 for web4.jpg)
 for web3a.jpg)
2022-07-26 08:40:38
ဇူလိုင်လ ၂၇ ရက်
၁၇ ကြိမ်မြောက် သာမန် ဗုဓ္ဒဟူးနေ့ ၂၀၂၂
ပထမကျမ်း။ ယေရမိ ၁၅း ၁၀၊ ၁၆-၂၁
ဧဝံဂေလိကျမ်း။ ရှင်မာတေဦး ၁၃း ၄၄-၄၆
ဖာသာရ်စောကော့ကော်(SJ)
Posted by Sr.Sabina Hla Yee Win, ISR
ကောင်းကင်နိုင်ငံတော်သည်လယ်မြေ၌ဝှက်ထားသောရတနာနှင်တူ၏။ထိုရတနာကိုတွေ့သောသူသည်၎င်းကိုပြန်လည်ဝှက်ထားပြီးဝမ်းသာအားရဖြင့်သွားကာလျှင်မိမိ၌ရှိသမျှကိုရောင်းချ၍ထိုလယ်မြေကိုဝယ်ယူလေ၏။တစ်ဖန်ကောင်းကင်နိုင်ငံတော်သည်အရည်အသွေးကောင်းသောပုလဲများကိုရှာသောကုန်သည်တစ်ဦးနှင့်တူ၏။သူသည်တန်ဖိုးကြီးသောပုလဲတစ်လုံးကိုတွေ့သောအခါသွား၍မိမိ၌ရှိသမျှတို့ကိုရောင်းပြီးလျှင်ထိုပုလဲကိုဝယ်ယူလေ၏။
***ထောက်ရှုချက်***
အိုကောင်းကင်ဘုံရှင်ထာဝရဘုရားသခင်ကိုယ်တော်၏နာမတော်မြတ်၌ကိုယ်တော်၏နှုတ်ကပါတ်တော်မြတ်ကိုတွေ့ရှိ၍ကိုယ်တော်၏နှုတ်တော်ထွက်စကားတို့ကိုအကျွန်ုပ်မှီဝဲဆည်းကပ်ခြင်းဖြင့်ကျွန်ုပ်၌ဝမ်းမြောက်ရွှင်လန်းစရာအကြောင်းဖြစ်တော်မူပါ၏။(ယေရမိ ၁၅း ၁၆)
ဘုရားသခင်၏နှုတ်ကပါတ်တော်ဖြစ်သည့်သမ္မာကျမ်းစာတော်မြတ်ကိုကျွန်ုပ်တို့အများစုသည်ကက်သလစ်ပြီသစွာမိမိဖာသာဖတ်ရှုလေ့မရှိတတ်ကြပါ။(ကက်သလစ်များမိမိဖာသာကျမ်းစာဖတ်ရှုခြင်းအားနည်းသည်ကိုသာထောက်ပြခြင်းသာဖြစ်သည်။ကက်သလစ်များမိမိကိုယ်တိုင်ကျမ်းစာမဖတ်ရပါဟူ၍မရှိပါ)။ကက်သလစ်ဖြစ်လျှင်သမ္မာကျမ်းစာကိုဖတ်ရှုရရုံမျှမကကျမ်းစာလာနှုတ်ကပါတ်တော်မြတ်ကိုမှီဝဲဆည်းကပ်ရပါမည်။မှီဝဲဆည်းကပ်ခြင်းဆိုသည်မှာနှုတ်တော်ထွက်စကားကိုစားသုံးပြီးမိမိ၏အသွေးအသားထဲ၌ရှင်သန်ရခြင်းဖြစ်သည်။ထို့အတွက်ကြောင့်ကက်သလစ်အသင်းတော်အတွင်းမစ္ဆားတရားတော်မြတ်၌နှုတ်ကပါတ်တော်မြတ်များကိုကြားနားခံယူနှလုံးသွင်း၍ကိုယ်တော်မြတ်စက္ကရာမင်းတူးအားဖြင့်နှုတ်ကပါတ်တော်သည်လူ့အဖြစ်ကိုယူတော်မူသောသခင်ယေဇူး၏အသွေးတော်နှင့်သားတော်ကိုနေ့စဉ်မပြတ်ပင့်ယူကြရခြင်းဖြစ်သည်။ထို့အတွက်ကြောင့်မစ္ဆားတရားတော်မြတ်သည်ကက်သလစ်တိုင်း၏နှလုံးသားဗဟိုထာဝရအသက်၏အရင်းအမြစ်ဖြစ်ကြောင်း၊နှုတ်ကပါတ်တော်ကိုလျစ်လျှုရှုခြင်းသည်ခရစ်တော်ကိုလျစ်လျှူရှုခြင်းဖြစ်ကြောင်းသွန်သင်ထားတော်မူသည်။(မြတ်သောအယူဝါဒ၁၃၃)
ကက်သလစ်တစ်ဦးသည်နေ့စဉ်ဘုရားကျောင်းမှန်မှန်တက်ပြီးမစ္ဆားတရားတော်မြတ်ကိုထိုက်တန်စွာပါဝင်ပူဇော်ခြင်းဖြင့်သမ္မာကျမ်းစာတော်မြတ်အားလုံးနီးပါးကို၂နှစ်အတွင်းကြားနာမှီဝဲဆည်းကပ်နိုင်ခြင်းနှင့်တနင်္ဂနွေနေ့တိုင်း၃နှစ်ဆက်တိုက်ဘုရားကျောင်းမှန်မှန်တက်၍မစ္ဆားတရားတော်မြတ်ကိုထိုက်တန်စွာအာရုံပြုကြားနာမှီဝဲဆည်းကပ်ခြင်းဖြင့်သမ္မာကျမ်းစာတော်မြတ်အားလုံးအထူးသဖြင့်ဓမ္မသစ်ဧဝံဂေလိကျမ်းစာတော်မြတ်များကိုပြည့်စုံစွာကြားနာနှလုံးသွင်းပြီးဖြစ်သည်ဆိုတာကိုသတိပြုမိနိုင်ကြပါစ။
ထိုရတနာဖြစ်သည့်ဘုရားသခင်၏နှုတ်ကပါတ်တော်တရားနှင့်လူ့အဖြစ်ကိုယူတော်မူသောနှုတ်ကပါတ်တော်ဖြစ်တော်မူသောသခင်ယေဇူးသည်ကျွန်ုပ်တို့နေ့စဥ်ပူဇော်နေသောမစ္ဆားတရားတော်မြတ်တို့၌မှန့်နှင့်စပျစ်ရည်အဆင်းသဏ္ဍာန်အောက်၌ဝှက်ကွယ်နေသည်ကိုသတိပြုမိသူတို့သည်မိမိတို့နေစဉ်ရှာဖွေဆုဆောင်းနေကြသောလောကစည်းစိမ်များထက်ကိုယ်တော်မြတ်စက္ကရာမင်းတူးကိုပို၍တန်ဖိုးထားအလေးထားကြမည်ဖြစ်သည်။ကိုယ်တော်မိန့်တော်မူသော“ငါ၏အသားကိုစား၍ငါ၏သွေးကိုသောက်သောသူသည်ထာဝရအသက်ကိုရ၏။ငါသည်လည်းထိုသူကိုနောက်ဆုံးသောနေ့၌ရှင်ပြန်ထမြောက်စေမည်။”ဟူသောနှုတ်ကပါတ်တော်ကိုယုံကြည်သောသူသည်မစ္ဆားတရားတော်မြတ်၌ဝှက်ထားသောရတနာကိုတွေ့ရှိသူဖြစ်သည်။ကိုယ်တော်မြတ်စက္ကရာမင်းတူးကိုတန်ဖိုးထားသောသူသည်အရာအလုံးထက်မစ္ဆားတရားတော်မြတ်ကိုဦးထိပ်ထားအရေးတစ်ယူလုပ်ပြီးအခြားစက္ကရာမင်းတူးများကိုလည်းတန်ဖိုးထားသောသူအဖြစ်အသက်ရှင်သောသူဖြစ်လာပါလိမ့်မည်။လူအများစုသည်ဘုရားကျောင်းတက်မစ္ဆားတရားနာခြင်း၏တန်ဖိုးကိုနားမလည်၊မသိရှိသေးသောကြောင့်သာဘုရားကျောင်းတက်ရမှာကိုပျင်းရိခြင်း၊မေ့လျှော့ခြင်းနှင့်အချိန်မပေးချင်ကြခြင်းဖြစ်ကြသည်။မစ္ဆားတရားတော်မြတ်ကိုတန်ဖိုးထားသောကက်သလစ်များဖြစ်နိုင်ကြပါစေ။
