အချစ်ခံရခြင်းဆိုတာ ကမ္ဘာပေါ်မှာအင်အားအကောင်းဆုံး အားပေးလှုံ့ဆော်ချက်ဖြစ်ပါတယ်။သူတစ်ပါးအပေါ်မှာချစ်နိုင်စွမ်းဆိုတာ မိမိကချစ်ခြင်းမေတ္တာကိုဘယ်လောက်ရရှိခံစားခဲ့ရသလဲဆိုတဲ့အတွေ့အကြုံအပေါ်မှထွက်ရှိလာတဲ့ ရလာဒ်လည်းဖြစ်တယ်။ကျွန်ုပ်တို့အနေနဲ့ ကျွန်ုပ်တို့အချစ်ခံရသလောက်ပဲသူတစ်ပါးအပေါ်မှာချစ်နိုင်စွမ်းရှိကြပါတယ်။ဘုရားသခင်ရဲ့ကြီးမားတဲ့ချစ်ခြင်းမေတ္တာကိုတစ်ထူးတစ်ခြားခံစားခဲ့ရတဲ့လူတစ်ယောက်က ဘုရားသခင်၏ချစ်တတ်တဲ့ သဘာဝအကြောင်းကို ထူးထူးခြားခြား ရေးသားခဲ့ပါတယ်။ခရစ်တော်ဘုရားနောက်လိုက်တပည့်တော်ရှင်ယောဟန်ကသူ့ကိုယ်သူ"ယေဇူးချစ်တော်မူသောတပည့်တော်"လို့ခေါ်ဝေါ်သမုတ်ခြင်းအားဖြင့်ဘုရား၏ သားတော်နဲ့သူ့ရဲ့ကြားကဆက်ဆံရေးကိုဖော်ပြခဲ့ပါတယ်။ခရစ်တော်ယေဇူး၏ချစ်ခြင်းမေတ္တာအကြောင်းကို ခရစ်ဝင်ကျမ်းအားလုံးကထင်ရှားစွာ ဖော်ပြခဲ့ပေမယ့် ရှင်ယောဟန်ခရစ်ဝင်ကျမ်းမှာတော့"ချစ်ခြင်းမေတ္တာ"ကအဓိကဆိုလိုရင်းနဲ့အနှစ်ချုပ်ပါပဲ။ရှင်ယောဟန်က သခင်ယေဇူး၏ကြီးမားတဲ့မေတ္တာအကြောင်းကို ကိုယ်တိုင်ကိုယ်ကျသိရှိခံစားခဲ့ရခြင်းကြောင့်ချစ်ခြင်းမေတ္တာရှင်ယေဇူးသခင်ကတစ်ခြားသူတွေအပေါ်မှာဘယ်လိုချစ်လဲ၊ဘယ်လောက်ချစ်လဲဆိုတာကိုသရုပ်ဖော်ပြဖို့အတွက်ခရစ်တော်ယေဇူး၏ နှုတ်တော်ထွက်စကားတော်များနဲ့ ပြုမူဆောင်ရွက်ချက်များကိုပြောင်မြောက်စွာရေးသားဖော်ပြခဲ့ပါတယ်။ခရစ်တော်ယေဇူးဘုရားက ရှင်ယောဟန်နဲ့ရင်ဆိုင်ဆုံတွေ့ခဲ့သလို ကျွန်ုပ်တို့တစ်ဦးချင်းစီနဲ့လည်းရင်ဆိုင်ဆုံတွေ့နေပါတယ်။ ကိုယ်တော်ကကျွန်ုပ်တို့အကြောင်းကို အပြည့်အဝသိရှိထားတော်မူတယ်ဆိုတဲ့အချက်ကိုမရင်ဆိုင်ချင်ရင်တော့ ကျွန်ုပ်တို့တစ်ဦးချင်းအပေါ်မှာထားရှိတဲ့ကိုယ်တော်ဘုရား၏ နက်ရှိုင်းထူးခြားတဲ့ချစ်ခြင်းမေတ္တာအကြောင်းကိုလည်းသိနိုင်မှာမဟုတ်တဲ့အတွက်ခရစ်တော်ယေဇူးက ကျွန်ုပ်တို့ တကယ့်သရုပ်အမှန်ဖြစ်တဲ့အပြစ်သားပုံရိပ်စစ်တွေ အနေနဲ့ချစ်နေတာမဟုတ်ဘဲ ကျွန်ုပ်တို့ဟန်ဆောင်ထားတဲ့ပုံရိပ်တုကိုပဲချစ်နေတာပါလို့ ကိုယ့်ကိုယ်ကိုလှည့်စားခြင်းခံရတတ်ပါတယ်။ရှင်ယောဟန်နဲ့တစ်ခြားသောတပည့်တော်များအနေနဲ့ဘုရားသခင်ကကျွန်ုပ်တို့ရဲ့အခြေအနေမှန်အကြောင်းကိုလက်ခံရန်တတ်နိုင်ကြောင်း သဘောပေါက်ကြပါတယ်။ကျွန်ုပ်တို့တစ်ဦးချင်းစီပေါ်မှာထားရှိတဲ့ဘုရားသခင်၏မေတ္တာတော်ကိုသတိပြုမိခြင်းကကျွန်ုပ်တို့ရဲ့ဘဝအသက်တာမှာပြောင်းလဲမှုဖြစ်ပေါ်ဖို့ ကြီးကြီးမားမား လှုံ့ဆော်ပေးပါတယ်။ကျွန်ုပ်တို့ရဲ့ကြိုးစားအားထုတ်မှုတွေကြောင့် အပြန်အလှန်၊အလဲအလှယ်အနေနဲ့စစ်မှန်စွာရှင်သန်နေထိုင်နိုင်ဖို့အတွက်ကိုယ်တော်၏ချစ်ခြင်းမေတ္တာအားဖြင့်လွတ်မြောက်စေတာပါ။ကျွန်ုပ်တို့တတွေရော ကိုယ်တော်ရဲ့အချစ်တွေကိုလက်ခံထားလိုက်ပြီလား။