ယုံကြည်ခြင်းခွန်အား

ဒီနေ့ဧဝံဂေလိကျမ်းမှာသခင်ယေဇူးကတရားဇရပ်မှုးဂျိုင်းရုရဲ့သမီးငယ်လေးကိုအသက်ပြန်ရှင်စေခြင်းနှင့်
သွေးသွန်နာစွဲကပ်နေတဲ့ အမျိုးသမီးကိုရောဂါပျောက်ကင်းစေတဲ့အကြောင်းကိုထောက်ရှုရပါတယ်။တချို့သော
သူတွေအတွက်ယုံကြည်ဖို့အတွက်သက်သေအထောက်ထားတွေလိုအပ်တယ်။ယုံကြည်ဖို့အတွက်
တွေ့မြင်ဖို့လည်းလိုတယ်လို့ဆိုကြတယ်။တရားဇရပ်မှုးနှင့်ရောဂါသည်အမျိုးသမီးတို့အတွက်တော့
ယုံကြည်ဖို့အတွက်ဘာမှတွေ့မြင်စရာမလိုခဲ့ပါဘူး။ဘုရားရှင်ရဲ့တန်ခိုးလက္ခဏာကိုမြင်တွေ့ဖို့အတွက်သာ သူတို့
ယုံကြည်ခဲ့ကြတယ်။နှစ်ဦးစလုံးကယုံကြည်ခြင်း၌ပြင်းထန်ခဲ့ကြတာမှန်ပေမဲ့မတူညီတဲ့အချက်ကလေးတွေ
အနည်းငယ်ရှိပါတယ်။
တရားဇရပ်မှုးမှာတော့ဂျိုင်းရုလို့ခေါ်တဲ့နာမည်ရှိတာကိုတွေ့ရပြီးအမျိုးသမီးကိုတော့နာမည်မဖော်ပြ
ထားပါဘူး။သခင်ယေဇူးရဲ့ခေတ်အချိန်အခါတုန်းကလူ့အသိုင်းဝိုင်းမှာဒီလိုခွဲခြားဆက်ဆံမှုတွေရှိခဲ့တယ်။
အမျိုးသမီးနှင့်ကလေးငယ်တွေဆိုတာလူ့အသိုင်းအဝိုင်းမှာနေရာမရှိ၊အရာမရောက်ပါဘူး။သေအံ့ဆဲဆဲဖြစ်
နေတဲ့ဂျိုင်းရုရဲ့သမီးကိုလည်းနာမည်ထုတ်ဖော်မပြထားပါဘူး။သခင်ယေဇူးကလူရာမသွင်းခံရတဲ့သူတွေကို
ဂရုတစိုက်နဲ့ လူရာသွင်းပြခဲ့ပါတယ်။ဂျိုင်းရုဆိုတာတရားဇရပ်မှုးတစ်ယောက်ဖြစ်တယ်။သူ့ကလေးနဲ့သူ့ဘ၀ကို
သူထောက်ပံ့နိုင်စွမ်းရှိတယ်။သွေးသွန်နာစွဲကပ်နေတဲ့အမျိုးသမီးကတော့ရောဂါပျောက်ကင်းဖို့အတွက်
ရှိသမျှအကုန်ရောင်းချခဲ့ရတယ်။ရောဂါဖိစီးလို့ချွတ်ခြုံကျနေတဲ့အပြင်ဘယ်သမားတော်မှလည်း ကုသပေးခြင်း
မရှိတော့ဘူး။အားကိုးစရာဆိုလို့သခင်ယေဇူးတစ်ပါးသာ ကျန်ရစ်တော့တယ်။ဂျိုင်းရုမှာက တခြား နည်းလမ်း
တွေ ရွေးချယ်စရာရှိပေမဲ့ သူမမှာတော့ ကိုယ်တော်မှ တစ်ပါး အခြားမရှိနိုင်တော့တဲ့အတွက်ကြောင့် ခရစ်တော်ရဲ့
တန်ခိုးလက္ခဏာကို အကြွင်းမဲ့ ယုံကြည်ခဲ့ပါတယ်။ ဒီအဖြစ်ပျက်ကို ကြည့်ပြီး ကျနော်တို့ကို စဉ်းစားစေတာက
လောကမှာ ပိုက်ဆံရှိရှိ၊ မရှိရှိ၊ ပြည့်စုံလို့ပဲဖြစ်ဖြစ်၊ ချို့တဲ့လို့ပဲဖြစ်ဖြစ် အရာအားလုံးထက် ဘုရားသခင်ကို
ယုံကြည်အပ်နှံဖို့လိုတယ်ဆိုတာပါပဲ။
နောက်တစ်ချက်သူတို့နှစ်ဦးကြားကမတူညီတာလေးတစ်ခုကတော့ဂျိုင်းရုကတရားဇရပ်မှုးဆိုတော့ဘုရား
ဝတ်ပြုခြင်းတွေ ဗိမ္မာန်တော်မှာ တရားဇရပ်မှာအချိန်မရွေးလုပ်နိုင်တယ်။ရောဂါသည်အမျိုးသမီးကသွေးသွန် နာ
ဆိုတဲ့ရောဂါစွဲကပ်နေတာကြောင့်ဘာသာရေး ဝိနည်းအရ မသန့်ရှင်းဘူးလို့သတ်မှတ်ခံထားရတယ်။ဒါကြောင့်
ဘုရားသွားကျောင်းတက်ဖို့လည်းမဖြစ်နိုင်ပါဘူး။ဒါပေမဲ့ဘုရားသခင်ရဲ့ရှေ့မျက်မှောက်မှာသန့်ရှင်းသူတွေ၊
မသန့်ရှင်းသူတွေဆိုတာမရှိဘူး။ရဟန္တာရော၊အပြစ်သားရောအားလုံးက အတူတူပါပဲ။ဘုရားကိုချဉ်းကပ်ဖို
သန့်ရှင်းမြင့်မြတ်နေမှမဟုတ်ပါဘူး။ အပြစ်မကင်းလို့ဘုရားနဲ့ မထိုက်တန်ဘူးဆိုပြီးဝန်လေးနေဖို့ မလိုပါဘူး။
ဘုရားရှင်ကကျနော်တို့ကိုအရှိအတိုင်း၊အဖြစ်အတိုင်းလက်ခံတယ်။ချစ်တယ်။ကျေးဇူးတော်တွေပေးတယ်။
ကျနော်တို့ဘက်ကချဉ်းကပ်ရဲဖို့ပဲလိုပါတယ်။ ဂျိုင်းရုနဲ့အမျိုးသမီးတို့ရဲ့ဘုရားဆီချဉ်းကပ်ပုံလည်း
မတူကြပါဘူး။ဂျိုင်းရုကသူ့သမီးအသက်ပြန်ရှင်ဖို့ နှိမ့်ချ ပွင့်လင်းစွာလူတွေအရှေ့မှာအသနားခံတယ်။
အမျိုးသမီးကတော့လူတွေရဲ့ပယ်ကျဉ်မှုကိုခံထားရတာကြောင့်ချဉ်းကပ်ဖို့တောင်မဝံ့မရဲဖြစ်နေရှာတယ်။ လူ
မသိသူမသိတိတ်တိတ်ကလေးကိုယ်တော့်ရဲ့ဝတ်ရုံတော်ကိုထိဖို့ကြိုးစားခဲ့တယ်။တိတ်တိတ်လေးဆိုပေမဲ့
ရိုးသားယုံကြည်စွာနဲ့ ထိတွေ့ခဲ့တာပါ။ဘုရားရှင်ဆီချဉ်းကပ်တဲ့အခါမှာဂျိုင်းရုလို နှိမ့်ချပွင့်လင်းဖို့ လိုသလို
ရောဂါသည်အမျိုးသမီးလိုရိုးသာယုံကြည်ဖို့လည်းလိုပါတယ်။
သေချာတာတစ်ခုကတော့သူတို့နှစ်ဦးစလုံးဆီမှာကြီးမားတဲ့ယုံကြည်ခြင်းရှိပါတယ်။နှစ်ယောက်စလုံးက
ခရစ်တော်ကသူတို့ကိုကုစားပေးနိုင်စွမ်းရှိတာကိုယုံကြည်ထားကြတယ်။အဲ့ဒီယုံကြည်ခြင်းတစ်ခုနဲ့တင်ကို
လုံလောက်သွားခဲ့ပါပြီ။ယုံကြည်ခြင်းကြောင့်ဘုရားရှင်ဆီတိုးဝင်ချဉ်းကပ်ရဲသလိုဘုရားရှင်ရှေ့ ဒူးထောက်
အသနားခံတောင်းလျှောက်ရဲခဲ့တယ်။ယုံကြည်ခြင်းကြောင့်ဝတ်လုံတော်လေးထိရုံနဲ့ပျောက်ကင်းနိုင်မယ်ဆိုတာ
တပ်အပ်သိနေခဲ့တယ်။ယုံကြည်ခြင်းသာမရှိရင်တချို့လွယ်ကူတဲ့အရာတွေတောင်မဖြစ်နိုင်ဘူးဆိုပြီး
ခက်ခဲကောင်း ခက်ခဲသွားတတ်တယ်။ယုံကြည်ခြင်းကကယ်တင်ခြင်းအတွက်အခရာကျလွန်းလှတယ်ဆိုတာ
ကျနော်တို့ကိုထောက်ရှုခွန်အားပေးနေပါတယ်။