 for web4.jpg)
 for web3a.jpg)
2022-08-05 08:56:54
August 6th, Saturday
ယေဇူးသခင်အဆင်းသန်ပြောင်းလဲခြင်းပွဲတော်
ရှင်လုကာ(၉း၂၈-၃၆)
Sr. ROSA MU MU LINN, OP
Posted by Sr.Sabina Hla Yee Win, ISR
ထောက်ရှုချက်။
လူ့ဘဝအသက်တာမှာကောင်းခြင်း၊ဆိုးခြင်းဆိုတဲ့အခိုက်အတန့်ကိုတလှည့်စီကြုံကြိုက်ကြ ရတယ်။ကောင်းခြင်းတွေရောက်လာတယ်ဆိုရင်တောဒီအခြေအနေ/အချိန်ကိုလူတွေကဖမ်းဆုပ်ထားချင်တယ်၊မကုန်လွန်/မကုန်ဆုံးချင်ဘူး၊တဝကြီးကျေနပ်အောင်ခံစားချင်ကြတယ်။အကယ်၍ဆိုးခြင်းဆိုတဲ့ရှုံးနိမ့်မှုတွေ၊အထီးကျန်ဆန်မှုတွေ၊ဖိနှိပ့်ခံ/ခွဲခြားဆက်ဆံခံရတဲ့ချိန်တွေ၊ကိုယ့်ဘက်မှာမားမားမတ်မတ်ရပ်တည်ပေးမည့်သူမရှိတဲ့အချိန်၊ကိုယ့်ကိုလူတွေနေရာမပေး/အကြင်နာတရားမထားတဲ့အချိန်တွေဆိုရင်ဘဝဟာခါးသီးလိုက်တာပေါ့။ဒီအခိုက်ကိုဘဝရဲ့အမှောင်ကျချိန်လို့တောင်သတ်မှတ်ပြီးနောင်အခါများဒီလိုအဖြစ်မျိုးနဲ့မကြုံရပါစေလိုကြောင်းနှင့်အမြန်ဆုံးအဆုံးသတ်နိုင်သောအချိန်အခါကိုသာလိုလားတမ်းတကြတယ်။
ဒီကနေ့နှုတ်ကပါတ်တော်မှာလည်းရှင်ပေတရု၊ရှင်ယောဟန်နှင့်ရှင်ယာကုပ်တို့(၃)ဉီးဟာတောင်ပေါ်အရပ်မှာယေဇူးသခင်ဆုတောင်းချိန်သူ့ရဲ့မျက်နှာတော်အသွင်ပြောင်းလဲသွားပြီးအဝတ်တော်ဖြူဖွေးတောက်ပလာတဲ့ဘုရားသခင်ရဲ့ဘုန်းဂုဏ်တော်အရောင်အဝါ/အလှတရားကိုတွေ့မြင်ခဲ့ကြတယ်။ပွင့်လင်းရိုးသားတဲ့ပေတရုဟာ“ဤအရပ်သည်တပည့်တော်တို့အဖို့နေရန်အလွန်ကောင်းပါ၏”လို့တုံ့ပြန်ခဲ့တယ်။ပေတရုဟာဒီမင်္ဂလာရှိတဲ့နေရာ/အခိုက်အတန့်မှာပဲနေရတာကောင်းမြတ်တယ်၊အဆင်ပြေတယ်၊ဖြစ်နိုင်ရင်ဒီအချိန်ကိုမလွန်သွားစေချင်တဲ့သူ့ရဲ့ခံစားမှုဟာအထင်းသားတွေ့မြင်ရပါတယ်။အခြားတစ်ဘက်မှာဂျေရုဆလင်မှာဖြစ်လာမည့်ယေဇူးရဲ့ဒုက္ခစရိယာခံခြင်း/အသေခံခြင်းအကြောင်းကိုတော့ပေတရုအနေနဲ့လက်မခံနိုင်ခဲ့တာကိုလည်းတွေ့မြင်ခဲ့ကြရပါတယ်။သို့သော်ဒီအချိန်အခါကိုပေတရုအနေနဲ့တားဆီးနိုင်တဲ့အာဏာနဲ့တန်ခိုးစွမ်းအားမရှိခဲ့ပါဘူး။အရာအားလုံးဟာသူ့ဟာနဲ့သူ၊အချိန်နဲ့အခါနဲ့လည်ပတ်နေကြတယ်ဆိုတာနားလည်ဖို့တော့လိုအပ်တယ်။အဆင်ပြေတဲ့အရပ်မှာ၊မင်္ဂလာရှိတဲ့အရပ်မှာသာလူတွေရှင်သန်ချင်ကြတာဟာသဘာဝတရားပါ။
ထောက်ရှုစရာအချက်ကတော့ခရစ်တော်ဟာဘာကြောင့်သူ့ရဲ့ဒုက္ခစရိယာ/သေခြင်းတရားမတိုင်မီသူတပည့်တော်တွေကိုဘုရားရဲ့နိုင်ငံတော်/ဘုန်းဂုဏ်တော်ကြီးမြတ်မှုကိုမြည်းစမ်းစေခဲ့တာလဲ?အမှောင်/ခါးသီးမှု/ကြမ်းတမ်းမှုတွေကိုရင်ဆိုင်ဖြတ်သန်းပြီးမှပဲအလင်း/ပျော်ရွင်မှု/ပြည့်ဝစုံလင်မှုဆိုတာရောက်ရှိလာမယ်ဆိုတာကိုနားလည်နိုင်ဖို့မီးမှောင်းထိုးပြနေတာလား?မျှော်လင့်ချက်ပေးနေတာလား?ခွန်အားပေးနေတာလားဆိုတာလည်းတွေးစရာပါပဲ။ဒီကနေ့သခင်ယေဇူးရဲ့အဆင်းသန်ပြောင်းလဲခြင်းပွဲနေ့မှာဘုရားရဲ့အဆင်းသန်နဲ့အညီဖန်ဆင်းခံခဲ့ရကျွန်ုပ်တို့တတွေလည်းဘယ်လိုအခြေအနေမျိုးမှာပဲဖြစ်ဖြစ်တန်ဖိုးရှိပြီးလှပတဲ့လူ့ဂုဏ်သိက္ခာတရားအတိုင်းပြည့်ပြည့်ဝဝရှင်သန်နေထိုင်နိုင်ဖို့ရန်အတွက်နဲ့အပြစ်၊အတ္တဆန်မှု၊ကိုယ်ကျင့်တရားဖောက်ပြန်မှုတွေကြောင့်မူရင်းဘုရားပေးတဲ့ရွှေပုံသန်တော်/လူ့ဂုဏ်သိက္ခာကိုဆုံးရှုံးနေကြသူ၊ပိုင်ဆိုင်ခွင့်မရတဲ့ကျွန်ုပ်တို့ရဲ့ညီအစ်ကိုမောင်နှမတွေဟာလည်းကျွန်ုပ်တို့ရဲ့ပတ်ဝန်းကျင်မှာအများအပြားပါပဲ။သူတို့အတွက်လည်းအမှတ်ရဆုတောင်းပေးရင်းနည်းလမ်းတခုခုဖြင့်လက်တွဲကူညီကြပါစို့....
