 for web4.jpg)
 for web3a.jpg)
2022-08-06 07:24:26
19th week of Sunday in Ordinary Time
ရှင်လုကာ(၁၂း၃၅-၄ဝ),
Sr. DOMINICA OP
Posted by Sr. Sabina Hla Yee Win, ISR
ထောက်ရှုချက်။
ကျွန်ုပ်တို့လူသားအယောက်စီတိုင်းကိုဘုရားရှင်ကလုံလောက်တဲ့အချိန်တွေ၊အခွင့်အရေးတွေကိုမျှတစွာ၊တူညီစွာပေးထားခဲ့ပါတယ်။သို့သော်ရှင်သန်ခြင်းအသက်တာမှာဘာကြောင့်ကွဲပြားခြားနားသွားကြရတာလဲ?ကိုယ်ကိုယ်တိုင်အချိန်ကိုအကျိုးရှိစွာအသုံးမချတတ်လို့ပဲလားဒါမှမဟုတ်တစ်စုံတစ်ရာရဲ့ထိန်းချုပ်မှုကြောင့်ဘဝမှာရှင်သန်ခွင့်လမ်းနဲ့ဝေးနေရတာလားဆိုတာမေးစရာမေးခွန်းတစ်ခုပါပဲ။ဒီနေ့ကျမ်းစာတော်မြတ်ထဲမှာသခင်ခရစ်တော်ဟာသခင့်အပေါ်မှာသစ္စာရှိတဲ့အစေခံကောင်းတစ်ဦးရဲ့ပုံဉပမာကိုအသုံးပြုပြီးသူရဲ့တပည့်တော်တွေကိုမိမိကိုယ်ကိုအဆင်သင့်ရှိသူအဖြစ်အမြဲနေပါလို့သတိပေးခဲ့တယ်။ကျွန်ုပ်တို့တစ်ဦးချင်းစီအတွက်လည်းသတိပေးခြင်းသို့မဟုတ်စိတ်ခေါ်မှုတစ်ခုလို့လည်းမှတ်ယူနိုင်ပါတယ်။သစ္စာရှိတဲ့အစေခံတစ်ယောက်ဟာသူ့သခင်ရဲ့ပြန်လာခြင်းကိုစိတ်ရှည်ခြင်းနဲ့စောင့်တယ်။နွေးထွေးစွာနဲ့ကြိုဆိုတယ်။အစေခံခြင်းအမှုကိုပြုတယ်။ညနက်နေပြီ၊နောက်ကျနေပြီဆိုတဲ့ဆင်ခြင်တွေပေးပြီးတာဝန်ပျက်ကွက်သူတွေမဟုတ်ကြဘူး။အလားတူစွာဘုရားသခင်ကသူ၏ချစ်သားသမီးတွေသူ့ရဲ့ပြန်လာခြင်းအချိန်ကိုပညာသတိရှိစွာနဲ့စောင့်စားစေလိုတယ်။လူသားတွေအနေနဲ့စောင့်နေရတယ်ဆိုတဲ့အလုပ်ဟာအခက်အခဲဆုံး၊မလုပ်ချင်ဆုံး၊စိတ်မရှည်ဆုံးသောအရာတစ်ခုဖြစ်တယ်။သို့သော်ဘုရားရှင်ကိုစောင့်စားရခြင်းဟာကျွန်ုပ်တို့အတွက်အချည်းအနှီးသက်သက်မဟုတ်ပါ။ကျွန်ုပ်တို့တစ်ဦးစီကိုတနေ့နေ့မှာပြန်လည်ခေါ်ဆောင်သွားပြီးသူနှင့်အတူကောင်းကင်ရွှေနိုင်ငံတော်မှာပျော်ရွင်စွာနဲ့ထာဝရစံမြန်းခွင့်ကိုပေးမှာဖြစ်တယ်။ဒါဟာလူသားအားလုံးအတွက်သူ့ရဲ့ခိုင်မာတဲ့ကတိတော်ပါပဲ။ဒီဆုလာဒ်ကြီးကိုအဘယ်သူကငြင်းနိုင်ပါအုံးမလဲ?
ထောက်ရှုတွေးတောစရာအနေဖြင့်ဘုရားရှင်ရဲ့မျက်မှောက်တော်မှာကျွန်ုပ်ဟာဘယ်လိုလူစားမျိုးလဲ?အမြဲတမ်းနိုးကြားတက်ကြွအဆင်သင့်ဖြစ်နေသူလားသို့မဟုတ်လုပ်သင့်လုပ်ထိုက်တာကိုသိပါလျက်နဲ့အမြဲတမ်းအချိန်တွေဖြုန်းတီးနေတတ်သူလား၊ဆင်ခြေပေးမှုတွေနဲ့ရှောင်ဖယ်နေတတ်သူလား?ယခုသခင်ခရစ်တော်ကိုသင့်ဘဝထဲကိုကြိုဆိုလက်ခံဖို့အတွက်ဆိုရင်သင်ဘာလုပ်ရမှာလဲ/ဘာလုပ်သင့်ပြီလဲ?
