နီတိဒေသနာကျမ်း 27: 4-7
လှုပ်ခါနေသော ဆန်ခါတွင် အမှိုက်များ ကျန်ရစ်သည်၊ဒါကြောင့်လည်း လူတစ်ယောက်ရဲ့ ချို့ယွင်းချက်တွေဟာ သူ့ဟောပြောချက်ထဲမှာ ပေါ်လာတယ်။
မီးဖိုသည် အိုးထိန်းသမား၏ အလုပ်ကို စမ်းသပ်သည်၊လူ၏စမ်းသပ်မှုသည် သူ၏စကားဝိုင်းတွင်ဖြစ်သည်။
သစ်ပင်တစ်ပင်ပေါက်ရောက်ရာ ဥယျာဉ်ခြံသည် ၎င်း၏အသီးအနှံများ၏ အရည်အသွေးအပေါ် အဆုံးအဖြတ်ပေးသည်၊
ထိုနည်းတူ လူတစ်ဦး၏စကားများကိုမကြားရခင် သူဟာဘယ်လိုလူဆိုပြီးမချီးမွမ်းမိစေနှင့်။
(၁ ကော 15:54-58)
“54. ပုပ်ပျက်တတ်သောအရာသည် မပုပ်ပျက်နိုင်သောအရာ ကိုဆင်မြန်း၍ သေကြေတတ်သောအရာသည် မသေနိုင်သော အရာကိုဆင်မြန်းသောအခါ ကျမ်းစာတော်မြတ်၌ ရေးသားထားသောကျမ်းစကားသည် ပြည့်စုံခြင်းသို့ ရောက်လိမ့်မည်။ ကျမ်းစကားသည်ကား သေခြင်းသည် အောင်မြင်ခြင်း၌ ဝါးမျိုခြင်းကိုခံရလေပြီ။ 55.အိုသေမင်း၊ သင်၏အောင်မြင်ခြင်းကား အဘယ်မှာနည်း။ အိုသေမင်း၊ သင်၏အဆိပ်ဆူးကား အဘယ်မှာနည်း ဟူ၍ဖြစ် ၏။56.သေမင်း၏အဆိပ်ဆူးကား အပြစ်ဒုစရိုက်ပေတည်း။ အပြစ်ဒုစရိုက်၏တန်ခိုးကား ပညတ်တရားပေတည်း။
57.သို့ရာတွင် ငါတို့၏သခင် ယေဇူးခရစ်တော်အားဖြင့် ငါတို့အား အောင်မြင်ခြင်းကိုပေးတော်မူသော ဘုရားသခင်၏ကျေးဇူး တော် ကိုချီးမွမ်းပါ၏။
58.သို့ဖြစ်၍ ငါချစ်ခင်ရသောညီအစ်ကိုတို့၊ တည်ကြည်ခိုင်မာစွာရပ်တည်ကြလော့။ သခင်ဘုရား၏အမှုတော်မြတ်ကို ဆောင်ရွက်ခြင်းသည် မည်သည့်အခါမျှ အချည်းနှီးမဖြစ်ကြောင်းသိမှတ်လျက် ကိုယ်တော်၏အမှုတော်မြတ်ကို အစဉ်ထမ်း ရွက်ကြလော့။”
(ရှင်လုကာ 6:39-45)
“39.ကိုယ်တော်သည် သူတို့အား ပုံဥပမာတစ်ခုကိုလည်း မိန့်တော်မူ၏။ မျက်မမြင်တစ်ဦးသည် အခြားမျက်မမြင်တစ်ဦးကို လမ်းပြနိုင်သလော။ ဤသို့ပြုလျှင် ထိုသူနှစ်ဦးစလုံး တွင်းထဲသို့ကျကြလိမ့်မည်မဟုတ်လော။- 40. တပည့်သည် ဆရာထက် မကြီးမြတ်နိုင်။ သို့သော် လူတိုင်းသည် ပြီးပြည့်စုံအောင် သင်ယူပြီးသောအခါ ဆရာကဲ့သို့ဖြစ် လိမ့်မည်။
41.အဘယ်ကြောင့် သင်သည် မိမိ၏မျက်စိထဲ၌ ရှိသောသစ်တုံးကို မမြင်ဘဲ သင့်ညီအစ်ကို၏မျက်စိထဲရှိ သစ်သားစကို မြင်ရသနည်း။42. မိမိ၏မျက်စိထဲတွင် ရှိနေသည့်သစ်တုံးကိုမမြင်ပါဘဲလျက် မိမိ၏ညီအစ်ကိုအား သင်၏မျက်စိထဲမှသစ်သားစကိုထုတ်ပေးပါရစေဟုသင်မည်သို့ဆိုနိုင်မည်နည်း။အသင် သူတော်ကောင်းယောင် ဆောင်သောသူ၊သင်၏မျက်စိထဲမှ သစ်တုံးကို ဦးစွာ ထုတ်ပစ်လော့။ သို့မှသာ သင်သည် သင့်ညီအစ်ကို၏ မျက်စိထဲမှသစ်သားစကို ထုတ်ပစ်ရန် ကောင်းစွာမြင်နိုင်ပေလိမ့်မည်။43.ကောင်းသောအပင်သည် မကောင်းသောအသီးကို မသီးနိုင်။ မကောင်းသောအပင်သည်လည်း ကောင်းသောအသီးကို မသီးနိုင်။44. အကြောင်းမူကား အသီးကိုကြည့်၍ အပင်ကိုသိရ၏။ သဖန်းသီးကို ဆူးပင်မှ ဆွတ်ခူးလေ့မရှိ။ စပျစ်သီးကိုလည်း ဆူးချုံမှဆွတ်ခူးလေ့မရှိ။45. ကောင်းသောသူသည် မိမိ၏စိတ်နှလုံးတွင် သိမ်းဆည်းထားသည့် ကောင်းသောအရာများထဲမှ အကောင်းကို ထုတ်ဖော် တတ်၏။ မကောင်းသောသူသည်လည်း သူ၏ မကောင်းသောအရာများထဲမှ မကောင်းမှုကို ထုတ်ဖော်တတ်၏။ အကြောင်း မူကား စိတ်နှလုံး၌ပြည့်လျှံနေသော အရာများကို နှုတ်ကမြွက်ဆိုတတ်သောကြောင့်တည်း။”
ထောက်ရှုချက်
ကျမ်းရေးဆရာ ရှင်လုကာက ဆေးဆရာတစ်ဦးဖြစ်ပါတယ်။သူရေးခဲ့တဲ့ဧဝံဂေလိကျမ်းက ယေဇူးသခင်ကအပြစ်ခွင့်လွတ်ခြင်း၊ ကိုယ်စိတ်နှလုံးသုံးပါးကုသခြင်းခံရဖို့ယုံကြည်မျှော်လင့်သူတိုင်းအတွက်ကောင်းမြတ်သောသမားတော်၊ကောင်းသောသိုးထိမ်းကြီးဖြစ်ကြောင်းပုံဖော်ရေးသားခဲ့ပါတယ်။ယေဇူးသခင်က ကျွန်ုပ်တို့ကို အလွန်ဆိုးဝါးတဲ့
အပြစ်၊ ကြောက်ရွံ့ခြင်း နဲ့ တရားစီရင်ခံရခြင်းစတာတွေရဲ့ဖိနိပ်ခြင်းကလွတ်မြောက်စေဖို့ကြွလာခဲ့တာဖြစ်ပါတယ်။သူက ကျွမ်းကျင်တဲ့သမားတော်တစ်ဦးလိုပဲ
ကျွန်ုပ်တို့ရဲ့ ကင်ဆာနဲတူတဲ့ အပြစ်၊ မကောင်းမှု နဲ့ဖိနိပ်ခံရခြင်းတွေကို ထုတ်ဖော်ပြသပါတယ်။သို့မှသာ ကုသခံရပြီး ပျောက်ကင်းချမ်းသာရနိုင်မှာဖြစ်ပါတယ်။ကုသခံရဖို့အတွက်ကတော့ ကျွန်ုပ်တို့ကမိမိရောဂါကိုသိပြီးကုသပေးနိုင်တဲ့ခရစ်တော်ဘုရားရှင်ထံယုံကြည်စွာနဲ့ချဥ်းကပ်ဖို့ပါပဲ။ဒီကနေ့သခင်ခရစ်တော်ထုတ်ဖော်ပြခဲ့တဲ့ကျွန်ုပ်တို့ဆီမှာစွဲကပ်နေတဲ့ရောဂါသုံးမျိုးရှိနေပါတယ်။
(၁) မိမိကိုယ်တိုင် မသိနားမလည်ပဲ ဆရာလုပ်လိုခြင်း(၂) မိမိအမှားကိုမမြင်ပဲ သူတပါး၏အမှားကိုသာမြင်တတ်ခြင်း(၃) မိမိစိတ်နှလုံးထဲကအရှိအတိုင်း မိမိပြုကျင့်တတ်ခြင်း
မိမိရဲ့လုပ်ရပ်တွေက မိမိဟာဘယ်သူဖြစ်တယ်ဆိုတာကိုလူတွေအားပြောပြနေတယ်။မိမိကိုယ်တိုင် မသိနားမလည်ပဲ ဆရာလုပ်လိုခြင်း"မျက်မမြင်တစ်ဦးသည် အခြားမျက်မမြင်တစ်ဦးကို
လမ်းပြနိုင်သလော။"တခြားသူကိုလမ်းပြမည့်သူများဟာမိမိကိုယ်တိုင်ကထိုလမ်းကိုသိသူဖြစ်ရမယ်။ရဟန်းက ရဟန်းတို့တပ်အပ်တဲ့ဘာသာရေးပညာကိုကောင်းစွာသိမြင်နားလည်သူဖြစ်ရမယ်။
ကျောင်းဆရာကလည်းမိမိသင်ကြားရမည့်ဘာသာရပ်ကိုကောင်းစွာသိနာလည်သူဖြစ်ရမယ်။ဆရာဝန်ကလည်း ဆေးကုသတဲ့ပညာကိုကောင်းစွာတပ်ကျွမ်းသူဖြစ်ရမယ်။နိုင်ငံအုပ်ချုပ်သူများကလည်းမိမိတို့ရဲ့နိုင်ငံသားတွေကောင်းကျိုးအတွက်ဘယ်လိုအုပ်ချုပ်ရမလဲဆိုတာ ကောင်းစွာသိဖို့လိုတယ်။မိမိလုပ်ရမည့်အလုပ်ကိုမသိပဲ တာဝန်ယူနေခြင်းကနှစ်ဦးနှစ်ဘက်အတွက် အကျိုးယုတ်စေသောလုပ်ရပ်ဖြစ်ပါတယ်။(၂) မိမိအမှားကိုမမြင်ပဲ သူတပါး၏အမှားကိုသာမြင်တတ်ခြင်း "အဘယ်ကြောင့် သင်သည်မိမိ၏မျက်စိထဲ၌ ရှိသောသစ်တုံးကို မမြင်ဘဲသင့်ညီအစ်ကို၏မျက်စိထဲရှိ သစ်သားစကို မြင်ရသနည်း။"လူဆိုတာ မပြည့်စုံကြဘူး၊ အမှားနဲ့မကင်းကြဘူးသူတပါးရဲ့အားနဲ့ချက်တွေကိုမြင်မိတိုင်းမိမိကိုယ်ကိုသတိပေးရမှာက ငါ့အမှားကသူတို့ထက်ပိုများတယ်ဆိုတဲ့အသိတရားဖြစ်ပါတယ်။သူတပါးကိုဆုံးမတော့မယ်၊ အပြစ်တင်ဝေဖန်တော့မယ်ကြံစည်တိုင်း
မိမိရဲ့မပြည့်စုံမှုတွေကိုအရင်ရည်တွက်ပါ။“တစ်ကိုယ်ကောင်းစိတ်နှင့် ထင်ပေါ်ကျော်စောလိုသောစိတ်တို့ဖြင့် မည်သည့်အမှုကိုမျှမပြုကြလေနှင့်။ အခြားသူတို့သည် သင်တို့ထက် သာ၍ကောင်းမြတ်သည်ဟု ခံယူလျက် နှိမ့်ချခြင်းရှိကြလော့။-”
(ဖိလိပ္ပိ 2:3)( ၃) မိမိစိတ်နှလုံးထဲကအရှိအတိုင်း မိမိပြုကျင့်တတ်ခြင်း"အသီးကိုကြည့်၍ အပင်ကိုသိရ၏။""ကောင်းသောအပင်က ကောင်းသောအသီးကိုသာသီး၏။"လူတစ်ယောက်ပြောဆိုနေသောစကားကနေသူဘယ်သူဖြစ်သလဲဆိုတာဖော်ပြနေတယ်။လူတစ်ယောက်ရဲ့အကျင့်စရိုက်ကိုကြည့်ပြီးသူဟာဘယ်လိုလူလဲဆိုတာကိုသိနိုင်ပါတယ်။အခုလိုဝါတွင်းကာလမှာ မိမိတို့ရဲ့
ကိုယ်စိတ်နှလုံးသုံးပါးနဲ့ အပြောအဆိုကိုပြန်လည်ဆင်ခြင်ကြပြီးကောင်းအောင်ပြုပြင်ဖို့ကြိုးစားကြပါစို့။