" အမှန်တရားအတွက် ရဲရင့်စွာ ရပ်တည်ခြင်း"

ယနေ့ ဧဝံဂေလိတရားတော်တွင် ယောဟန်ဗတ္တိဇံရဲ့သေဆုံးခြင်းအကြောင်းကို ကျွန်ုပ်တို့ ကြားနာရပါတယ်။ ယောဟန်က ဘုရင်ဟေရုဒ်အား အမှန်တရားကို ရဲရင့်စွာ ပြောဆိုခဲ့တယ်။ မိမိ ညီအစ်ကိုရဲ့ ဇနီးကို ယူထားခြင်းက တရားမဝင်ကြောင်း ဟေရုဒ်အား ပြောခဲ့တယ်။ အမှန်တရားကို ပြောဆိုခြင်းအားဖြင့် မိမိအသက်ဆုံးရှုံးနိုင်ကြောင်း ယောဟန်သိရှိပေမယ့်တိတ်ဆိတ်မနေခဲ့ဘူး။

ဟေရုဒ်က ယောဟန်ရဲ့စကားကြောင့် စိတ်အနှောင့်အယှက်ဖြစ်ခဲ့သော်လည်း သူ့ကို လေးစားခဲ့တယ်။ သို့သော် မိမိရဲ့မာန၊ အခြားသူများရဲ့ ကျေနပ်မှုကို ရရှိလိုသောဆန္ဒနဲ့  မဆင်မခြင် ပြုခဲ့သော ကတိစကားကြောင့် နောက်ဆုံးတွင် ယောဟန်ကို သတ်ရန် အမိန့်ပေးခဲ့ရတယ်။

" အခက်အခဲများကြားတွင် အမှန်တရားဘက်မှ ရပ်တည်ရန် ကျွန်ုပ်တို့ ရဲရင့်ခြင်းရှိပါသလား။" ဆိုသော မေးခွန်းကို မေးကြရန် ဒီနေ့ ကျမ်းစာတော်မြတ်က မီးမောင်းထိုးပြလိုက်ခြင်းပါ။

တစ်ခါတစ်ရံတွင် မှန်ကန်သောအရာကို ကျွန်ုပ်တို့သိရှိသော်လည်း အခြားသူတွေက ဘယ်လိုထင်မလဲဆိုပြီးအမှန်တရားကိုသီလျက်နဲ့ညံ့ဖျင်းတဲ့စိတ်ဖြင့်လက်ခံလိုက်ပြီး နုတ်ဆိတ်နေတတ်ကြတယ်။

တခါတရံမှာငါ့ကို ဘယ်လိုလုပ်လာမလဲ၊ ကြောက်ရွံ့စိတ်တွေနဲ့ ကိုယ်ကျိုးအတွက် အမှန်ကိုသိသော်လည်းလစ်လျူရှု နေတတ်ကြပါတယ်။

အမှန်တရားကိုသိသော်ငြား မိမိ လက်ခံလိုသောကြောင့် လက်ခံခြင်း (သို့) အမှန်တရားကို ပြောဆိုခြင်းကြောင့် အခက်အခဲများ ကြုံတွေ့ နိုင်ရဖွယ်ရှိသောကြောင့် တိတ်ဆိတ်နေတတ်ကြတဲ့သူတွေကို ယေဇူးက လက်တွေ့ဆန်သော ယောဟန်ရဲ့ဘဝဖြင့်  သူရဲဘောကြောင်သောသူ၊ ကိုယ်ကျိုးတခုတည်းသာကြည့်ပြီး အတ္တကြီးသော သူတွေကို အတိအလင်းထုတ်ဖော်ပြသလိုက်ခြင်းပါ။

ယောဟန်ဗတ္တိဇံရဲ့ စံနမူနာက လူတွေရဲ့စိတ်ကျေနပ်မှုထက် ဘုရားသခင်နောက်လိုက်ခြင်းက ပို၍ အရေးကြီးကြောင်း သွန်သင်ပေးလိုက်ခြင်းပါ။

တစ်ချိန်တည်းမှာပင် ဟေရုဒ်ရဲ့အဖြစ်အပျက်က မာန၊ ကြောက်ရွံ့မှုနဲ့ လူတို့ရဲ့အတည်ပြု လက်ခံမှုကို ရရှိလိုသောဆန္ဒတို့က ကျွန်ုပ်တို့ရဲ့ ဆုံးဖြတ်ချက်များကို တပါးသူအား ထိန်းချုပ်ခွင့်ပေးလိုက်ခြင်းရဲ့ အန္တရာယ်ကိုလည်း သတိပေးနေပါတယ်။

* သေးငယ်သော အလျှော့ပေးမှုတစ်ခုက တစ်ခါတစ်ရံတွင် ပိုမိုကြီးမားသော အပြစ်သို့ ဦးတည်သွားနိုင်ပါတယ်။*

ခရစ်ယာန်များအနေဖြင့် ကျွန်ုပ်တို့တွေက ရဲရင့်ခြင်း၊ ချစ်ခြင်းမေတ္တာ နဲ့  နှိမ့်ချခြင်းတို့ဖြင့် အမှန်တရားကို ပြောဆိုရန် ခေါ်တော်မူခြင်းခံရပါတယ်။ ကျွန်ုပ်တို့ကို အမြဲတမ်း တန်ဖိုးထား နားလည်ပေးကြမှာ မဟုတ်သော်လည်း ကျွန်ုပ်တို့ရဲ့ ပထမဆုံးတာဝန်မှာ ဘုရားသခင်အပေါ် သစ္စာရှိနေခြင်းပဲ ဖြစ်ပါတယ်။

ယောဟန်ဗတ္တိဇံရဲ့ စံနမူနာက ကျွန်ုပ်တို့အား

 လူကြိုက်များမှုထက် အမှန်တရားကို ရွေးချယ်ရန်၊ သက်သာမှုထက် သစ္စာရှိမှုကို ရွေးချယ်ရန်၊ 

မိမိတို့ရဲ့ဆန္ဒထက် ဘုရားသခင်ရဲ့အလိုတော်ကို ရွေးချယ်ရန် ရဲရင့်ခြင်းကို ပေးသနားတော်မူပါစေ။