 for web4.jpg)
 for web3a.jpg)
2023-11-05 07:40:02
6.11.2023 – 31th Week of Ordinary Time, Monday
၂၀၂၃ နိုဝင်ဘာလ (၆) ရက်၊ ၃၀ ကြိမ်မြောက် သာမန်ကာလ တနင်္လာနေ့
Luke 14:12-14, ရှင်လုကာ ၁၄း၁၂-၁၄
Reflection by Rev. Fr. Paschal Thi Ko Shin(SDB)
Posted by Sr. Benedetta Myat Hnin Nwe(ISR)
ယနေ့ခေတ်ကြီးကာလမှာ လူတွေကအလှူအတန်းလုပ်ကြတဲ့အခါထင်ပေါ်အောင်လုပ်လာကြတယ်။ကိုဗစ်ကာလမှာ တုန်းကလည်းလှူဒါန်းတဲ့ပုံတွေကိုဓါတ်ပုံရိုက်ကြ၊လူမှုကွန်ယက်မှာဖြန့်ဝေကြနဲ့ တော်တော်လေးကိုမျက်စိနောက်အောင်တွေ့ခဲ့ကြရတယ်။အလှူအတန်းလုပ်တဲ့အခါတချို့ကကြွားဝါလိုတဲ့စိတ်နဲ့လုပ်တယ်။တချို့က တစ်စုံတစ်ရာကိုမျှော်လင့်ပြီး ပြုလုပ်ကြတယ်။ကြွားချင်လုပ်တဲ့အလှူနဲ့ ပွားချင်လို့လုပ်တဲ့အလှူဘယ်အလှူမှမကောင်းပါဘူး။ စိတ်မထားတတ်ရင်အလှူက ကုသိုလ်မရဘဲငရဲရစေတဲ့အဖြစ်မျိုး။လိုင်းပေါ်မှာနာမည်ကြီးတဲ့အလှူပို့စ်လေးတစ်ခုတွေ့ရပါတယ်။လှူတဲ့ အမျိုးသမီးကြီးက မယ်သီလရှင်တွေကိုလှူပါတော့မယ်ရှင်၊သာဓုခေါ်ပါရှင်လို့ပြောပြောပြီးအလှူပေးရင်း ဗီဒီယိုလိုက်ဗ်လွင့်ပြီးတင်ပါတယ်။ နေပူထဲမှာမယ်သီလတွေကမျက်မှောင်တွေကျုံ့ပြီး အလှူရှင်ကိုစိတ်မရှည်စွာကြည့်နေကြရတယ်။ဒီဗီဒီယိုလေးတွေကို မြင်တဲ့အခါလှူတဲ့သူက ဘာကိုပြချင်တာလဲ။ကြွားချင်တာလား။ဂုဏ်ဖော်ချင်တာလား။ဘယ်လိုခေါင်းစဉ်တပ်ရမလဲ မသိ။တစ်ခါမှာ ဘုရားကျောင်းအုတ်တံတိုင်းအလှူရှင်တွေကိုကမ္ဗည်းထိုးပြီး ကျေးဇူးတင်အသိမှတ်ပြုတဲ့ဟာသလေးတစ်ခုဖတ်ဖူးပါတယ်။ပန်းရံဆရာတစ်ယောက်ကအုတ်တံတိုင်းအကွက်တွေကို နာမည်ထိုးပေးရတယ်။ဘယ်မြို့ ဘယ်ရပ်ကွက် ဘယ်မိသားစုကနေ လှူပါတယ် ဆိုပြီး အုတ်တံတိုင်းရဲ့ အကွက်တိုင်းမှာ ရေးထိုးရတယ်။ တစ်နေရာက အကွက်မှာကျ ဘာမှ မရေးထိုးထားလို့ ပန်းရံဆရာက ဒီအလှူရှင်ရဲ့ စေတနာကမွန်မြတ်လိုက်တာကြည့်စမ်းပါဦး၊သူနာမည်တောင်မရေးထိုးထားဘူးဆိုပြီးချီးမွမ်းစကားဆိုနေတုန်းမှာပဲ ရွှေတွဲလွဲနဲ့အမျိုးသမီးကြီးတစ်ဦးရောက်ချလာတယ်။ဒီအုတ်တံတိုင်း အကွက်ကို ကျွန်မလှူထားတာလေ၊သူများနဲ့မတူအောင်အကြီးကြီးရေးထိုးပေးပါဆရာဆိုပြီးကမ္ဗည်းထိုးခမုန့်ဖိုးကိုပိုပေးသွားပါလေရော။ဟုတ်တယ်။အလှူကို ဖော်ချင်တယ်။နာမည်ကိုပြချင်တယ်။ ဒါလည်းပဲသဘာဝလိုပဲဆိုရတော့မှာပဲလား။တချို့ကျပြန်တော့လည်း နာမည်တော့မဖော်ပါဘူး။ဒါပေမဲ့မျှော်လင့်ချက်တွေကပ်ပါတတ်တဲ့အလှူမျိုး။ ဒီလိုပေးကမ်းလိုက်ရင်ငါ့ကိုတစ်ချိန်ကျရင် ပြန်ကြည့်မှာပဲ။သူ့အလှည့်ကိုယ့်အလှည့်ပေါ့ကွာဆိုတဲ့အတွေးနဲ့တတ်နိုင်သူတွေကိုလှူတယ်။ပေးကမ်းရက်ရောတဲ့သဒ္ဓါတရားတွေကအဖြူထည်သက်သက်မဟုတ်ပြန်ဘူး။ခရစ်တော်ကဒီယနေ့ကျမ်းစာထဲမှာထမင်းကျွေးတဲ့အချိန်၊အလှူပေးတဲ့အချိန်တွေမှာမိတ်ဆွေသူငယ်ချင်းရောင်းရင်းတွေကိုပဲမဖိတ်နဲ့၊ကိုယ့်ကို ပြန်ပြီးကျေးဇူးမပြုနိုင်တဲ့သူတွေကိုပေးပါ။မျှော်လင့်ချက်တွေမထားဘဲဖြူစင်စွာ ပေးကမ်းမျှဝေဖို့ တရားပေးထားတယ်။ပြန်ပြီးပေးမယ့်သူကကိုယ်ပေးလိုက်တဲ့သူတွေက ပေးမှာမဟုတ်ဘူး။ဘုရားရှင်ကကိုယ်ရက်ရောတဲ့အတိုင်းပြန်လည်ပေးဝေပါတယ်။ရှိသမျှကိုယ့်အဖို့၊ သိမ်းကြုံးထည့်ကာမရက်ရောတဲ့ပေးဆပ်ခြင်းမျိုးဘုရားမကြိုက်ပါဘူး။လိုတဲ့နေရာကိုမဖို့ဘဲမလိုတဲ့နေရာကိုဖြည့်ချင်တဲ့လူ့သဘောကိုခရစ်တော်ကမီးမောင်းထိုးပြထားတယ်။ဆင်ခြင်ပြီးတရားသတိနဲ့ လိုနေသူတွေကိုစိတ်ထားသန့်သန့်လေးနဲ့သာပေးဝေနိုင်ဖို့ကြိုးစားအားထုတ်ကြပါစို့။
