 for web4.jpg)
 for web3a.jpg)
2021-12-28 07:53:45
ဒီကနေ့ ဧဝံဂေလိကျမ်းမှာ သူငယ်တော်ကို ဗိမ္မာန်တော်၌ ပူဇော်အပ်နှံခြင်းအကြောင်း ကြားနာ ထောက်ရှုရမှာ ဖြစ်ပါတယ်။ ဒီကျမ်းပိုဒ်ကို ဖေဖော်ဝါရီလ (၂)ရက်နေ့ “သူငယ်တော် ယေဇူးအား ကျောင်းဗိမ္မာန်တော်၌ ပူဇော်အပ်နှံခြင်း” ပွဲမှာ ကြားနာရပါတယ်။ မိုးဇယ်ရဲ့ ဥပဒေတွေအရ သားဦး ယောက်ျားလေး မွေးဖွားတဲ့ အမျိုးသမီးဟာ ရက်(၄၀)ပြည့်တဲ့အခါ ကျောင်းဗိမ္မာန်မှာ စင်ကြယ်ခြင်း ဝိနည်းနဲ့အတူ သိုးတစ်ကောင်နဲ့ ချိုးငှက်တစ်ကောင် (သို့မဟုတ်) ချိုးငှက်နှစ်ကောင်ကို ဘုရားသခင်အား ပူဇော်ရပါတယ်။ သမီးဦးမွေးရင် (၈၀)အကြာမှာ ဒီဝိနည်းအတိုင်း ဆောင်ရွက်ရမှာ ဖြစ်ပါတယ်။ (ဝတ်ပြုရာကျမ်း ၁၂း ၁ - ၈) အမိမယ်တော်နဲ့ အဘသံဇူဇယ်တို့ဟာ မိုးဇယ်ရဲ့ တရားကျမ်းအတိုင်း ပြုမူဖို့ ဗိမ္မာန်တော်ကို လာကြပါတယ်။ သူငယ်တော်လေးရဲ့ မိခင်ကို သန့်ရှင်းစင်ကြယ်ခြင်း ထုံးစံရှိသကဲ့သို့ ကျောင်းတော်ကို လာကြတာထက် ဘုရားသခင်ရဲ့ သားတော်ဟာ ဗိမ္မာန်တော်ထဲမှာ ကြွဝင်တော်မူလာပါပြီ။ တစ်ချိန်တုန်းက ဒီပွဲကို တွေ့ဆုံခြင်းပွဲလို့လည်း အမည်ပေးထားပါတယ်။ သခင်ယေဇူးနဲ့ ပရောဖက် စီမေအွန်တို့ တွေ့ဆုံခြင်း၊ ပရောဖက်မ အန္နာနဲ့ တွေ့ဆုံခြင်း ဖြစ်ပါတယ်။ ဓမ္မဟောင်းကျမ်းတို့ရဲ့ ပြည့်စုံခြင်းအချိန် ရောက်ရှိလာပါပြီ။ အီစရာအဲလ် လူမျိုးတွေအတွက် မျှော်လင့်စောင့်စား နေတဲ့သူဖြစ်တယ်။ အီစရာအဲလ်လူမျိုးတို့ ပြုသင့်တဲ့ ဝတ္တရားများကို ယုံကြည်ခြင်း၊ နာခံခြင်းနဲ့ မယ်တော်နဲ့ သံဇူဇယ်တို့ ပြုကျင့်ကြပါတယ်။ ဘုရားဝတ်ပြုဖို့ မပျက်ကွက်ကြဘူး။ “သူငယ်တော်၏ ဖခင်နှင့် မိခင်တို့သည်လည်း ကိုယ်တော်၏ အကြောင်းနှင့် ပတ်သက်၍ ပြောဆိုသော စကားတို့ကို အံ့ဩကြ၏” လို့ ဖော်ပြထားပါတယ်။ မယ်တော်နဲ့ အဘသံဇူဇယ်ကဲ့သို့ ပညတ်တော်များကို စောင့်ထိန်းဖို့ လိုအပ်ပါတယ်။ ဘဝမှာ ဘုရားကို နံပါတ်တစ်နေရာ ထားနိုင်ဖို့ ကြိုးစားရပါမယ်။ မယ်တော်ဟာ သူငယ်တော်လေးကို သူ့လက်နဲ့ အဘခမည်းတော် ဘုရားထံ ပူဇော်သလို ကျွန်ုပ်တို့ရဲ့ ဘဝတွေကိုလည်း မယ်တော်လက်ထဲ အပ်နှံကြပါစို့။
“အကြောင်းမူကား အကျွန်ုပ်တို့၏ မျက်စေ့များသည် ကိုယ်တော်၏ ကယ်တင်ခြင်းကို ဖူးမြင်ရလေပြီ။” (ရှင်လုကာ ၂း ၃၀)
#Sr. Maria Teresa Than Maung (MSJP II)
