ကယ်တင်ရှင်မက်ဆီးယားကြွလာတော်မူခြင်း၊ခရစ်တော်ယေဇူးဘုရားရှင်၏လူ့အဖြစ်ကိုယူတော်မူပြီး မွေးဖွားလာခြင်း၊တစ်နည်းအားဖြင့် ခရစ်တော်ယေဇူးဘုရားရှင်မွေးနေ့ပွဲကို စည်ကားသိုက်မြိုက်စွာကျင်းပခြင်းဆိုတာ ခရစ်ယာန်တိုင်းပြည်တွေမှာတင်မကဘဲခရစ်ယာန်တိုင်းပြည်မဟုတ်တဲ့ နေရာတွေမှာပါကမ္ဘာနဲ့အဝှမ်းကျင်းပပြုလုပ်ကြတဲ့ ကမ္ဘာလုံးဆိုင်ရာပွဲတော်တစ်ခုပါပဲ။ဒီခရစ္စမတ်ပွဲတော်အခါသမယမှာကျွန်ုပ်တို့ခရစ်ယာန်တွေခရစ္စမတ်ပွဲတော်ကျင်းပရခြင်းရဲ့အနှစ်သာရစစ်စစ်မဟုတ်တဲ့ငွေကြေးကုန်ကျမှုတွေအများကြီးရှိတဲ့မီးရောင်စုံတွေ၊ရင်သပ်ရှုမောဖွယ်ရာအလှဆင်ထားတဲ့ခရစ္စမတ်သစ်ပင်တွေ၊ လက်ဆောင်ပစ္စည်းထုပ်တွေ၊မြူးကြွတေးသံသာသီချင်းတွေ၊ ခရစ္စမတ်အထူး ညစာစားပွဲတွေ၊ဧည့်ခံပွဲတွေ၊အချင်းချင်း ရယ်မောပျော်ရွှင်စွာနှုတ်ဆက်ခြင်းတွေ၊အားလပ်ရက်ခရီးထွက်ခြင်းတွေ၊အပျော်အပါးပါတီတွေမှာတင် အဓိပ္ပာယ်မဲ့ ဖြတ်သန်းကုန်ဆုံး လမ်းပျောက်နေကြ ရမှာမဟုတ်ဘဲ ဒီနေ့ရဲ့ ဧဝံဂေလိရဲ့ကျမ်းစာတော်မြတ်ထဲက အသက်ပေးတဲ့နှုတ်ကပတ်တော်တရားလိုမျိုး "ကိုယ်တော်သည် မိမိကိုလက်ခံကြ၍ မိမိ၏နာမ၌ ယုံကြည်သောသူတို့အား ဘုရားသခင်၏သားသမီးဖြစ်ရသောအခွင့်ကို ပေးတော်မူ၏။ ထိုသူတို့သည်ကား ဘုရားသခင်ထံမှ မွေးဖွားလာကြခြင်းဖြစ်၏။"ဘုရားသခင်၏နှုတ်ကပတ်တော်ဟာ လူ့အဖြစ်ဇာတိကိုခံယူပြီးတော့ လူ့ဇာတိအနေနဲ့ ဘုရားစင်စစ် လူစင်စစ်အနေနဲ့မွေးဖွားလာတဲ့အတွက် လူသားဖြစ်တဲ့ ကျွန်ုပ်တို့အနေနဲ့လည်း လူစင်စစ်ဖြစ်အောင် ကြိုးစားရှင်သန်ခြင်းအားဖြင့် ဘုရားဇာတိတော်၌ မွေးဖွားလာနိုင်တဲ့နေ့ရက်ဖြစ်သလို၊ဘုရားဇာတိတော်၌ မွေးဖွားရတဲ့နေ့ရက်ဖြစ်တယ်ဆိုတာကို မမေ့ထားသင့်ပါဘူး။ကယ်တင်ရှင်မက်ဆီးယားရဲ့ ကြွလာတော်မူခြင်းကို ယုံကြည်စွာနဲ့ လက်ခံကြိုဆိုတဲ့သူတွေ၊နှုတ်ကပတ်တော်ရှင် ခရစ်တော်ဘုရားကို လက်ခံတဲ့ယုံကြည်သူတိုင်းဟာ ဘုရားသခင်မှမွေးဖွားလာသောသားသမီးများဖြစ်လာကြသလို၊ ဘုရားရှင်တော်ထံမှ အသက်သစ်ကိုရရှိကြသူများဖြစ်ကြပါတယ်။အဲဒါကြောင့်ကယ်တင်ရှင်မက်ဆီးယားသခင်၊နှုတ်ကပတ်တော်ရှင်ခရစ်တော်ဘုရား၏ဖွားမြင်တော်မူခြင်းကမောက်ကမဖြစ်နေတဲ့ကျွန်ုပ်တို့ဘဝတွေရဲ့စိတ်ထားတွေ၊ဆန္ဒပြင်းပြမှုတွေ၊ရှုပ်ထွေးလမ်းပျောက်နေတဲ့ရည်ရွယ်ချက်တွေကို မှန်ကန်လာအောင်ပြုပြင်ပေးပြီးတော့ ကျွန်ုပ်တို့ကိုလည်း အသစ်တဖန်ဖွားမြင် ပေးတာဖြစ်ပါတယ်။ဒါဟာလည်း ခရစ္စမတ်ပွဲတော်ကျင်းပရခြင်းရဲ့ အနှစ်သာရစစ်စစ်ဖြစ်ပါတယ်။