 for web4.jpg)
 for web3a.jpg)
2023-11-03 20:28:54
4.11.2023 – 30th Week of Ordinary Time, Saturday
၂၀၂၃ နိုဝင်ဘာလ ရက်၊ ၃၀ ကြိမ်မြောက် သာမန်ကာလ စနေနေ့
Luke 14:1,7-11 , ရှင်လုကာ ၁၄း၁,၇-၁၁
Reflection by Rev. Fr. Paschal Thi Ko Shin(SDB)
Posted by Sr. Benedetta Myat Hnin Nwe(ISR)
ဒီကနေ့ကြားနာရတဲ့ဧဝံဂေလိကျမ်းစာထဲမှာ သခင်ခရစ်တော်ကဖာရီဇေဦးတစ်ယောက်ရဲ့အိမ်မှာညစာဖိတ်ကြားခြင်းခံရတယ်။ကြွလာတဲ့ဧည့်သည်တွေကလည်း သူထက်ငှာအပြိုင်အဆိုင်နေရာကောင်းတွေရွေးထိုင်ကြတယ်။ဧည့်သည်တွေကိုရော၊ဒီကနေ့ ဒီတရားကိုကြားနာနေကြတဲ့ကျွနိုပ်တို့ကိုရော ခရစ်တော်ပေးနေတဲ့တရားအဆုံးအမလေးက ဖိတ်ကြားခြင်းခံရတဲ့အခါမှာအနိမ့်ဆုံးနေရာကိုရွေးပြီးထိုင်ဖို့မိန့်ပါတယ်။တနည်းအားဖြင့်ပြောရရင်မိမိကိုယ်ကိုနှိမ့်ချခြင်းရှိဖို့ပါပဲ။ကိုယ့်ကိုကိုချီးမြောက်တဲ့သူဟာနှိမ့်ချခြင်းခံရမယ်။မိမိကိုယ်ကိုနှိမ့်ချတဲ့သူဟာချီးမြင့်ခြင်းကိုခံရမယ်။ယေဇူးဘုရားရှင်ရဲ့ဘဝအသက်တာကိုကြည့်ရအောင်။သူဟာဘုရားအဖြစ်တော်နှင့်လူ့အဖြစ်တော်၂မျိုးပေါင်းစပ်ထားတာမို့လူရှေ့ဘုရားရှေ့မှာဘယ်လိုရှင်သန်နေထိုင်ရမလဲဆိုတာကို ပြသပေးပါတယ်။ ရဟန္တာသြဂုတ်စတင်းကမိန့်ခဲ့ဖူးတယ်။ခရစ်တော်ရဲ့ဘဝတစ်ခုလုံးဟာလူ့အဖြစ်ကိုယူတော်မူခြင်းအားဖြင့်လူသားတစ်ယောက်အနေနဲ့ ဘယ်လိုပြုမူရမလဲဆိုတာကို ပညာပေးဆုံးမနေပါတယ်လို့ ဆိုခဲ့ပါတယ်။ခွန်အားနဲ့ပြည့်စုံတဲ့ဘုရားရှင်ကလူသားတွေအတွက်ခွန်အားမဲ့တဲ့ဘဝကိုယူခဲ့တယ်။ အစဉ်တည်မြဲတော်မူတဲ့ ဘုရားက လူ့အတွက်နဲ့ အနတ္တ သင်္ခါရအဖြစ်ကို ခံယူခဲ့တယ်။အရာအားလုံးရှိလျှက်နဲ့ ဘာမှမရှိတဲ့ လူ့ဘဝကိုခံယူခဲ့တာဟာ ဘုရားရှင်ရဲ့နှိမ့်ချတော်မူတဲ့ စိတ်ရင်းသဘောကိုဖော်ပြပေးနေပါတယ်။ အမှန်တော့နှိမ့်ချခြင်းကမြင့်မြတ်ခြင်းရဲ့အစပါပဲ။နှိမ့်ချခြင်းရဲ့ဆန့်ကျင်ဖက်ဖြစ်တဲ့မာနဟာနတ်ဆိုးရဲ့ လက်စွဲတော်ဖြစ်ပါတယ်။ကိုယ့်ရဲ့အမှားကိုဖုံးပြီး သူများရဲ့အပြစ်ကို မဟားတရားလက်ညိုးထိုးတဲ့နေရာမှာ သာယာတတ်တဲ့ဒီမာနတရားရဲ့အောက်မှာနှိမ့်ချခြင်းဆိုတာ တိုးဝင်ပျောက်ကွယ်သွားတတ်ပါတယ်။မာနကြီးလွန်းတဲ့သူတွေကမိမိကိုယ်ကိုဂုဏ်ဖော်မြောက်စားတယ်။သူပဲအကောင်း၊သူပဲအမှန်။သူများအမှားကိုလက်ညိုးထိုးတယ်။သူများအပြစ်ကို အရသာခံပြီး ပြောတတ်တယ်။ရှိသင့်တဲ့မာနထက်ကျော်လွန်ပြီးထားရှိတဲ့တလွဲမာနကတော့နှိမ့်ချခြင်းနဲ့ အလဲထိုးနေရဦးမှာပဲ။ကျွန်တော့်အတွက်တော့နှိမ့်ချခြင်းပါရမီဟာကိုယ့်ကိုကိုယ်ချောင်ထိုးပြီးငါဟာအရေးမပါတဲ့လူပါလို့ ကြွေးကြော်တာမျိုးမဟုတ်ဘူး။ကိုယ်ပိုင်အရည်ချင်းအစွမ်းအစတွေကိုတန်ဖိုးမရှိပါဘူးဆိုပြီးအသုံးမချဘဲယုံကြည်မှုတွေပျောက်ဆုံးနေတာမျိုးလည်းမဟုတ်ဘူး။နှိမ့်ချခြင်းဟာမိမိရဲ့ အကောင်းတွေကိုအသိမှတ်ပြုပြီးအဲ့ဒီအကောင်းတန်ဖိုးတွေကိုပေးသနားတဲ့ဘုရားရှင်ကိုနေရာပေးကာအကျိုးရှိရှိအသုံးချနေထိုင်ခြင်းပါလို့ခံယူတယ်။စစ်မှန်တဲ့နှိမ့်ချခြင်းဆိုတာရှိတဲ့ပါရမီတွေကို မြင်အောင်မပြဘဲကရုဏာမေတ္တာပြဖို့လိုအပ်လာပြီဆိုမှတိတ်တဆိတ်လေး အသုံးပြုလိုက်ကြတာမျိုးလို့ နားလည်ပါတယ်။ထင်သာမြင်သာမရှိဘဲ၊ဘဝင်မာနတွေမကပ်ဘဲအများအတွက်၊ ဘုရားအတွက်အသုံးခံပေးဆပ်လိုက်တဲ့သူတွေဟာနှိမ့်ချခြင်းရှိတဲ့ကြီးမြတ်သူတွေပါလို့ အရိုးစင်းဆုံးယုံကြည်မိပါတယ်။ဓမ္မမိတ်ဆွေအပေါင်းတို့၊နှိမ့်ချခြင်းပါရမီကိုကျင့်ပြီး ရိုးရိုးကျင့်၊မြင့်မြင့်ကြံနိုင်ကြတဲ့မြင့်မြတ်တဲ့သူတွေဖြစ်ကြပါစေလို့ ဆုတောင်းပေးလိုက်ပါတယ်။
