 for web4.jpg)
 for web3a.jpg)
2021-12-23 07:01:20
ကျွန်ုပ်တို့ အမျှော်လင့်ကြီး မျှော်လင့်ခဲ့တဲ့ ညသန်းခေါင်ယံ ရောက်လာပါပြီ။ ဒီညမရောက်ခင် ဝိညာဉ်ရေးဆိုင်ရာ ပြင်ဆင်မှုတွေ၊ အပြင်ပန်း ပြင်ဆင်မှုတွေ၊ မီးရှူးမီးပန်းတွေ၊ သူငယ်တော် အိမ်လေးတွေ အခုမှ အဓိပ္ပါယ် ပြည့်စုံမှာဖြစ်တယ်။ ဂျိုးဇက်နဲ့ ပဋိသန္ဓေ အရင့်အမာရှိနေတဲ့ ကညာစင် မာရီယားတို့ဟာ နာဇရက်မြို့ကနေ ထွက်ခွာကြပြီး ဒါဝိတ်မင်းရဲ့ မြို့တော် ဘက်သလင်ဟင်မြို့ကို သန်းခေါင်စာရင်းပေးဖို့ ရောက်ရှိလာကြပါတယ်။ တည်းခိုခန်းတွေမှာ သူတို့အတွက် နေရာမရှိလို့ နေ့စေ့ရက်စေ့ ဖြစ်နေတဲ့ ကညာမယ်တော်မာရီယားဟာ နွားတင်ကုပ် တစ်ခုထဲမှာ သူငယ်တော်လေးကို ဖွားမြင်ခဲ့ပါတယ်။ စိတ်နှလုံးသား မောက်မာတဲ့ သူတွေက ကြီးမားတဲ့ အဖြစ်အပျက်ကို မသိလိုက်ကြပါဘူး။ ကောင်းကင် နက္ခတ်တာရာတွေနဲ့ ကောင်းကင်တမန်တော်တွေ ဒါဝိတ်အမျိုးအနွယ် ကယ်တင်ရှင် မွေးဖွားလာလို့ အလုပ်ရှုပ်နေကြတယ်။ ပျော်ရွှင် မြူးထူး နေကြတယ်။ သိုးထိန်းတွေလည်း ကောင်းကင်တမန်တော်တွေရဲ့ သတင်းစကားအတိုင်း အပြေးအလွှားနဲ့ နွားစားခွက်မှာ ဖွားမြင်တဲ့ သူငယ်တော်ကို သွားရောက်ဖူးမျှော်ကြတယ်။ မင်္ဂလာရှိတဲ့ည၊ ပျော်ဖို့ကောင်းတဲ့ည၊ ချစ်ခြင်း၊ ငြိမ်သက်ခြင်းနဲ့ ပြည့်တဲ့ည ဖြစ်ပါတယ်။ ခရစ္စမတ်မှာ ကျွန်ုပ်တို့ သီဆိုနေတဲ့သီချင်းတွေ၊ ကြားရတဲ့ သီချင်းတွေက အဓိပ္ပါယ် ရှိလွန်းလို့ သီအိုလော်ဂျီ (ဓမ္မသင်္ဂြိုလ်) အတွေးတွေတောင် မလိုအပ်ပါဘူး။
“ဆိတ်ငြိမ်တဲ့ ညချမ်းလေးမှာ ကြယ်တာရာ
လမ်းမမြင်တဲ့ လူသားများကို ညွှန်နေသလို
အမှောင်ကမ္ဘာရယ် ကွယ်ပျောက်ပြီ။
-------
နှလုံးသားလေးတွေ ဖွင့်ထားစို့၊
သားတော်ဘုရား ခိုနားဖို့လေ
ငြိမ်းချမ်းရေးကို သူပေးမလို့
ကြွလာပြီ မက်ဆီးယားရှင်။”
သမ္မာကျမ်းစာ တစ်အုပ်လုံးမှာ “မက်ဆီးယား” ဆိုတဲ့ အမည်ကို (၃၈)ကြိမ် တိုင်တိုင် သုံးနှုန်းထားတာ တွေ့နိုင်ပါတယ်။ အထူးသဖြင့် ဆာလံကျမ်းတွေနဲ့ ဓမ္မရာဇဝင် ကျမ်းတွေမှာ အသုံးများတာ တွေ့ရပါတယ်။ ဒီစကားလုံးကို ဘုရင်တွေအတွက် ရည်ညွန်းပြီး သုံးတာ တွေ့ရပါတယ်။ ဒီစကားလုံးရဲ့ အဓိပ္ပါယ် အရင်းအမြစ်က “ဆီနှင့်လိမ်းထားခြင်း ခံရသူ” ဖြစ်ပါတယ်။ အီစရာအဲလ် လူမျိုးတွေကို ဘိသိတ်ပေးတဲ့အခါ ဦးခေါင်းပေါ်ကို ဆီနဲ့ လောင်းပါတယ်။ “ဘုရားကို ဆက်ကပ်ထားသူ” လို့လည်း အဓိပ္ပါယ် ရပါတယ်။ သခင်ခရစ်တော်ဟာ ကယ်တင်ရှင် မက်ဆီးယားရှင် ဖြစ်ပါတယ်။ အပြစ်တွေ ဖုံးလွှမ်းနေတဲ့ အမှောင်ကမ္ဘာကို အလင်းပေးဖို့၊ ကယ်တင်ရှင် ကြွလာပါပြီ။ ဒီလို ငြိမ်းချမ်းတဲ့ညမှာ သူငယ်တော် အိမ်လေးကို ငေးမောဖူးမျှော်ရင်း ဒီခေတ်အခါမှာ အထူးသဖြင့် အမိမြန်မာပြည်မှာ တည်းခိုစရာ နေအိမ် ပျောက်သွားတဲ့ မိသားစုတွေ၊ တောအုပ်ထဲမှာ တဲဖျင်နဲ့ နေရတဲ့ ကလေးသူငယ်တွေ၊ သက်ကြီးရွယ်အိုတွေ၊ အမျိုးသမီးတွေကို သတိရပြီး သူတို့အတွက် လက်ဆောင် တစ်ခုခု ပေးကြပါစို့လား။ သူငယ်တော် ယေဇူးလေးကို မွေးနေ့လက်ဆောင် ပေးတာနဲ့ အတူတူ ဖြစ်ပါတယ်။
“အမြင့်ဆုံးသောအရပ်၌ ဘုရားသခင်အား ဘုန်းတော်၊ ဂုဏ်တော် ရှိစေသတည်း။ မြေကြီးပေါ်၌လည်း စိတ်ကောင်း၊ နှလုံးကောင်း ရှိသူတို့အား ငြိမ်သက်ခြင်း ရှိစေသတည်း။” (ရှင်လုကာ ၂း ၁၄)
#Sr. Maria Teresa Than Maung (MSJP II)
