ထိုနေ့၌ယေဇူးသည်အိမ်မှထွက်လာပြီးလျှင်ပင်လယ်ကမ်းခြေအနီး၌ထိုင်နေတော်မူ၏။ထိုအခါများစွာသောလူအစုအဝေးတို့သည်အထံတော်သို့လာကြသောကြောင့်ကိုယ်တော်သည်လှေပေါ်သို့တက်၍ထိုင်တော်မူ၏။လူအပေါင်းတို့သည်ကားကမ်းခြေတွင်ရပ်နေကြ၏။ကိုယ်တော်သည်ထိုသူတို့အားအကြောင်းအရာများစွာတို့ကိုပုံဥပမာများဖြင့်သွန်သင်တော်မူလျက်ဆိုသည်မှာမျိုးကြဲသူတစ်ယောက်သည်မျိုးစေ့ကြဲအံ့သောငှာထွက်သွားလေ၏။သူသည်မျိုးစေ့ကြဲရာတွင်အချို့သောမျိုးစေ့တို့သည်လမ်းပေါ်၌ကျသဖြင့်ငှက်တို့သည်လာ၍၎င်းတို့ကိုစားကြ၏။အချို့သောမျိုးစေ့တို့သည်မြေဆီလွှာပါးသောကျောက်ခံမြေပေါ်တွင်ကျသဖြင့်မြေသားတိမ်၍လျင်မြန်စွာပေါက်လာကြ၏။သို့သော်နေထွက်သောအခါ၎င်းတို့သည်ပူလောင်၍အမြစ်လည်းမတွယ်နိုင်သောကြောင့်ညှိုးခြောက်သွားကြလေ၏။အချို့သောမျိုးစေ့တို့သည်ဆူးပင်များအကြားတွင်ကျသဖြင့်ဆူးပင်တို့သည်ကြီးထွားလာပြီး၎င်းတို့ကိုဖုံးပိတ်ကြကုန်၏။အချို့သောမျိုစေ့တို့မူကားကောင်းသောမြေပေါ်တွင်ကျသဖြင့်အပင်ပေါက်လာကြသောအခါအချို့သည်အဆတစ်ရာ၊အချို့သည်အဆခြောက်ဆယ်၊အချို့သည်အဆသုံးဆယ်စီအသီးသီးကြ၏။ကြားခြင်းငှာနားရှိသောသူသည်ကြားပါစေဟုမိန့်တော်မူ၏။

***ထောက်ရှုချက်***

ဒီနေ့မှစ၍နောက်ထပ်နစ်ပတ်အထိမစ္ဆားတရားတော်မြတ်တွေထဲယေရမိအနာဂတ္တိကျမ်းမှနှုတ်ကပါတ်တော်မြတ်တွေကိုကျွန်ုပ်တို့ကြားနာကြရမှာဖြစ်တယ်။ယေရမိသည်အစပိုင်း၌ဘုရားသခင်၏နှုတ်ကပါတ်တော်ကိုကြားပြောဖို့ခေါ်တော်မူခြင်းခံရခြင်းကိုငြင်းဆန်ကာမိမိသည်အသက်အရမ်းငယ်သေကြောင်းဆင်ခြေပေးကာရှောင်ရှားကာနေခဲ့သည်။သို့သော်လည်းဘုရားသခင်သည်သူ၏ဆင်ခြေပေးခြင်းကိုလက်မခံပေ။ကိုယ်တော်၏နှုတ်ပါတ်တော်ကိုပြောကြားရန်သူအားခေါ်တော်မူခြင်းကိုပေး၍ရွေးခြယ်တော်မူသည်။ယေရမိသည်သူ၏ဘဝတစ်လျှောက်လုံး၌ဘုရားသခင်၏ခေါ်တော်မူခြင်းကိုလိုက်လျှောက်ရန်ပြဿနာအခက်အခဲများစွာကြုံတွေ့ရသော်လည်းသူသည်ဘုရားသခင်အားယုံကြည်ခြင်းကြီးမားသူဖြစ်ခဲ့သည်။ကျွန်ုပ်တို့သည်လည်းယေရမိကဲ့သို့ပင်ကျွန်ုပ်တို့မမွေးခင်ကတည်းကနေဘုရားသခင်သည်ကျွန်ုပ်တို့ကိုသိတော်မူပြီး။မွေးဖွားလာပြီးသောအခါဆေးကြောခြင်းစက္ကရာမင်းတူးအားဖြင့်သန့်ရှင်းဖြူစင်ခြင်း၊လောက၏အလင်းဖြစ်ရခြင်း၊ခရစ်တော်သခင်၏ရဟန်း၊ဘုရင်၊နှင့်ပရောဖက်မျိုးဖြစ်ရခြင်းကိုခေါ်တော်မူခြင်းခံရကြသူများဖြစ်ကြတယ်။ကျွန်ုပ်တို့သည်ကျွန်ုပ်တို့၏ဘဝအသက်တာ၌ကျွန်ုပ်တို့၏ခေါ်တော်မူခြင်းကိုလျှောက်လှမ်းရာ၌မည်မျှပင်ပြဿနာအခက်အခဲများရှိနေပါစေယုံကြည်ခြင်း၌ခိုင်မြဲအောင်ကျွန်ုပ်တို့၏ဝိညာဉ်ရေးကိုတိုးတက်ကောင်းမွန်အောင်ပြင်ဆင်ကြရမည်ဖြစ်သည်။

လူသားသည်အခြေခံအားဖြစ်ဝိညာဥ်ရေးလယ်ယာ‌မြေကောင်းဖြစ်ထွန်းရာမြေဆီလွှာနှင့်အလားသဏ္ဌာန်တူ၏။မြေဆီလွှာထဲ၌မြေဆီမြေနှစ်ရှိသကဲ့သို့လူသားထဲ၌ကျေးဇူးတော်ရှိ၏။မြေဆီလွှာသည်မထွန်မယက်လျှင်မြေဆီမြေနှစ်မတိုးပွားသကဲ့သို့လူသည်ဝိညာဥ်ရေးမကျင့်ကြံလျှင်ကျေးဇူးတော်မတိုးပွားပေ။မြေဆီမြေနှစ်တိုးပွားစေရန်မြေသြဇာ လိုအပ်သကဲ့သို့ကျေးဇူးတော်တိုးပွားအောင်ဘာသာတရားကိုင်းရှိုင်းမှုဖြစ်တဲ့ဘုရားရှိခိုးဆုတောင်းခြင်း၊စက္ကရမင်းတူးများခံယူခြင်းစသည့်အထူးဓါတ်မြေသြဇာများအပြင်သဘာဝဓါတ်မြေသြဇာများဖြစ်သည့်လူ့ဂုဏ်သိက္ခာနှင့်ဆိုင်သောစိတ်ဓါတ်မြင့်မြတ်ခြင်း၊အကျင့်စရိတ္တကောင်းမွန်ခြင်း၊အသိပညာကြွယ်ဝခြင်းတို့လိုအပ်ပါသည်။မျိုးကြဲသူသည်မြေဆီလွှာပေါ်သို့မျိုးစေ့ကိုကြဲချသကဲ့သို့ဘုရားသခင်၏နှုတ်ကပါတ်တော်ကိုယုံကြည်ခြင်းမျိုးစေ့အဖြစ်လူသားအားလုံးတို့အပေါ်သို့ကြဲချခြင်းဖြင့်ဘုရားသခင်သည်လူသားများနှင့်ရင်းနှီးစွာဆက်ဆံ၍အဆတစ်ဆယ်၊အဆတစ်ရာတိုးပွားသောသီးနှံများကိုရိတ်သိမ်းယူငင်သကဲ့သို့ကျွန်ုပ်တို့လူသားများကိုကိုယ်တော်ရှင်ထံတော်သို့ပြန်လည်သိမ်းယူတော်မူ၏။

မြေဆီလွှာအမျိုးအစားပေါ်မူတည်၍မျိုးစေ့ကြီးထွားသီးပွင့်ခြင်းမတူသကဲ့သို့ကျွန်ုပ်တို့၏ဝိညာဥ်ရေးအတွက်ပြင်ဆင်ခြင်းပေါ်မူတည်၍ယုံကြည်ခြင်းအသီးအပွင့်ရလဒ်မတူညီကြပါ။

၁။မိမိ၏မြေဆီလွှာသည်စိုက်ပျိုးရန်အတွက်မဟုတ်ဘဲလမ်းမအဖြစ်အသုံးပြုထားသောမြေဆီလွှာအမျိုးအစားဖြစ်နေပါသလော။(မိမိသည်ဝိညာဥ်ရေးအတွက်အသက်မရှင်ဘဲလောကီအပျော်အပါးအတွက်သာအသက်ရှင်နေပါသလော။)

၂။မိမိ၏မြေဆီလွှာသည်ပါးလွှာ၍စိုက်ပျိုးထွန်ယက်ရန်ခက်ခဲသောကျောက်သားများသောမြေဆီလွှာအမျိုးအစားဖြစ်နေပါသလော။(မိမိသည်ဝိညာဥ်‌ရေးခေါင်းပါးသောပြုပြင်သင်ကြားမှုခက်ခဲသော‌ခေါင်းမာတစ်ယူသန်သောသူဖြစ်နေပါသလော။)

၃။မိမိ၏မြေဆီလွှာသည်မထွန်ယက်ထားသဖြင့်ဆူးပင်ချုံနွယ်များပေါက်နေသောမြေဆီလွှာအမျိုးအစားဖြစ်‌နေပါသလော။(မိမိသည်ဝိညာဥ်ရေးမကျင့်ကြံသောနာမည်ခံဘာသာရေးသမား၊ဘာသာရေးနာမည်ခံ၍ပေါက်ကရလုပ်သောသူဖြစ်နေသလော။)

၄။မိမိ၏မြေဆီလွှာသည်ကောင်းမွန်စွာထွန်ယက်၍မြေသြဇာထည့်ထားသောမြေဆီလွှာအမျိုးအစားဖြစ်နေပါသလော။(မိမိသည်ကောင်းမွန်စွာဝိညာဥ်ရေးလေ့လာဆည်းပူ၍ကျင့်ကြံအားထုတ်၍ဘာသာတရားကိုင်းရှိုင်းပြီးကိုယ်ကျင့်သိက္ခာ၊စိတ်နေစိတ်ထား၊ဉာဏ်ပညာနှင့်ပြည့်စုံသောသူတစ်ယောက်ဖြစ်နေသလော။)

ကျွန်ုပ်တို့၏မြေဆီလွှာများသည်စတုတ္ထမြေဆီလွှာအမျိုးအစားမဖြစ်သေးလျှင်ဖြစ်လာအောင်ကြိုးစားကြပြီးဆေးကြောခြင်းစက္ကရာမင်းတူးမင်္ဂလာတော်မြတ်မှရရှိထားသောကျေးဇူးတော်များစွာမိမိ၌မြောက်များစွာသီးပွင့်ဝေဆာနိုင်ကြိုးစားကြပါစို့။