ဒီနေ့ဧဝံဂေလိကျမ်းစာတော်ထဲမှာဖော်ပြထားတဲ့ နာဇရက်မြို့က သန့်ရှင်းသောအိမ်ထောင်စုတော်ထံမှသင်ခန်းစာ(၃)ခုကို သင်ယူကြရမှာဖြစ်ပါတယ်။သင်ခန်းစာ(၁)ကတော့ "Silence"ဆိတ်ငြိမ်ခြင်း" ပဲဖြစ်ပါတယ်။တိတ်ဆိတ်ငြိမ်သက်ခြင်းအားဖြင့် မိမိကိုယ်ကိုပြန်လည်ရှာဖွေဆန်းစစ်ခြင်း၊ဆုတောင်းခြင်း၊စစ်မှန်သောဆရာသမားကောင်းများရဲ့သင်ကြားမှုကို အာရုံစူးစိုက်စွာလေ့လာသင်ယူခြင်း၊ဆောင်ရွက်စရာကိစ္စအဝဝကို ကောင်းစွာအချိန်ယူပြင်ဆင်နိုင်ခြင်း၊ဆူညံပူညံတွေရဲ့ဝေးရာသို့ မိမိကိုယ်ကို ဆွဲခေါ်ရှောင်ရှားစေနိုင်ခြင်းကိုပြုလုပ်နိုင်မှာဖြစ်ပါတယ်။သန့်ရှင်းသောအိမ်ထောင်စုတော်မှဒုတိယသင်ကြားပေးတဲ့သင်ခန်းစာကတော့"မိသားစုဘဝ"ပဲဖြစ်ပါတယ်။ မိသားစုဘဝဆိုတာချစ်ခြင်းမေတ္တာမှာ ပေါင်းစပ်ပျော်ဝင်နေခြင်း၊ ရန်လိုအကြမ်းဖက်မှု ကင်းရှင်းခြင်း၊ သန့်ရှင်းမြင့်မြတ်စွာရှင်သန်နေထိုင်ခြင်း၊ ပြင်ပကမ္ဘာအကြောင်းနဲ့ယုံကြည်ခြင်းအကြောင်းကိုလေ့လာသင်ယူဖို့ ပုံသွင်းပျိုးထောင်ပေးတဲ့ ပထမဆုံးလက်ဦးဆရာတွေမူလအစအမြုတေတည်ရာ၊မြစ်ဖျားခံရာနေရာပဲဖြစ်ပါတယ်။"အလုပ်ဟူသမျှ ဂုဏ်ရှိစွ"ဆိုတာ"လုပ်အားတန်ဖိုးကိုချစ်မြတ်နိုးတတ်ဖို့ကတော့ နာဇရက်မြို့က သန့်ရှင်းသောအိမ်ထောင်စုတော်ကနေ သင်ကြားပေးလိုက်တဲ့ တတိယသင်ခန်းစာပဲဖြစ်ပါတယ်။ ဒီသင်ခန်းစာ၃ခုအပြင်တကယ့်အထွတ်အထိပ်သင်ခန်းစာကတော့ လူပီသအောင် ဘယ်လိုနေထိုင်ရှင်သန်ရမလဲဆိုတဲ့သင်ခန်းစာပဲဖြစ်ပါတယ်။ခရစ်တော်ယေဇူးဘုရားဟာထူးခြားသော်လည်းပုံမှန်ကလေးငယ်ဘဝဆယ်ကျော်သက်ဘဝဖြစ်စဥ်တွေကို ဖြတ်သန်းပြီးမှလူကြီးအဖြစ်သို့ကျွန်ုပ်တို့လူသားတွေနည်းတူပုံမှန်အတိုင်း အရွယ် ရောက်ကြီးပြင်းလာရသူဖြစ်ပါတယ်။ခရစ်တော်ယေဇူးဘုရား၏ရုပ်ပိုင်းဆိုင်ရာမှာရော၊စိတ်ပိုင်းဆိုင်ရာမှာပါ ကြီးထွားဖွံ့ဖြိုးလာရတယ်၊အခြားသူများနဲ့လည်းပတ်သက်ပြောဆိုဆက်ဆံရတယ်၊ခမည်းတော်ဘုရား၏ချစ်မြတ်နိုးခြင်းကိုလည်းခံရလို့ သူ့ရဲ့လူသားဘဝကို အပြည့်အဝသဟာဇာတဖြစ်ခဲ့ပါတယ်။ လူတစ်ယောက်အနေနဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာ၊ လူမှုရေးဆိုင်ရာ ဝိညာဥ်ရေးဆိုင်ရာတွေမှာ ဟန်ချက်ညီညီအပြည့်အဝရှင်သန်ဖွံ့ဖြိုးဖို့ဆိုတာလူသားတစ်ယောက်ဖြစ်တဲ့ခရစ်တော်ယေဇူးအတွက် အရေးအကြီးဆုံးဖြစ်ခဲ့သလို၊ကျွန်ုပ်တို့ယုံကြည်သူလူသားတွေအတွက်လည်း အရေးအကြီးဆုံးအချက်ဖြစ်ရပါမယ်။