 for web4.jpg)
 for web3a.jpg)
2023-11-25 06:10:06
Solemnity Christ the King ,ခရစ္စတူးဘုရင်ပွဲနေ့ကြီး
26.11.2023 - ၂၀၂၃ နိုဝင်ဘာလ (၂၆) ရက်၊
Matthew 25:31-46 - ရှင်မာတေးဦး ၂၅: ၃၁-၄၆
Reflection by Rev. Fr. Paschal Thi Ko Shin သီကိုရှင်း (SDB)
Posted by Sr. Benedetta Myat Hnin Nwe(ISR)
တစ်ပတ်တနင်္ဂနွေနေ့ဟာဝတ်ပြုကိုးကွယ်ခြင်းနှစ်ရဲ့ နောက်ဆုံးတနင်္ဂနွေနေ့ဖြစ်သလို၊ခရစ္စတူးဘုရင်ပွဲနေ့ကြီးလည်းဖြစ်ပါတယ်။ဒီဝတ်ပြုကိုးကွယ်ခြင်းနှစ်က အဆုံးသတ်ပါပြီ။ဒီနေ့ကျင်းပတဲ့ခရစ္စတူးဘုရင်ပွဲနေ့ကို ပုပ်ရဟန်းမင်းကြီး ၁၁ကြိမ်မြောက်ပီဦး အရှင်သူမြတ်က နိုင်ဆီးညီလာခံကောင်စီ ၁၆ ရာစုပြည့် ဂျူဗီလီနှစ်အဖြစ်၁၉၂၅ ခုနှစ်ကနေစတင်ကျင်းပလာခဲ့ပါတယ်။ခရစ်တော်သခင်ဟာ ဘုရင်တကာတို့ရဲ့ ဘုရင်ဖြစ်ပါတယ်။ ခရစ်တော်ကိုယုံကြည်တဲ့ကျွန်ုပ်တို့တွေဟာ ခရစ်တော်ရဲ့အုပ်ချုပ်စိုးမိုးခြင်းကိုခံယူရမယ့် နိုင်ငံသားတွေဖြစ်ပါတယ်။ဘုရားသခင်သာလျှင်တစ်ဦးတည်းသောဘုရင်ဖြစ်ပါတယ်။ ဒါကြောင့် မိမိရွေးကောက်ထားတဲ့အီစရာအဲလ်လူမျိုးတွေကိုလောကီဘုရင်မပေးလိုဘဲဘုရားသခင်သာဘုရင်အဖြစ်အုပ်စိုးဖို့ အလိုတော်ရှိခဲ့ပါတယ်။ ဒါပေမဲ့လည်းအီစရာအဲလူမျိုးတွေက လောကီဘုရင်ကိုတောင်းကြတယ်။ သူတို့ရဲ့တောင်းဆိုမှုကို လိုက်လျောပြီး လောကီဘုရင်ကို ရွေးကောက်ပေးခဲ့ပါတယ်။ ဒီလောကီဘုရင်တွေဟာ သစ္စာမရှိကြ ဘူး။ ဖောက်ပြန်ကြတယ်။ မပြည့်စုံကြဘူး။ မိမိရဲ့လက်အောက်ငယ်သားတွေအပေါ် မေတ္တာနဲ့တရားမျှတစွာမအုပ်ချုပ်ကြဘူး။ အဲ့ဒီတော့ဘုရားသခင်ကသူ့လူမျိုးတွေကိုသူကိုယ်တိုင်ပဲ ပြန်လည်အုပ်ချုပ်ချင်ခဲ့တယ်။ပထမကျမ်းစာမှာကြားနာရသလိုပဲ သိုးထိန်းကသိုးတွေကို စောင့်ရှောက်ထိန်းသိမ်းသကဲ့သို့ငါကိုယ်တိုင်ငါ့သိုးတွေကိုပြုစုစောင့်ရှောက်မယ်လို့မိန့်တော်မူခဲ့ပါတယ်။ဘုရားရှင်ကအုပ်စိုးမှုမှာ ကျွန်ုပ်တို့ဘဝဟာလုံခြုံစိတ်ချနိုင်ပါတယ်။ဘုရားရှင်ကိုဘုရင်အဖြစ်လက်ခံပြီးအုပ်စိုးခွင့်ပြုရပါမယ်။ဘုရားရှင်ရဲ့အုပ်စိုးခြင်းဟာလောကီအာဏာစက်နဲ့အုပ်ချုပ်ခြင်းမျိုးမဟုတ်ဘဲ ကောင်းကင်တန်ခိုးနဲ့ အုပ်ချုပ်မှာ ဖြစ်ပါတယ်။ ခရစ်တော်ဘုရားရှင်ဟာ သူများနဲ့မတူ ထူးခြားတဲ့ ရှင်ဘုရင်တစ်ပါးဖြစ်ပါတယ်။ ရှင်ဘုရင်လို့ပြော ရင် ဘုရင်ရဲ့အဆောင်အယောင်တွေလည်း ရှိရပါမယ်။ခရစ်တော်ဘုရားရဲ့ပလ္လင်တော်ကလက်ဝါးကားတိုင်ကြီးဖြစ်တယ်။သူ့ရဲ့သရဖူကကျောက်မျက်ရတနာတွေနဲ့စီခြယ်ထားတာမဟုတ်ဘဲဆူးဗောင်းတွေနဲ့ ရစ်ခွေထားတာဖြစ်တယ်။သူ့ရဲ့သန်လျက်ကတော့ လက်ဖဝါးထဲက သံမကြီးတွေပဲဖြစ်တယ်။ ဒီလိုမျိုးလက္ခဏာတွေရှိတဲ့ ဘုရင်ရဲ့ အုပ်စိုးခြင်းကို ခံယူမယ် ဆိုရင် ကျွန်ုပ်တို့လည်း သူ့အတိုင်း လိုက်ကျင့်ရပါမယ်။ သူပြောတဲ့စကားကို နာခံရပါမယ်။ ငါ့နောက်သို့လိုက်လိုလျှင် မိမိလက်ဝါးကားတိုင်ကိုထမ်း၍လိုက်လျှောက်ရမယ်လို့မှာကြားခဲ့ပါတယ်။ ဒီဘုရင်ရဲ့နိုင်ငံတော်မှာကျင့်သုံးတဲ့ ဥပဒေကတစ်ခုထဲပဲရှိတယ်။အဲ့ဒါကမေတ္တာပညတ်တော်ပါပဲ။ဒီပညတ်တော်ကို လိုက်ကျင့်လား။ချိုးဖောက်လားဆိုတာကိုတစ်ရက်ကျရင်စီရင်ဆုံးဖြတ်ခြင်းခံရမှာပါ။ခရစ်တော်ဘုရင်ဟာ ချစ်ခြင်းမေတ္တာရှင်ဖြစ်ပါတယ်။တရာမျှတပြီးကရုဏာနဲ့ပြည့်စုံတဲ့ရှင်ဘုရင်ဖြစ်ပါတယ်။ ခရစ်တော်ဘုရားကိုကျွန်ုပ်တို့ရဲ့ဘုရင်အဖြစ်သတ်မှတ်ခံယူတယ်ဆိုရင်ဒီဘုရင်ရဲ့သြဇာကိုနာခံရမယ်။ ဒီဘုရင်ကိုအုပ်စိုးခွင့်ပြုရပါမယ်။ကျွန်ုပ်တို့ဘဝကိုဘယ်အရာတွေကအုပ်စိုးမင်းမူနေလဲဆိုတာ ပြန်လည်ထောက်ရှုရင်းစစ်မှန်ပြီးတရားမျှတတဲ့မေတ္တာဘုရင်ရဲ့အုပ်စိုးခြင်းအောက်မှာမိမိတို့ဘဝအသက်တာကိုထားရှိပြီးလျှောက်လှမ်းနိုင်ပါစေလို့ဆုတောင်းပေးလိုက်ပါတယ်။
