 for web4.jpg)
 for web3a.jpg)
2022-01-22 06:14:16
ဇန်နဝါရီလ(၂၃)ရက်
(တတိယသာမန်တနင်္ဂနွေနေ့)
ရှင်လုကာ(၁:၁-၄၊၄:၁၄-၂၁)
စစ္စတာရ်ထရီဇာ(ISR)
၁၆။ထို့နောက်ကိုယ်တော်သည်မိမိကြီးပြင်းခဲ့သောနာဇရက်မြို့သို့ကြွလာတော်မူသောအခါမိမိ၏ထုံးစံအတိုင်းဥပုသ်နေ့၌တရားဇရပ်ထဲသို့ဝင်တော်မူ၏။ကိုယ်တော်သည်ကျမ်းစာဖတ်ရှုခြင်းငှာထတော်မူလျှင်၊၁၇။သူတို့သည်ကိုယ်တော်အားပရောဖက်အီဇာယ၏ကျမ်းကိုပေးကြ၏။ကိုယ်တော်သည်ကျမ်းစာလိပ်ကိုဖွင့်လျှင်တွေ့တော်မူသောကျမ်းချက်မူကား၊၁၈။ထာ၀ရဘုရားသခင်၏ဝိညာဉ်တော်သည်ငါ့အပေါ်၌ရှိတော်မူ၏။အကြောင်းမူကားဆင်းရဲသားတို့အားဝမ်းမြောက်စရာသတင်းကို ဟောပြောစေခြင်းငှာကိုယ်တော်သည်ငါ့ကိုဆီဖြင့်လိမ်းကျံတော်မူပြီ။ချုပ်နှောင်ခံရသောသူတို့အားလွတ်ငြိမ်းခြင်းကိုကြေညာရန်နှင့်မျက်စိမမြင်သောသူတို့အားမျက်စိအလင်းကိုပေးရန်လည်းကောင်း၊ဖိနှိပ်ခံရသောသူတို့အားကယ်တင်စေခြင်းငှာလည်းကောင်း၊၁၉။ထာ၀ရဘုရားသခင်၏ကျေးဇူးတော်မင်္ဂလာနှစ်ကိုကြေညာရန်လည်းကောင်းကိုယ်တော်သည်ငါ့ကိုစေလွှတ်တော်မူ၏ဟူသောကျမ်းပိုဒ်ကိုဖတ်ကြားတော်မူ၏။၂၀။ထို့နောက်ယေဇူးသည်ကျမ်းစာကိုလိပ်ပြီးလျှင်ယင်းကိုတရားဇရပ်မှူးအား ပြန်ပေး၍ထိုင်တော်မူ၏။တရားဇရပ်၌ရှိသောလူအပေါင်းတို့သည်လည်းကိုယ်တော့်ကိုစေ့စေ့ကြည့်နေကြ၏။၂၁။ထိုအခါကိုယ်တော်ကယခုသင်တို့ကြားရသောကျမ်းစကားသည်ယနေ့ပင်ပြည့်စုံခြင်းသို့ရောက်လေပြီဟုမိန့်တော်မူ၏။-ဒုစရိုက်ပေါများရာအရပ်၌ကျေးဇူးတော်သည်ကြွယ်ဝလျက်ရှိသည်။ဘုရားရှင်သည်မည်သည့်အကြောင်းနှင့်မျှကျွန်ုပ်တို့ကိုစွန့်ပစ်မည်မဟုတ်သော်လည်းကျွန်ုပ်တို့၏ဘဝသည်အေးချမ်းသာယာအဆင်ပြေနေသောအချိန်အခါများတွင်ဘုရားရှင်ကိုကျွန်ုပ်တို့မေ့လျော့နေတတ်ကြပေမည်။ဘုရားရှင်နှင့်ဝေးကွာခြင်းသည်ပစ္စည်းဉစ္စာချို့တဲ့ခြင်းထက်သာ၍ဆိုးသောဆင်းရဲသားနှင့်တူနေပေသည်။ဆင်းရဲသားများဟုဆိုရာတွင်ဘုရားရှင်ကိုအဝေးသို့နှင်လျက်လူသားဆန်ခြင်းကိုခေါက်ချိုးထားကာ“ငါ”ဟူသောအတ္တကမ္ဘာ၌ပိန်းပိတ်မှောင်နေသောအဓမ္မလူသားများလည်းပါဝင်ပါသည်။ဘုရားရှင်ထံပါးမှအပြစ်ကျူးခြင်းကြောင့်အဝေးသို့ထွက်ခွာသွားကြသောကျွန်ုပ်တို့ကိုချစ်ခြင်းမပြယ်သူ့ထံပြန်လာစေ၍အစဉ်လက်ကမ်းကြိုသောဘုရားရှင်သည်ကျွန်ုပ်တို၏ဖြစ်တည်မှုအတိုင်း၊ကျွန်ုပ်တို့၏အရှိအတိုင်းကိုလက်ခံကာ ပြန်လာစေလိုသောဘုရားဖြစ်ပါသည်။ယနေ့ကြားနာရသောအသက်ပေးသည့်နှုတ်တော်ထွက်စကားတွင်ဆင်းရဲသားတို့အားဝမ်းမြောက်စရာသတင်းကောင်းကိုဟောပြောစေခြင်းငှါကိုယ်တော်ရှင်သည်ဆီဖြင့်လိမ်းကျံခြင်းကိုခံရတော်မူသည့်အကြောင်းနှုတ်မြွက်ထားပါသည်။အဘက်ဘက်၌ချွတ်ချွံကျနေသောယနေ့အချိန်ခါများတွင်ကျွန်ုပ်တို့၏မျိုးဆက်များသည်အမှန်တရားအတွက်ရပ်တည်သည် သာမကနေ့တဓူဝရှင်သန်မှုတွင်နေထိုင်ပြသကြသောအခါမတရားဖမ်းဆီးချုပ်နှောင်ခြင်းခံရသည်။ ဖိနှိပ်ခြင်းခံရသော်လည်းမိမိ၌ရှိသည့်ခွန်အားနှင့်ပြင်းပျသောစိတ်ဓါတ်များဖြင့်အရာရာစွန့်ကာကိုယ်၊ စိတ်၊နှလုံးလွတ်လပ်ခြင်းအတွက်တိုက်ပွဲဝင်ကြသည်။အသက်ပေးဆက်ကျဆုံးသွားကြရသည်။အချို့မှာမူလောကီအရာလိုအပ်ချက်များအတွက်စိုးရိမ်လျက်ပြောင်းလဲခြင်းလှိုင်းဟုန်တွင်ရေသာခိုကာ မိမိ၏အတ္တအမှောင်၌နေထိုင်ကြသောသူများရှိနေသည်။ထိုသို့သောသူများအတွက်ကိုယ်တော်ရှင်ကြွလာခြင်းဖြစ်သည်။ဘုရားရှင်ကိုသိမှတ်ဝန်ခံယုံကြည်သည့်အတွင်းစိတ်၏လွတ်လပ်ခြင်းဖြင့်ဝမ်းမြောက်ခြင်းရှိကြရမည့်ယနေ့ကိုကိုယ်တော်ရှင်စိုးပိုင်တော်မူပါသည်။ သို့ဖြစ်၍သမ္မာတရားရှင်ဘုရားသခင်ကိုစိတ်နှလုံးအတွင်းသိမ်းပိုက်လျက်ဤခက်ခဲပင်ပန်းဆင်းရဲသည့်ကာလအမြန်ဆုံးပြီးဆုံးစေပါမည့်အကြောင်းဇွဲအားမလျှော့ဘဲ တောင်းဆုပြကြပါစို့။ကိုယ်တော်ရှင်၏ပါဝင်တော်မူခြင်းကိုအစဥ်သိမှတ်ကြပါစို့။"အိုသခင်ကိုယ်တော်ကိုယုံကြည်ပါ၏။"
