိညာဉ်တော်ကို ကဲ့ရဲ့ပြစ်မှားခြင်းကအပြစ်လွှတ်ခြင်းအခွင့်ကိုမရနိုင်။”လို့ သခင်ယေဇူးသတိပေးပါတယ်။ ကျွန်ုပ်တို့အနေနဲ့သန့်ရှင်းသောဝိညာဉ်တော်၏ အလုပ်လုပ်ခြင်းကိုမပြစ်မှားမိရန် သတိထားသင့်ကြောင်းဆင်ခြင်ရပါမယ်။သင်တို့ကို တရားစရပ်မှူးတို့၊ အကြီးအကဲတို့ဆီ ပို့တဲ့အခါ၊ ဘယ်လိုပြန်ပြောရမယ်ဆိုတာကို မစိုးရိမ်နဲ့၊ သန့်ရှင်းသောဝိညာဉ်တော်က ဘယ်လိုပြောရမယ်ဆိုတာကိုအကြံပေးလိမ့်မယ်။ ”လို့ သခင်ယေဇူးက တပည့်တော်တွေကိုမှာကြားခဲ့ပြီး သခင်ယေဇူး၏အမှုတော်မြတ်ကိုဆောင်ရွက် တဲ့အချိန်၊အခက်ခဲတွေရင်ဆိုင်ရတဲ့အချိန်သန့်ရှင်းသောဝိညာဉ်တော် ဘုရားကို အလုံးစုံမှီခိုအားကိုးဖို့၊ သန့်ရှင်းသောဝိညာဉ်တော်ဘုရား၏လမ်းညွှန်အကြံပေးချက်အတိုင်းလုပ်ဆောင်ပြောဆိုဖို့ဆင်ခြင်ရပါတယ်။ အိုအဘ၊ ကျွန်ုပ်တို့အသက်တာမှာ သခင်ယေဇူးကို လူအများရှေ့မှာလည်း ဝန်ခံတတ်သောသူဖြစ်ရန်၊ သန့်ရှင်းသောဝိညာဉ်တော်ကို မပြစ်မှားမိရန်လည်း မစသွန်သင်တော်မူပါ။အသက်ရှင်စဉ်နေ့ရက်တိုင်းမှာ သန့်ရှင်းသောဝိညာဉ်တော်၏ လမ်းပြသွန်သင်မှုအောက်တွင်သတိရှိရှိပြောဆိုအသက်ရှင်နိုင်ရန်မစတော်မူပါ။ သခင်ယေဇူးနာမ၌ ဆုတောင်းပါ၏။ အာမင်။