 for web4.jpg)
 for web3a.jpg)
2023-11-21 03:57:39
33rd Week in Ordinary Time, Wednesday. St Cecilia
22.11.2023 - ၂၀၂၃ နိုဝင်ဘာလ (၂၂) ရက်၊ ၃၃ ကြိမ်မြောက် သာမန်ကာလ ဗုဒ္ဓဟူးနေ့
Luke 19: 11-28 - ရှင်လုကာ ၁၉း၁၁-၂၈
Reflection by Rev. Fr. Paschal Thi Ko Shin သီကိုရှင်း (SDB)
Posted by Sr. Benedetta Myat Hnin Nwe(ISR)
စာရင်းရှင်းမယ့်နေ့
လာမယ့်တနင်္ဂနွေမှာ ခရစ်တော်ဘုရင်ပွဲနေ့ကြီးကိုကျွန်ုပ်တို့တွေ ကျင်းပကြတော့မယ်။ ခရစ်တော်ဘုရားကဘုရင်တကာတို့ရဲ့ဘုရင်ဖြစ်တယ်။ ဒီဘုရင်ကဒုတိယအကြိမ်ဘုန်းဂုဏ်တော်နဲ့ပြန်လည်ကြွလာဦးမယ်။ အဲ့ဒီအခါကျရင်တော့ဘုရင်ရဲ့ရှေ့မှာ အားလုံးဟာအစီရင်ခံရမယ်။ ဒုတိယအကြိမ်ကြွလာခြင်းမတိုင်မီကျွန်ုပ်တို့ဘဝအသက်တာကိုဘယ်လိုပြင်ဆင်နေထိုင်ရမလဲဆိုတာကို ဒီယနေ့ကျမ်းစာမှာထောက်ရှုရပါတယ်။ဘုရားကသူ့ရဲ့နိုင်ငံတော်နဲ့ပတ်သက်ပြီးလုပ်ဆောင်ဖို့ လိုအပ်တဲ့အရာတွေပေးထားတယ်။ ငွေကြေး၊အရည်အချင်း၊အစွမ်းအစပါရမီအားလုံးကိုပေးပြီးပြန်လာမယ့်တစ်နေ့မှာသူပေးတဲ့ ဒီအရာတွေကိုကိုယ်ဘယ်လိုသုံးလိုက်လဲဆိုတာဖြေရမယ့်တစ်နေ့ရောက်လာမယ်။ဘုရားသခင်ကလူတွေကိုရက်ရောစွာနဲ့ ကျေးဇူးတော်တွေချပေးတယ်။နေ့ရက်တိုင်းက ဘုရားပေးတဲ့ တန်ဖိုးကြီးရွှေတုံးတစ်တုံးနဲ့တူတယ်။ တစ်နှစ်နေရရင်အဲ့ဒီလူတစ်ယောက်မှာ ရွှေတုံး ၃၆၅ တုံးရရှိပိုင်ဆိုင်ထားပါတယ်။ တစ်ရက်တာကိုကောင်းကောင်းမနေတဲ့သူဟာ ကိုယ်ပိုင်ထားတဲ့ ရွှေတုံးကိုဖြုန်းတီးသူနဲ့တူတယ်။ ဘုရားကရက်တိုင်း ရွှေတုံးတွေပေးပေမဲ့ လူက တန်ုဖိုးကိုမသိ။ ကောင်းကောင်းအသုံးမချဘဲ ဖြုန်းတီးလိုက်တာကို ဘုရားသခင်အလိုမရှိပါဘူး။ ဘုရားက သူပေးတဲ့အရာကို တန်ဖိုးထားအသုံးချပြီး ပွားများစေချင်တယ်။ တန်ဖိုးနားမလည် ဆိုးမိုက်တဲ့သူကမပွားတဲ့အပြင် ရှိတဲ့အရာကိုမြေကြီးထဲမှာဖွက်ထားတယ်။ သူပေးတဲ့အကြောင်းပြချက်ကဒီ ဘုရင်ကမစိုက်ပျိုးတဲ့နေရာမှာရိတ်လို့ ကြောက်တဲ့အတွက်သိမ်းထားတယ်။ဘုရားကိုကြောက်စရာလို့မြင်တယ်။ ကောင်းမြတ်တဲ့သူရက်ရောတဲ့ သူလို့မမြင်ဘဲခတ်ထန်မာကြောတဲ့ဘုရားလို့ ကင်ပွန်းတပ်လိုက်တဲ့အခါ အစွမ်းအစတွေသေသွားတယ်။ကြောက်စိတ်က အောင်မြင်မှုအတွက်အဟန့်အတားဖြစ်တယ်။ ပန်းတိုင် ဆိုတာလျှောက်နေတဲ့သူတွေအတွက်ပါ။ လဲကျမှာကြောက်လို့ ရပ်တန့်နေသူတွေအတွက်မဟုတ်ဘူး။ဘုရားပေးကျေးဇူးတော်ဆိုတာလူ့ရဲ့ကြိုးစားအားထုတ်မှုနဲ့တည်ဆောက်ရတာပါ။ဘုရားကျေးဇူးနဲ့လူ့အားထုတ်မှုပေါင်းလိုက်တဲ့အခါပါရမီဆိုတာဖြစ်လာတယ်။ကြိုးစားလေလေ တိုးလာလေလေသဘောရှိတယ်။မကြိုးစားဘူး။အသုံးမပြုဘူးဆိုရင်ရှိထားတဲ့ကျေးဇူးသေးသေးလေးတောင်ပြန်လည်ပျောက်ကွယ်သွားတတ်တယ်။ဒါကြောင့်ခရစ်တော်ကရှိသောသူအား ထပ်မံ၍ ပေးဦးမည်။ မရှိသောသူထံမှသူ၌ရှိသမျှကိုပင်သိမ်းယူလိမ့်မည်။ ဒီကျမ်းစကားကိုကြားတဲ့အခါ အစကတစ်မျိုးတွေးမိတယ်။ မရှိပါဘူးဆိုမှထပ်ယူသွားတယ်။ ပိုလျှံနေတဲ့သူကျထပ်ပေးတယ်။ဘယ် လိုလဲပေါ့။ သေချာထောက်ရှုကြည့်တော့ဘုရားသခင် မှန်တယ်။ အားလုံးကိုအခွင့်ရေးပေးခဲ့တာပဲ။ တန်ဖိုးထားတဲ့သူကရှိတဲ့အရာလေးနဲ့ ကြိုးစားတယ်။ သစ္စာရှိတယ်။ ယုံကြည်ရတယ်။ ချစ်တတ်တဲ့နှလုံးသားရှိတယ်။ တန်ဖိုးမသိတဲ့သူက အားမစိုက်ဘူး။ ပျင်းတယ်။ လိမ်ညာလှည့်ဖြားတယ်။ ကြောက်စိတ်တွေနဲ့ ပြည့်တယ်။ နောက်ဆုံးအချိန်ခရစ်တော်ပြန်လာတဲ့အခါ ကျွန်ုပ်တို့အားလုံးစာရင်းရှင်းရမယ်။ ကိုယ်ဟာဘုရားကျေးဇူးတော်ကိုတန်ဖိုးထားပြီး တိုးပွားစေသလား။ ဒါမှမဟုတ်တန်ဖိုးမသိပျင်းရိပြီး ဖြုန်းတီးနေလား။ဘယ်လိုစာရင်းရှင်းကြမလဲ။
