 for web4.jpg)
 for web3a.jpg)
2026-08-31 02:49:25
1 September 2026 Tuesday
22d Week in Ordinary Time
Luke 4: 31 - 37
Reflection by Consolation Sister ( NSC )
Posted by Sr. Maria Ni Ni, MSP
“ကိုယ်တော်မည်သူဖြစ်သည်ကို အကျွန်ုပ်တို့သိပါ၏။ ကိုယ်တော်သည် ဘုရားသခင်၏ သန့်ရှင်းသောသူဖြစ်ပါသည်။” (လုကာ ၄:၃၄)
ဒီနေ့ ဧဝံဂေလိတရားတော်တွင် နတ်ဆိုးပင်လျှင် သခင်ယေဇူး၏ အမှန်တကယ်သော အဖြစ်မှန်ကို သိရှိ၍ ကိုယ်တော်သည် ဘုရားသခင်၏ သန့်ရှင်းသောသူ ဖြစ်ကြောင်း ဝန်ခံခဲ့သည်။ သို့သော် သခင်ယေဇူးသည် နတ်ဆိုး၏ သက်သေခံမှုကို လက်မခံဘဲ “တိတ်ဆိတ်စွာနေလော့။ ထိုသူ၏အထဲမှ ထွက်သွားလော့” ဟု အာဏာတော်ဖြင့် မိန့်တော်မူခဲ့သည်။ ထိုခဏ၌ မကောင်းသောတန်ခိုးသည် အရှုံးပေး၍ ထွက်သွားခဲ့ပြီး၊ ထိုသူသည်လည်း မည်သည့်ထိခိုက်နာကျင်မှုမျှ မခံရဘဲ လွတ်မြောက်ခဲ့သည်။ ကာဖာနာအုမ်မြို့ရှိ တရားဇရပ်၌ သခင်ယေဇူး သွန်သင်တော်မူသောအခါ လူအပေါင်းတို့သည် အလွန်အံ့ဩခဲ့ကြသည်။ အကြောင်းမှာ ကိုယ်တော်၏ နှုတ်ကပတ်တော်သည် လောက၏ အာဏာများနှင့် မတူဘဲ အမှောင်ထုအတွင်းသို့ အလင်းကို ဆောင်ကြဉ်းပေးနိုင်သော စစ်မှန်သည့် တန်ခိုးတော် ဖြစ်သောကြောင့်ပင်။
ဤဧဝံဂေလိတရားတော်က ကျွန်ုပ်တို့အား သတိပေးသည်မှာ သခင်ယေဇူး၏ နှုတ်ကပတ်တော်သည် သွန်သင်ခြင်းသာမက လွတ်မြောက်ခြင်း၊ ကုသခြင်းနှင့် အသစ်ပြန်လည်ရှင်သန်ခြင်းကိုလည်း ပေးစွမ်းနိုင်ကြောင်း ဖြစ်သည်။ နတ်ဆိုးသည် ကိုယ်တော်ကို သိသော်လည်း မချစ်နိုင်၊ မနာခံနိုင်ခဲ့ပါ။ ကျွန်ုပ်တို့မူကား သခင်ယေဇူးကို သိရုံမျှနှင့် မလုံလောက်ဘဲ ကိုယ်တော်ကို ယုံကြည်ခြင်း၊ ချစ်ခြင်းနှင့် နေ့စဉ်အသက်တာတွင် နာခံလျက် အသက်ရှင်ရန် ဖိတ်ခေါ်ခံထားရသူများ ဖြစ်ကြသည်။
ကျွန်ုပ်တို့၏ နေ့စဉ်ဘဝတွင်လည်း ကြောက်ရွံ့မှု၊ စိုးရိမ်ပူပန်မှု၊ အပြစ်နှင့် မျှော်လင့်ချက်ကင်းမဲ့ခြင်းတို့က စိတ်နှလုံးကို ဖိစီးတတ်သည်။ ထိုအချိန်များ၌ သခင်ယေဇူး၏ နှုတ်ကပတ်တော်ကို ယုံကြည်စွာ နားထောင်၍ လိုက်နာမည်ဆိုလျှင် ကိုယ်တော်သည် ကျွန်ုပ်တို့ကို လွတ်မြောက်ခြင်း၊ ငြိမ်သက်ခြင်းနှင့် မျှော်လင့်ခြင်းသစ်ဆီသို့ ဦးဆောင်တော်မူမည် ဖြစ်သည်။