ယေဇူးသည်ဆီဇားရိယဖိလိပိနယ်သို့ရောက်သောအခါလူအပေါင်းတို့သည်လူသားကိုမည်သူဖြစ်သည်ဟူ၍ဆိုကြသနည်းဟုသူ၏တပည့်တော်တို့အားမေးတော်မူ၏။သူတို့ကလည်းလူအချို့ကကိုယ်တော်သည်ယောဟန်ဘတ္တိဇံ၊အချို့ကဧလိယ၊အချို့ကဂျေရေမိ၊သို့မဟုတ်ပရောဖက်တစ်ပါးပါးဖြစ်ကြောင်းပြောဆိုကြပါသည်ဟုလျှောက်ကြ၏။ကိုယ်တော်ကလည်းသင်တို့မူကားငါမည်သူဖြစ်သည်ဟူ၍ဆိုကြသနည်းဟုသူတို့အားမေးတော်မူလျှင်။စီမွန်ပေတရုကကိုယ်တော်သည်အသက်ရှင်တော်မူသည့်ဘရားသခင်၏သားတော်တည်းဟူသောခရစ်တော်ဖြစ်ပါသည်ဟုလျှောက်လေ၏။ယေဇူးကလည်းယောန၏သားစီမွန်၊သင်သည်မင်္ဂလာရှိ၏။အကြောင်းမူကားဤအရာကိုသင့်အားအသွေးအသားကဖော်ပြခြင်းမဟုတ်ဘဲကောင်းကင်ဘုံ၌ရှိတော်မူသောငါ၏ ခမည်းတော်ကဖော်ပြတော်မူခြင်းသာဖြစ်၏။သင့်အားငါဆိုသည်မှာသင်သည်ပေတရုဖြစ်၏။ဤကျောက်ပေါ်တွင်ငါ၏အသင်းတော်ကိုငါတည်ဆောက်မည်။ထိုအသင်းတော်ကိုငရဲ၏တံခါးတို့သည်မအောင်နိုင်ရာ။ကောင်းကင်နိုင်ငံတော်၏သော့ကိုလည်းသင့်အားငါပေးမည်။ကမ္ဘာမြေပေါ်တွင်သင်ချည်နှောင်သမျှသည်ကောင်းကင်ဘုံ၌ချည်နှောင်လျက်ရှိလိမ့်မည်။ကမ္ဘာမြေပေါ်တွင် သင်ဖြေလွှတ်သမျှသည်လည်းကောင်းကင်ဘုံ၌ဖြေလွှတ်လျက်ရှိလိမ့်မည်ဟုမိန့်တော်မူ၏။ထောက်ရူချက်***ဒီယနေ့ကက်သလစ်သာသနာတော်ရဲ့ကျောင်းတိုင်ကြီး၂ခုလို့ပြောလို့ရတဲ့တမန်တော်ကြီးရှင်ပီတာနှင့်ရှင်ပေါလူးတို့ရဲ့ပွဲနေ့ဖြစ်ပါတယ်။ဇန်နဝါရီလ၂၅ရက်နေ့မှာတမန်တော်ကြီးရှင်ပေါလူးအကျင့်တရားပြောင်းလဲခြင်းပွဲကိုကျင်းပတယ်။ဖေဖေါ်ဝါရီလ(၂၂)ရက်နေ့မှာရှင်ပီတာရဲ့ရာဇပလ္လင်ပွဲဆိုပြီးတစ်ရက်ချင်းစီပွဲသီးသန့်ကျင်းပကြတာရှိပါတယ်။ဒါပေမဲ့လို့လည်းဒီတမန်တော်ကြီး၂ပါးကိုအတူတကွ ယှဉ်တွဲပြီးပွဲနေ့တစ်ရက်အဖြစ်ကျင်းပရတဲ့အကြောင်းတော့ရှိပါတယ်။တမန်တော်ကြီး ၂ ပါးစလုံးဟာ ထူးခြားချက်တွေရှိတယ်။ သူတို့နှစ်ပါးရဲ့အကျင့်၊စိတ်နေသဘောထား၊သာသနာပြုလုပ်ငန်းတွေလည်းအနည်းငယ်ကွဲပြားကြတယ်။သူတို့ဘဝတစ်လျှောက်မှာလည်းဒီတမန်တော်ကြီး၂ပါးကနီးနီးကပ်ကပ်နဲ့အလုပ်တူလုပ်ခဲ့ကြတာမဟုတ်ဘူး။ဘုရားသခင်ညွှန်ပြတဲ့အလုပ်ကိုကိုယ်ပုံစံ နဲ့ကိုတာဝန်ထမ်းဆောင်ခဲ့ကြတာဖြစ်ပါတယ်။ရှင်ပီတာကိုအရင်ဆုံးကြည့်ရအောင်၊သူ့နာမည်ကအစတုန်းကစီမုန်လို့ခေါ်တယ်။ဂါလီလီယားနယ်သားစီမုန်ကဆင်းရဲတယ်၊ကြမ်းတမ်းတယ်။စိတ်ဆတ်တယ်။ပညာမတတ်ဘူး။တံငါသည်ဘဝနဲ့ရိုးရိုးရှင်းရှင်းဖြတ်သန်းခဲ့တဲ့သူ။ရှင်ပေါလူးကိုလည်းအစတုန်းကစောလူးလို့နာမည်တွင်တယ်။ရှင်ပေါလူးရဲ့ကိုယ်ရည်ကိုယ်သွေးကရှင်ပီတာနဲ့မတူဘူး။သူဟာဖာရီဇေဦးတစ်ယောက်ဖြစ်တယ်။မိမိယုံကြည်ရာမှာစိတ်အားထက်သန်တယ်။ပညာတတ်ဆန်တယ်။ပေါင်းသင်းဆက်ဆံရေးညက်တယ်။တစ်စိုက်မတ်မတ်ရှိတယ်။ဒါလေးတွေကသူတို့၂ဦးကြားကမတူညီတဲ့အချက်အနည်းငယ်ဖြစ်ပါတယ်။ ရှင်ပီတာရဲ့နာမည်ကိုခရစ်တော်ကပေးခဲ့တယ်။အဓိပ္ပါယ်ကကျောက်ဆောင်၊ကျောက်သားလို့အနက်ရတယ်။ဒီကျောက်ပေါ်မှာခရစ်တော်ကသူရဲ့အသင်းတော်ကိုတည်ထောင်ပေးခဲ့တယ်။ကျောက်သားဆိုတာခိုင်မာမှုရှိတယ်။တည်ငြိမ်ထည်ဝါမှုရှိတယ်။ငြိမ်ငြိမ်လေးနဲ့အခိုင်အမာတည်တံ့နေတာ။ဒါကြောင့်ရှင်ပီတာရဲ့အရိုက်အရာကိုပုပ်ရဟန်းမင်းကြီးတွေအဆင့်ဆင့်ဆက်ခံပြီးယခုထက်ထိမပြိုလဲဘဲခိုင်မာစွာရပ်တည်နေဆဲဖြစ်ပါတယ်။ရှင်ပီတာကအငြိမ်သမား။ရှင်ပေါလူးကျတော့အလှုပ်သမားလို့ပြောရမယ်။ ကစားပွဲတစ်ခုမှာမရပ်မနားပြေးနေတဲ့သူတစ်ယောက်လိနေရာစုံဖြန့်ကျက်သာသနာပြုနိုင်ခဲ့တယ်။ဘုရားသခင်ရဲ့တရားဒေသနာတော်ကိုလူအများသိအောင်မသိသေးတဲ့လူမျိုးခြားတွေထိသွားရောက်သာသနာပြုနိုင်ခဲ့တယ်။ရှင်ပီတာနဲ့ရှင်ပေါလူးတို့ရဲ့လုပ်ငန်းတွေဟာမတူညီကြဘူး။ရှင်ပီတာလိုမျိုးခိုင်မာတည်တံ့စွာနဲ့ဘုရားသခင်ရဲ့နိုင်ငံတော်ကိုအုတ်မြစ်ချကာအမှန်တရားကိုစွဲစွဲမြဲမြဲ သွန်သင်ဖို့လိုသလိုရှင်ပေါလူးလိုလည်းသာသနာတော်ကိုပြန့်ပွားအောင်စွမ်းစွမ်းတမံထမ်းဆောင်ဖို့လိုသေးတယ်။မတူညီတဲ့စရိုက်ပုံစံကိုယ်စီရှိကြတဲ့ဒီတမန်တော်ကြီး၂ပါးအားဖြင့်သာသနာတော်ဟာပိုမိုပြန့်ပွာလာခဲ့တယ်။ဒီလိုပါပဲကျွန်ုပ်တို့ဘဝတွေမှာအထူးသဖြင့်မိသားစုတွေမှာလည်းအဖေနဲ့အမေစရိုက်တူချင်မှတူမယ်။အေးအေးဆေးဆေးနေတတ်တဲ့သူရှိသလိုလှုပ်ရှားနေတဲ့သူလည်းရှိဖို့လိုတယ်။၂ဦးစလုံးအေးနေရင်လည်းမကောင်းဘူး။၂ဦးစလုံးလှုပ်ရှားနေရင်လည်းအစဉ်မပြေပြန်ဘူး။တစ်ယောက်ချင်းစီမှာရှိတဲ့ပင်ကိုယ်စရိုက်၊နေထိုင်မှုပုံစံနဲ့ပဲဖြည့်စွက်အသက်ရှင်ကြမှသာသာယာပျော်ရွှင်တဲ့ဘဝကိုရရှိနိုင်မှာဖြစ်ပါတယ်။ကက်သလစ်အသင်းတော်ရဲ့အထင်ကရအချက်ချာကျတဲ့တမန်တော်ကြီး၂ပါးရှင်ပီတာနဲ့ရှင်ပေါလူးတို့ရဲ့ပွဲနေ့ကိုကျင်းပခြင်းအားဖြင့် သူတို့တွေမတူညီတဲ့စရိုက်တွေရှိသော်လည်းဘုရားရှင်ကိုယုံကြည်ခဲ့တယ်။ချစ်ခဲ့တယ်။ဘုရားအတွက်အသက်ပေးခဲ့သလိုပဲကျွန်ုပ်တို့လည်းပဲမိမိရဲ့ဘဝအခြေအနေတိုင်းဘုရားသခင်ပေးတဲ့အမှုတော်ကိုထမ်းဆောင်ကြရမယ်။တစ်ယောက်နဲ့တစ်ယောက်လက်တွဲပြီးဘုရားအမှုတော်ကိုဆောင်ရွက်နိုင်ကြပါစေ။