 for web4.jpg)
 for web3a.jpg)
2021-12-16 07:03:22
လာတင်း ဘာသာစကားက ဆင်းသက်လာတဲ့ စကားလုံးဖြစ်တဲ့ နာတာလူး (မွေးဖွားခြင်း) ပွဲတော်အတွက် စတင်ပြင်ဆင်ခဲ့ကြတာ လွန်ခဲ့တဲ့ နိုဝင်ဘာလ (၂၈)ရက် အာဒ်ဝင်တူး ပထမ တနင်္ဂနွေနေ့ ကတည်းက ဖြစ်ပါတယ်။ ဒီနေ့မှာ နာတာလူး ပွဲတော်ကို ကြိုတင်ပြင်ဆင်တဲ့ နိုဗီနားရဲ့ ပထမနေ့လည်း ဖြစ်ပါတယ်။ ဒီနေ့မှာ ကြားနာရတဲ့ နှုတ်ကပါတ်တော်က သခင်ယေဇူးရဲ့ ဆွေစဉ်မျိုးဆက် အကြောင်းကို ဖော်ပြထားပါတယ်။ အာဗြံဟံကနေ ဒါဝိတ်မင်းကြီးအထိ ဆွေစဉ်မျိုးဆက် (၁၄)ဆက်၊ ဒါဝိတ်မင်းကြီးကနေ အီစရာအဲလ် လူမျိုးတွေ ဘာဘီလွန်ပြည်ကို စစ်သုံ့ပန်း အနေနဲ့ ဖမ်းဆီး ခံရတဲ့အထိ ဆွေစဉ်မျိုးဆက်၊ ဘာဘီလွန်ပြည် စစ်သုံ့ပန်း အချိန်ကနေ သခင်ခရစ်တော်အထိ ဆွေစဉ်မျိုးဆက် (၁၄)ဆက် စုစုပေါင်း ဆွေစဉ်မျိုးဆက် (၄၂)ဆက် ရှိပါတယ်။ ဒီနေ့ကစပြီး ခရစ္စမတ်အထိ ကြားနာရမယ့် ဧဝံဂေလိကျမ်းတွေမှာ သခင်ယေဇူးရဲ့ ဆွေစဉ်မျိုးဆက် အကြောင်း မယ်တော်ကို ကောင်းကင်တမန်က အမိန့်တော် ပြန်တဲ့အကြောင်း၊ မယ်တော်မာရီးယား သံတာ ဧလိဇဘက်ထံ အကြည့်အရှု သွားတဲ့အကြောင်း၊ ယောဟန်ဘတ္တိဇံ မွေးဖွားမယ့် အကြောင်း၊ ဇာခရိကို ကောင်းကင် တမန်တော်က အမိန့်တော် ပြန်တဲ့အကြောင်း၊ သံယောဟန် ဘတ္တိဇံ မွေးဖွားတဲ့ အကြောင်းတွေသာ ကြားနာ ထောက်ရှုရမှာ ဖြစ်ပါတယ်။ Gospels of the infancy သခင်ယေဇူးရဲ့ ကလေးဘဝ ဧဝံဂေလိကျမ်းများလို့ ခေါ်ဆိုထားပါတယ်။ လူ့အသိုင်းအဝိုင်းမှာ ဆွေမျိုး အသိုင်းအဝိုင်းဟာ အရေးကြီးပါတယ်။ ဘုရင်တကာတို့ရဲ့ဘုရင် သခင်ယေဇူးဟာ ဒါဝိတ်မင်းကြီးရဲ့ အမျိုးအနွယ်ဝင် ဖြစ်ပါတယ်။ ကိုယ်တော်ရှင် ကယ်တင်ခြင်း သတင်းကောင်း ဟောပြောတဲ့ ခရီးစဉ်တချို့မှာ နာမကျန်း ဖြစ်နေတဲ့ သူတွေက “ဒါဝိတ်၏သားတော် ကျွန်ုပ်ကို သနားတော်မူပါ”လို့ အော်ဟစ် တောင်းပန်ကြတယ်။ ဒါဝိတ်ရဲ့ သားတော်ဟာ အချစ်မှာ တန်ခိုးအာဏာ ကြီးမားခဲ့ပြီး စစ်ရေးမှာ အရှုံးခံခဲ့ပါတယ်။ အချစ်ရဲ့ ဘုရင်ဟာ လက်ဝါးကပ်တိုင်ပေါ်မှာ အသေခံခဲ့ပါတယ်။ သားတော်ဘုရားဟာ လူ့အဖြစ်ကို ယူခြင်းအားဖြင့် လူတွေကို ကယ်တင်ရန် ကောင်းကင်မှ ဆင်းကြွလာခဲ့ပါတယ်။ သူငယ်တော်ယေဇူးလေး ယူဆောင်လာမယ့် ချစ်ခြင်း၊ ငြိမ်းချမ်းခြင်းကို အပြည့်အဝ လက်ခံရရှိဖို့ ကျွန်ုပ်တို့ရဲ့ နှလုံးသား တံခါးကို ဖွင့်ထားကြပါစို့။
“ရှေးဟောင်း တံခါးတို့ ဘုန်းကြီးတော်မူသော ဘုရင် ကြွဝင်နိုင်ရန် ဖွင့်ပေးကြလော့။ ကောင်းကင်ဗိုလ်ခြေတို့၏ အရှင်ထာဝရ ဘုရားသခင် ဖြစ်တော်မူ၏။ ကိုယ်တော်သည် ဘုန်းကြီးတော်မူသော ဘုရင် ဖြစ်တော်မူ၏။” (ဆာလံကျမ်း ၂၄)
#Sr. Maria Teresa Than Maung (MSJP II)
