 for web4.jpg)
 for web3a.jpg)
2023-11-02 07:57:58
3.11.2023 – 30th Week of Ordinary Time, Friday
၂၀၂၃ နိုဝင်ဘာလ ၃ ရက်၊ ၃၀ ကြိမ်မြောက် သာမန်ကာလ သောကြာ
Luke 14:1-6, ရှင်လုကာ ၁၄း၁-၆
Reflection by Rev. Fr. Paschal Thi Ko Shin(SDB)
Posted by Sr. Benedetta Myat Hnin Nwe(ISR)
နိုဝင်ဘာလ(၃)ရက်(သောကြာနေ့)ဒီကနေ့မနက်ကြားနာရတဲ့ဧဝံဂေလိကျမ်းစာထဲမှာဥပုသ်နေ့နဲ့ ပတ်သက်ပြီးဖာရီဇေဦးတွေနဲ့ သခင်ယေဇူးထိပ်တိုက်ပြန်တွေ့ရတဲ့အကြောင်းဖြစ်ပါတယ်။ ဥပုသ်နေ့မှာပဲ ဖာရီဇေဦးတွေထဲက ခေါင်းဆောင်ပိုင်းတစ်ဦးကသူ့ရဲ့အိမ်မှာကိုယ်တော်ကိုညစာစားဖို့ ဖိတ်တဲ့အတွက်ကြောင့်သခင်ယေဇူးကကြွလာခဲ့တယ်။ဥပုသ်နေ့နဲ့ပတ်သက်ပြီးသခင်ယေဇူးနဲ့ဖာရီဇေဦးတို့ ခဏခဏစကားများရတယ်။တိတိကျကျပြောရရင်ကျမ်းစာထဲမှာ(၇)ကြိမ်တောင်ရှိတယ်။ဥပုသ်နေ့မှာခရစ်တော်ကရောဂါတွေကုသပေးတာ၊အပြစ်သည်တွေကိုခွင့်လွှတ်ပေးတာအကြိမ်ကြိမ်ပါပဲ။ အကြိမ်တိုင်းအကြိမ်တိုင်းက ဖာရီဇေဦးတွေအတွက် မျက်မုန်းကျိုးစေတယ်။ခရစ်တော်ပြုတဲ့အကောင်းတွေအတွက်အတုယူအားကျရမယ့်အစား မနာလိုအမုန်းတရားတွေသာ တိုးလာပါတယ်။အဓိကကတော့ ဘယ်အချိန်မှာများ ယေဇူးဘုရားရှင်က ဥပုသ်နေ့ကို ချိုးဖောက်လိုက်မလဲဆိုတာ မျက်စိဒေါက် ထောက်ကြည့်နေကြတဲ့အတွက်ကြောင့်ဖြစ်ပါတယ်။ ကိုယ်တော်ကသာ ဥပုသ်နေ့ကို မစောင့်ထိန်းဘူးဆိုရင်သူတို့အတွက်ဂွင်ကောင်းကောင်းကြီးရသွားပြီ။ဘာသာရေးကိုချိုးဖောက်တဲ့သူ။ဥပဒေမလိုက်နာသူမို့ သူကို ဆက်မဟောပြောဖို့၊သူပြောတာတွေကိုနားမထောင်ကြဖို့လူတွေကို ပြောလို့ရသွားပြီ။ ဒါကြောင့် ဥပုသ်နေ့မှာ ယေဇူးဘုရားရှင် အမှား လုပ်မိဖို့ သူတို့အတွက် အသက်တမျှ အရေးကြီးနေတယ်။ ဒီလောက်စောင့်ကြည့်နေကြတဲ့ကြားထဲက ဒီနေ့မှာလည်းသခင်ယေဇူး ကရေဖျဉ်းနာစွဲနေတဲ့သူတစ်ယောက်ကိုကုသပေးလိုက်ပြန်တယ်။ဒါပေမဲ့မကုသခင်မှာကျမ်းတတ်ဆရာတွေကို မေးခွန်း တစ်ခုမေးတယ်။ဥပုသ်နေ့မှာအနာရောဂါကုသလို့ရလားဆိုပြီးမေးတယ်။ သူတို့မဖြေကြဘူး။တိတ်ဆိတ်နေကြတယ်။ကိုယ်တော်ကလည်းရေဖျဉ်းစွဲလူနာကိုကုသပြီး ပြန်လွှတ်ပေးလိုက်ပါတယ်။ ယေဇူးဘုရားရှင်ကသူလုပ်ရမယ့်အရာကောင်းတဲ့အမှုကိုလွတ်လပ်စွာနဲ့ပဲ လုပ် ဆောင်ခဲ့တယ်။ဥပုသ်နေ့တွေဘာတွေထက်အကောင်းပြုခြင်းကပိုလို့အရေးပါတယ်ဆိုတာကိုထောက်ပြခဲ့တယ်။ဥပုသ်နေ့ကိုမစောင့်ထိန်းရဘူးလို့ မပြောဘူး။သနားကရုဏာပြဖို့လိုလာပြီဆိုရင်မလို အပ်တဲ့စည်းကမ်းတွေမေ့ထားလို့ရတယ်။ဥပုသ်နေ့ဟာအပြစ်ရှာဖို့မဟုတ်ဘူး။ဥပုသ်နေ့မှာဘုရားအတွက်ပိုပြီးအချိန်ပေးဖို့ဖြစ်တယ်။ကောင်းတဲ့အရာလေးတွေလုပ်ပြီးဘုရားကိုချစ်ကြောင်းသက်သေ ပြလို့ရတယ်။ဘုရားကျောင်းတက်၊စက္ကရမင်တူးတွေခံယူပြီးဘုရားကိုယုံကြည်သဒ္ဓါစိတ်တွေပွားလာရမယ်။မိသားစုအတွက်အချိန်ပိုပေးတာတွေ၊နေထိုင်မကောင်းတဲ့သူတွေကိုကြည့်ပေးတာတွေ၊သူများအတွက်ကူညီလုပ်ပေးလို့ရတာလေးတွေနဲ့ပျော်ပျော်ရွှင်ရွှင်ဖြတ်သန်းရမှာဖြစ်ပါတယ်။ဓမ္မမိတ်ဆွေအပေါင်းတို့ ဥပုသ်နေ့ကိုသန့်ရှင်းပျော်ရွှင်စွာမှန်ကန်သောနည်းလမ်းတွေနဲ့ စောင့် ထိန်းနိုင်ပါစေလို့ ဆုတောင်းပေးလိုက်ပါတယ်။
