28.12.2024 - Holy Innocents, Martyrs Feast
အပြစ်မဲ့ကလေးသူငယ်များပွဲနေ့
ခရစ္စမတ်ကာလ စနေနေ့
၁-ရှင်ယောဟန်သြဝါဒစာ ၁း ၅ - ၂း၂
ရှင်မာတေဦး ၂း ၁၃ - ၁၈ -Mt.2;13-18
Reflection By Daw Moe Trio
Posted by Sr. Benedetta Myat Hnin Nwe(ISR)
ဒီနေ့ရဲ့ဧဝံဂေလိကျမ်းစာထဲမှာဖော်ပြထားတဲ့ဟေရုဒ်မင်းရဲ့ အပြစ်မဲ့အသက်(၂)နှစ်နဲ့ (၂)နှစ် အောက်ယောကျ်ားလေးတွေကိုရက်ရက်စက်စက်နှိမ်နင်းသုတ်သင်ခံရခြင်းဆိုတာ တွေးကြည့်မယ်ဆိုရင်တော်တော်လေး လူမဆန်တဲ့လုပ်ရပ်ပါပဲ။ဒါပေမယ့် အပြစ်မဲ့ကလေးငယ်တွေကိုအဓိပ္ပာယ်မဲ့သတ်ဖြတ်နေတာက ဒီခေတ်ဒီအခါမှာရော မရှိလို့လား။စစ်တမ်းတစ်ခုရဲ့အဆိုအရ ကမ္ဘာပေါ်မှာတစ်နေ့ကိုသန္ဓေသားဖျက်ချခြင်း ၂သိန်းခန့်ရှိနေပြီး၊တစ်နှစ်ကို ၇၃မီလီယံလောက်ရှိနေပါတယ်တဲ့။ဒီနေ့ခေတ်လူတွေရဲ့လုပ်ရပ်ဟာ ဟေရုဒ်ရဲ့လုပ်ရပ်နဲ့မခြားမနားပါပဲ။သို့ပေမဲ့ဘုရားရှင်ရဲ့အလိုတော်ဟာသူ့ရဲ့တစ်ပါးတည်းသော(လူ)သားတော်လေးကို အသက်အန္တရာယ်ကနေလုံခြုံကာကွယ်စေလိုတော်မူသလို ဒီနေ့ခေတ်ရဲ့အပြစ်မဲ့ကလေးငယ်များအားလုံးကိုအဓိပ္ပာယ်မဲ့ အသက်အန္တရာယ်တွေကနေလုံခြုံကာကွယ်ပေးစေလိုတာပါ။ဒါပေမယ့် စာတန်နတ်ဆိုးကနှစ်နှစ်အောက် အပြစ်မဲ့ကလေးငယ်တွေရှင်းပစ်ဖို့ ဟေရုဒ်မင်းရဲ့နှလုံးသားထဲကို ဆိုးညစ်ယုတ်မာတဲ့အကြံအစည်ကို ထည့်ပေးခဲ့လိုက်သလို၊ ဒီနေ့ခေတ်မှာလည်းအပြစ်မဲ့တဲ့လူတွေရဲ့အသက်တွေ၊သွေးတွေအကြောင်းမဲ့ ကြွေကျမြေခရစေဖို့တစ်ချို့သောလူတွေရဲ့နှလုံးသားထဲကိုဆိုးညစ်ယုတ်မာတဲ့အကြံအစည်ကိုထည့်ပေးနေတုန်းပါပဲ။ဒီအပေါ်မှာ ကျွန်ုပ်တို့အနေနဲ့ဘယ်လိုတုံ့ပြန်လုပ်ဆောင်နိုင်ကြမလဲ။ကျွန်ုပ်တို့တတွေလည်းပဲစိန့်ဂျိုးဇက်လိုပဲသူ့ရဲ့အုပ်ထိန်းမှုအောက်မှာရှိနေတဲ့ သားငယ်ကို အပြည့်အဝ ကာကွယ်ပေးဖို့က အကြီးလေးဆုံးတာဝန်ဝတ္တရားဖြစ်တယ်ဆိုတာကို သိမြင်ဖို့နှင့် လုပ်ဆောင်ဖို့ပါပဲ။ဒါကြောင့် မိဘတွေ၊အုပ်ထိန်းသူတွေ၊ဆရာသမားတွေ၊အကြီးအကဲတွေအနေနဲ့ မိမိတို့ရဲ့အရိပ်အောက်မှာ ရောက်ရှိခိုလှုံဖို့၊ ဘုရားပေးထားတဲ့ကလေးသူငယ်အပေါင်းကိုယနေ့ကမ္ဘာကြီးရဲ့ရက်စက်ကြမ်းကြုတ်မှုအပေါင်းကနေတတ်နိုင်သမျှ လုံခြုံစွာကာကွယ်ပေးဖို့ကမိမိတို့ရဲ့ ကြီးလေးသောဘုရားပေးတာဝန်တစ်ရပ်ဖြစ်တယ်ဆိုတာကို လုံးဝမမေ့အပ်ပါဘူး။