 for web4.jpg)
 for web3a.jpg)
2021-12-17 07:33:51
အာဒ်ဝင်တူးကာလ တစ်လျှောက်လုံးမှာ ပထမဆုံးအကြိမ် သံဇူဇယ် (ဝါ) စိန့်ဂျိုးဇက် အကြောင်းကို ပထမဦးဆုံးအကြိမ် နှုတ်ကပတ်တော်မှာ ကြားနာရခြင်း ဖြစ်ပါတယ်။ အာဗြံဟံ၏သား အီဇက်မှ ဒါဝိတ်မင်းကြီးအထိ၊ ဒါဝိတ်မင်းကြီးမှ ယာကုတ်၏သား ဂျိုးဇက်အထိ ကယ်တင်ခြင်း သမိုင်းကို တွေ့ရပါတယ်။ ခရစ်တော်၏ မယ်တော်ဖြစ်တဲ့ မာရီယားမှာ ဂျိုးဇက်နှင့် စေ့စပ်ထားပါတယ်။ အတူမနေသေးပေမယ့် ဝိညာဉ်တော်မြတ်ဖြင့် ပဋိသန္ဓေ စွဲနေတာကို တွေ့ရတယ်။ ဂျိုးဇက်က ဖြောင့်မတ်တဲ့သူ ဖြစ်တဲ့အတွက်ကြောင့် မာရီယား အရှက်တကွဲ မဖြစ်စေချင်၍ တိတ်တဆိတ် စွန့်ခွာမည် ရည်ရွယ်တယ်။ ထို့နောက် ကောင်းကင်တမန်က ဂျိုးဇက်ကို အိပ်မက်ထဲ ထင်ရှားပြပြီး မာရီယားကို ထိန်းသိမ်း စောင့်ရှောက်ရန် မကြောက်နဲ့။ ဝိညာဉ်တော်ဖြင့် ပဋိသန္ဓေစွဲတာ ဖြစ်ပါတယ်။ သားယောက်ျား ဖွားမြင်မယ်။ ယေဇူးလို့ ခေါ်ရမယ်ဆိုပြီး ဗျာဒိတ်ပေးလာပါတယ်။ ဗျာဒိတ်တော်အားဖြင့် “ဧမာနူအဲလ်” “ကျွန်ုပ်တို့နှင့် အတူရှိသောဘုရား” ဟု အဓိပ္ပါယ် ရပါတယ်။ ဂျိုးဇက်ကလည်း အိပ်ပျော်ရာမှ နိုးလာသောအခါ ကောင်းကင် တမန်တော် မိန့်မှာတဲ့အတိုင်း မယ်တော်ကို ပြုစုစောင့်ရှောက်တယ်။ ဒီအချက်တွေကို ကြည့်ခြင်းဖြင့် ဂျိုးဇက်ရဲ့ သစ္စာတည်ကြည်ခြင်း၊ ဖြောင့်မတ်ခြင်းကို ထင်ရှားစွာ မြင်နိုင်ပါတယ်။ စကားတစ်ခွန်းမှ မပြောပေမယ့် စိန့်ဂျိုးဇက်ဟာ ဘုရားသခင်၏ စကားကို မြေဝယ်မကျ နားထောင်ပါတယ်။ စိန့်ဂျိုးဇက်က ကျွန်ုပ်တို့ မှီခိုအားကိုးရာ ဖခင်ဖြစ်ပါတယ်။ မယ်တော်က ကျွန်ုပ်တို့ မှီခိုအားထားရာ မိခင်ဖြစ်ပါတယ်။ ယေဇူးက ကျွန်ုပ်တို့နှင့်အတူ အမြဲရှိသောဘုရား ဖြစ်ပါတယ်။ ကျွန်ုပ်တို့ နှလုံးသားမှာ ခရစ်တော် ဖွားမြင်လာနိုင်ဖို့ အားရဝမ်းသာစွာ ကြိုဆိုကြမယ်။ ကမ္ဘာတစ်ဝှမ်းလုံး အလင်းရောင်ခြည် ဝေဖြာသော နေ့တစ်နေ့ ဖြစ်နိုင်ဖို့ ဆုမွန်ကောင်း တောင်းကြပါစို့။
“ငါ့ကို အကြံပေးတော်မူသော ထာဝရဘုရားသခင်ကို ငါကောင်းချီးပေးပါ၏။ ညဉ့်အခါ၌လည်း ငါ၏နှလုံးသားသည် ငါ့ကိုလမ်းညွှန်လျက်ရှိ၏။” (ဆာလံကျမ်း ၁၆)
#Sr. Maria Teresa Than Maung (MSJP II)
