ချစ်ခြင်းကို အနက်အမျိုးမျိုးဖွင့်ဆိုရေးသား၊ခံစားကြသည်။အမှန်မှာ စံမှီသောချစ်ခြင်း၊ခရစ်ယာန်များအတွက် စံပြုရမည့်ချစ်ခြင်းကား ခမည်းတော်ဘုရားကသားတော်ကို၊သားတော်က ခမည်းတော်ဘုရားကိုချစ်သောချစ်ခြင်းအပေါ် အခြေခံရမည်ဖြစ်သည်။ခမည်းတော်ဘုရားသည် သူ့၏သားတော်ကိုအဘယ်သို့ချစ်ခဲ့သနည်း။လူ့အဖြစ်ကိုနှိမ့်ချစွာခံယူစေ၍ နွမ်းပါးချို့ တဲ့စွာ နွားစခွက်၌မွေးဖွားစေခဲ့သည်။ဘာမျှမတတ်နိုင်သူကဲ့သို့ ဟေရုဒ်မှရန်ရှာခြိမ်းခြောက်သောကြောင့် အီဂျစ်ပြည်သို့ ထွက်ပြေးတိမ်းရှောင်ခဲ့ရသည်။ယေဇူးသခင်သည် နောင်တတရားယူရန်လိုအပ်သော အပြစ်သားတစ်ဦးကဲ့သို့ ယောဟန် လက်တော်မှဆေးကြောခြင်းမဂ်လာကိုခံယူခဲ့ရသည်။ မိမိ၏ဆွေမျိုးသားချင်းများ၊မြို့သူမြို့သားများ၏အထင်အမြင်သေးခြင်း၊မတူမတန်သည့်နှင့်ဆက်ဆံခံခဲ့ရသည်။ယေဇူးသခင်သည် သူ၏လုပ်ဖော်ဆောင်ဖက်များကိုလည်း ပညာတတ်များထဲမှမဟုတ်ဘဲသူကြီးပြင်းခဲ့ရသောအသိုင်းအဝိုင်းမှ အခြေခံလူတန်းစားများထဲမှတစ်ဖွဲ့ဖြစ်သော တံငါသည် များကိုသာရွေးခေါ်ခဲ့သည်။ယေဇူးသခင်တရားဒေသနာစတင်ဟောကြားချိန်၌လည်း ယေဇူးခင်အား အစဉ်ချောင်းမြောင်းတိုက်ခိုက်အပြစ် ကောက်နေသော ဂျူးဘာသာရေးခေါင်းဆောင်တို့၏နှောင်ယှက်မှု၊ဝေဖန်မှု၊အသာရေဖျက်မှုကိုအမြဲခံနေခဲ့ရသည်။ယေဇူးသခင်သည် ကယ်တင်ရှင်အဖြစ် ဂျေရုဆလင်မြို့ထဲသို့ကြွ၀င်ချိန်၌ သောင်းသောင်းဖြဖြကြိုဆိုကြသော်လည်း သူ စီးသောတိရစ္ဆာန်မှာ မင်းခန်းမင်းနား၌ ပွဲမတိုးသော ‘မြည်း’ ဖြင့်ကြွ၀င်ခဲ့သည်။ ယေဇူးသခင်သည် ဘာမျှမစွမ်းသာသော သာမန်လူတစ်ဦးနှယ်အာဏာသားတို့၏ ပြတ်ရယ်ပြခြင်း၊ ရိုက်ပုတ်ခြင်း၊မျက်စိများကိုဖုံးအုပ်၍ မျက်နှာကိုရိုက်ပုတ်ပြီးသူ့အားအဘယ်သူရိုက်ပုတ်သည်ကို ပရောဖက်ကဲ့သို့ဟောရန်စသော လှောင်ပြောင်မှုများကိုကြုံတွေ့ခဲ့ရသည်။(သံလု ကာ ၂၂း၆၃-၆၅) နောက်ဆုံး၌ ယေဇူးသခင်သည် ရောမလူမျိုးတို့၏ ရာဇသတ်ပုဒ်များအနက် သူ့ကိုယ်သူဘုရင်ဟုပြော ဆိုသောပြစ်မှုဖြင့် ရာဇ၀င်လူဆိုးမှသာလျှင် တင်သတ်ခံရသည့်သေဒဏ်စီရင်ချက်ကိုခံခဲ့ရသည်။ကားစင်တင်သတ်ခံရသောပြစ်မှုသည် နိုင်ငံရေးပြစ်မှုနှင့်တိုက်ရိုက်ပတ်သက်သော ပြစ်မှုကျူးလွန်သူ၊ ရာဇ၀င်လူဆိုးကိုသာချမှတ်သောအကြီးမားဆုံးနှင့်အလွန်ပြင်းထန်သောနိုင်ငံရေးပြစ်မှုဖြစ်သည်။တစ်နည်းဆိုသော် ယေဇူးသခင်သည် ယေဇူးသခင်သည် ဧကရာဇ်ဘုရင်အားတိုက်ရိုက်ပုန်ကန်သောနိုင်ငံရေးပြစ်မှုဖြင့်သေဒဏ်စီရင်ချက်ချမှတ်ခံခဲ့ရသည်။ယနေ့ ဧ၀ဂေလိကျမ်း၌ ယေဇူးသခင်က ‘ခမည်းတော်သည် ငါ့ကိုချစ်တော်မူသကဲ့သို့ ငါသည် သင်တို့ကိုချစ်၏’ ဟု မိန့်တော်မှုပါသည်။ ခမည်းတော်ဘုရား ယေဇူးသခင်ကိုချစ်တော်မူသည်မှာပေးဆက်အနစ်နာခံခြင်းဖြင့်ချစ်ခဲ့ပြီး၊နောက်ဆုံး၌ သူမတူသောဆုလာဘ်ဖြစ်သည့် သေခြင်းမှပြန်လည်မြောက်သောပထမဦးဆုံးအသီးဖြစ်လာစေခဲ့သည်။(ပ ကော်ရိန့်သု ၁၅း၂၀)ထို့အတူ ယေဇူးသခင်သည် သူ၏ဘုန်းတော်ဂုဏ်တော်၌ကောင်းကင်တမန်တော်များနှင့်အတူကြွလာပြီး ဘုန်းကျက်သရေရှိသော ပလ္လင်တော်ပေါ်၌ ထိုင်တော်မူကာ လူမျိုးအပေါင်းတို့ကိုစု‌ဝေးစေ၍ စီရင်တော်မူသော အခွင့်ကိုလည်းပေးတော်မူမည်ဖြစ်သည်။(သံမာတေဦး ၂၅း၃၁-၃၃ယေဇူးသခင်သည် ကျွန်ုပ်တို့အား အဘယ်အသို့ချစ်သနည်း။ ယေဇူးသခင်ကျွန်ုပ်တို့ကိုချစ်တော်မူသည်မှာ ခမည် တော်ဘုရားသူ့အားချစ်တော်မူသကဲ့သို့ဖြစ်သည်။ အဘယ်ကြောင့်ဆိုသော် ‘ငါ့နောကျသို့လိုကျလိုသောသူသည် မိမိကိုယ် ကိုညင်းပယ်၍ မိမိ၏လက်ဝါးကားတိုင်ကိုထမ်းကာ ငါ့နောက်သို့လိုကြစေ။ အကြောင်းမူကား မိမိ၏အသက်ကိုကယ်လို သောသူသည် အသက်ဆုံးရှုံးလိမ့်မည်။ငါ့အတွက်သက်ဆုံးရှုံးသူသည် အသက်ကိုပြန်၍ရလိမ့်မည်’ဟုမိန့်တော်မူသည်။(သံမာတေဦး ၁၆း၂၄-၂၅) ထို့အတူ ယေဇူးသခင်သည် တပည့်တော်ကြီးအပါးခုနှစ်ဆယ်ကိုရွေးကောက်ပြီးလျှင် ကိုယ် တော်တိုင်ကြွရောက်မည့်မြို့ရွာများအသီးသီးသို့နှစ်ပါးစီစေလွှတ်၍မိန့်တော်မူသည်မှာ ‘သွားကြလော့။ဝံပုလေါတို့အလယ်၌ သိုးငယ်များကဲ့သို့ သင်တို့ကိုငါစေလွတ်တော်မူ၏။ပိုက်ဆံအိတ်ကိုလည်းကောင်း၊လွယ်အိတ်ကိုလည်းကောင်း၊ဖိနပ်ကို လည်းကောင်းသင်တို့ယူဆောင်မသွားကြနှင့်’ ဟုမိန့်တော်မူပါသည်။ (သံလုကာ ၁၀း၁-၄) ယေဇူးသခင်သခင်၏ ကျွန်ုပ်တို့ အားချစ်ခြင်းသည် ပေးဆက်အနစ်နာခံသောချစ်နည်းဖြစ်သည်။ ဤသို့ပေးဆက်အနစ်နာခံသော်လည်း ယခုကာလ၌ပင် အဆများစွာသောအကျိုးကိုလည်းကောင်း၊နောင်ကာလ၌ထာ၀ရအသက်ကိုလည်းကောင်းမခံစားရဘဲမနေရဟူ၍လည်းကောင်း(သံလုကာ ၁၈း၂၄-၃၀)၊ထို့အတူယေဇူးသခင်သည်ကျွန်ုပ်တို့အား‘အရာအားလုံးအသစ်ဖြစ်လာမည့် ကာလ၌ လူသားသည် ဘုန်းကျက်သရေနှင့်ပြည့်စုံသောပလ္လင်ပေါ်တွင် ထိုင်တော်မူသောအခါ ငါ၏နောက်သို့လိုက်သော သင်တို့သည်လည်း ပလ္လင်တစ်ဆယ့်နှစ်ခုပေါ်၌ ထိုင်ကြလျက် အစ္စရေးလူမျိုးတစ်ဆယ့်နှစ်မျိုးကို တရားစီရင်ကြရလိမ့် မည်’ဟုမိန့်တော်မူ၏။(သံမာတေဦး ၁၉း၂၈) ယေဇူးသခင်၏ချစ်ခြင်းကိုခံယူရန်အသင့်ရှိကြပါသလော။

အိုဘုရားသခင်၊ ကိုယ်တော်၏ချစ်ခြင်းကိုခံယူ၀သူများဖြစ်စေတော်မူပါ။