ထိုအချိန်၌ယေဇူးသည်ဥပုသ်နေ့တွင်ဂျုံခင်းများကိုဖြတ်လျှောက်၍သွားစဉ်တပည့်တော်တို့သည်ဆာလောင်သောကြောင့်ဂျုံပင်မှအနှံများကိုဆွတ်ခူး၍စားကြလေ၏။သို့သော်ဤအခြင်းအရာကိုဖာရီဇေးဦးတို့မြင်ကြလျှင်သူတို့ကကြည့်ပါ၊ကိုယ်တော်၏တပည့်တော်တို့သည်ဥပုသ်နေ့၌မပြုအပ်သောအရာကိုပြုနေကြပါသည်တကားဟုကိုယ်တော်အားလျှောက်ကြ၏။ကိုယ်တော်ကလည်းထိုသူတို့အားမိန့်တော်မူသည်ကားဒါဝိဒ်မင်းကြီးနှင့်သူနှင့်အတူပါသောသူတို့သည်ဆာလောင်သောအခါသူသည်မည်သို့ပြုသည်ကိုသင်တို့မဖတ်ဖူးကြသလော။သူသည်ဘုရားသခင်၏အိမ်တော်သို့ဝင်၍ရဟန်းတို့မှတစ်ပါးမိမိသော်လည်းကောင်း၊မိမိနှင့်အတူပါသောသူတို့သော်လည်းကောင်းမစားအပ်သောရှေ့တော်တင်မုန့်ကိုစားခဲ့ကြသည်ကိုမဖတ်ဖူးကြသလော။ထို့ပြင်ရဟန်းတို့သည်ဗိမာန်တော်၌ဥပုသ်ကိုချိုးဖောက်သော်လည်းအပြစ်မသင့်ကြောင်းကိုပညတ်တရားကျမ်း၌သင်တို့မဖတ်ဖူးကြသလော။သင်တို့အားငါဆိုသည်ကားဗိမာန်တော်ထက်ကြီးမြတ်သောအရာသည်ဤနေရာ၌ရှိသတည်း။ငါအလိုရှိသည်ကားကရုဏာသနားခြင်းဖြစ်၏။ယဇ်ပူဇော်ခြင်းမဟုတ်ဟူသောစကားကိုနားလည်ကြလျှင်သင်တို့သည်အပြစ်ကင်းသောသူတို့ကိုအပြစ်စီရင်ကြလိမ့်မည် မဟုတ်။အကြောင်းမူကားလူသားသည်ဥပုသ်နေ့၏အရှင်သခင်ဖြစ်သတည်းဟုမိန့်တော်မူ၏။

***ထောက်ရှုချက်***

ဘုရားသခင်သည်အချိန်နာရီ၏အရှင်သခင်ဖြစ်တော်မူသည်။ကိုယ်တော်သည်ဒီကမ္ဘာမြေပေါ်ကအချိန်နာရီကိုတိုးနိုင်လျှော့နိုင်သောအရှင်ဖြစ်တော်မူ၏။ကိုယ်တော်သည်ဟေဇကိဘုရင်၏နာမကျန်းနေမှုကိုသက်သာစေတော်မူ၍ဘဝအသက်တာကို၁၅နှစ်သက်တန်းထပ်တိုးပေးသနားတော်မူသည်ဟုပထမကျမ်းစာတော်မြတ်၌ကျွန်ုပ်တို့ကြားနာခဲ့ရသည်။ဟေဇကိဘုရင်သည်အနာရောဂါဝေဒနာဖြင့်သေလုဆဲဆဲအချိန်တွင်ဘုရားသခင်အားမိမိပြုခဲ့သောဘုရားသခင်ရှေ့တော်၌သစ္စာစောင့်လျက်စုံလင်သောစိတ်နှလုံးနှင့်ကျင့်၍ဘုရားသခင်နှစ်သက်သည့်အတိုင်းဘုရားသခင်၏စကားများကိုနားထောင်ခဲ့ခြင်းများကို‌ထောက်၍အသနားခံတောင်းလျှောက်သဖြင့်ဘုရားသခင်မှသူ့အားနောက်ထပ်၁၅နှစ်အသက်ရှင်နေရစေတော်မူခဲ့သည်။သို့ပေမဲ့သူသည်ကျေးဇူးတော်ကြောင့်အသက်ရှင်နေရသည်ကိုသတိမမူဘဲရရှိခဲ့သောအချိန်များကိုကောင်းမွန်စွာအသုံးမချခဲ့ပေ။‌ဟေဇကိမင်းကြီးသည်သူရခဲ့သော၁၅နှစ်အတွင်း၌မိမိထီးနန်းကိုဆက်ခံမည့်သားမနာရှေကိုပထမ၃နှစ်အတွင်း၌ရခဲ့ပေမဲ့လည်းမိမိသားကိုကောင်းမွန်စွာမသွန်သင်နိုင်ခဲ့သဖြင့်မနာရှေသည်ယုဒတို့၏ဘုရင်ဖြစ်လာသောအခါသူသည်ယုဒလူမျိုးတို့၏ဘုရင်များထဲတွင်ဆိုးရုပ်ဆုံး၊မကောင်းမှုများသောဘုရင်တစ်ပါးဖြစ်ခဲ့ရသည်။  

ကျွန်ုပ်တို့ကိုလည်းဘုရားသခင်သည်အဖိုးတန်လှသောလက်ဆောင်မွန်ဖြစ်သည့်ဤလောကတွင်ဘဝရှင်သန်နေရချိန်ကိုပေးသနားတော်မူတယ်။ကျွန်ုပ်တို့ဘယ်လိုအကျိုးရှိစွာအသုံးချနေကြသလဲဆိုတာကိုသုံးသပ်မိနိုင်ကြပါစေ။ကျွန်ုပ်တို့ရှင်သန်နေရချိန်တွင်ကျွန်ုပ်တို့အေးချမ်းစွာနေရရေးအတွက်ပဲမဟုတ်ဘဲနောင်လာနောက်သားတွေ‌အေးချမ်းစွာနေထိုင်ကြရဖို့အတွက်ပါကျွန်ုပ်တို့ပြင်ဆင်အသက်ရှင်နေထိုင်ကြရမယ်ဆိုတာကိုသတိပေးနေပါတယ်။

ကျွန်ုပ်တို့မြန်မာနိုင်ငံမှာအခုလိုအေးချမ်းစွာမနေရတာကိုကြည့်မယ်ဆိုရင်ကျွန်ုပ်တို့၏အတိတ်သမိုင်း၌နိုင်ငံကိုအုပ်ချုပ်မင်းလုပ်ခဲ့သူများ၏တစ်ကိုယ်ကောင်းဆန်မှုများကိုတွေ့ရကြပါလိမ့်မည်။ဥပ‌ဒေကိုလက်တစ်လုံးခြားလိုရာဆွဲသုံးခဲ့ကြသောအုပ်ချုပ်သူများကြောင့်ကျွန်ုပ်တို့ဟာတိုင်းပြည်ပျက်ကြီးမှာအနာဂတ်ပျောက်ဆုံးနေကြရသူများဖြစ်ကြရပါတယ်။ကျွန်ုပ်တို့လက်ရှိခံစားနေရတဲ့မငြိမ်းချမ်းခြင်းတွေကိုကျွန်ုပ်တို့၏နောင်လာနောက်သားတွေကိုထပ်ပြီးလက်ဆင့်ကမ်းကြအုံးမှာလား။

ဒီကနေ့ဧဝံ‌ဂေလိကျမ်းစာတော်မြတ်၌သခင်ယေဇူးကမိမိသည်ဥပုသ်နေ့၏အရှင်သခင်ဖြစ်ကြောင်းအပြစ်ဖြေရာယဇ်ပူဇော်ခြင်းထက်သူတစ်ပါးကိုကရုဏာထားတတ်ဖို့ကိုသိရှိနားလည်စေချင်ကြောင်းကိုတိုက်တွန်းနေပါတယ်။မိမိအပြစ်တွေကိုဖြေဖို့ဘုရားတည်၊ကျောင်းဆောက်၊ယတြာချေခြင်းထက်မိမိ၌ကရုဏာမေတ္တာတရားရှိဖို့ဘာသာရေး၊နိုင်ငံရေးခေါင်းဆောင်များကိုသတိပေးနေပါတယ်။ကျွန်ုပ်တို့၌အထူးသဖြင့်နိုင်ငံအုပ်ချုပ်မင်းလုပ်သူတို့တွင်အဓိကလက်ကိုင်ထားရှိရမည်မှာအနှစ်မရှိသည့်ဖွဲ့စည်းပုံအခြေခံဥပဒေများမဟုတ်ဘဲကရုဏမေတ္တာစိတ်ရှိခြင်းပင်ဖြစ်သည်။ဥပ‌ဒေသည်ကျွန်ုပ်တို့လူသားများကိုအကျိုးပြုဖို့ရန်အများကောင်းကျိုးအတွက်အထောက်အပံ့အကာအကွယ်ဖြစ်ဖို့ရန်ရည်ရွယ်၍ရေးဆွဲထားခြင်းသာဖြစ်ရပါမည်။သခင်ယေဇူးသည်ပညတ်ဥပဒေတွေကအရေးမပါဘူးလိုက်နာစရာမလိုဘူးဟုပြောနေခြင်းမဟုတ်ပါ။မည်သူမျှဥပဒေအထက်တွင်မရှိရဆိုသည့်စကားသည်ဥပ‌ဒေကိုအလွဲမသုံးစားဖို့ရန်နှင့်အာဏာရှင်မဖြစ်အောင်ထိန်းချုပ်ထားသည်စကားသာဖြစ်သည်။ဥပ‌‌‌ဒေသည်လူ၏အရှင်သခင်မဟုတ်ပေ။လူသားတို့ကိုအစေခံရန်ပြင်ဆင်ထားသောလမ်းညွှန်အထောက်အပံ့သာဖြစ်ပြီးလူသားမျာကိုအကျိုးမပြုလျှင်အကျိုးဖြစ်လာအောင်ပြင်ဆင်မွန်မံဖို့လူတိုင်းတွင်တာဝန်ရှိသည်။လူသည်ဥပဒေ၏အရှင်ဖြစ်ပြီးလက်ရှိလူသားများအတူတကွကောင်းမွန်စွာနေထိုင်အသက်ရှင်ရေးနှင့်နောင်လာနောက်သားများကောင်းမွန်စွာရှင်သန်နေရေးအတွက်လူတို့ကိုကောင်းစွာအထောက်အကူပြုကာကွယ်သောဥပဒေများကိုပြင်ဆင်အတည်ပြုရပါမည်။ကရုဏချစ်ခြင်းမေတ္တာဖြစ်ပညတ်ဥပဒေများကိုထိန်းသိမ်းကာကွယ်စောင့်ရှောက်သူများဖြစ်လာနိုင်ကြပါစေ။