 for web4.jpg)
 for web3a.jpg)
2022-08-09 08:53:55
10.8.2022
ပထမကျမ်း။ ။ ၂ ကော် ၉: ၆-၁၀
ဧဝံဂလိကျမ်း။ ။ ယောဟန် ၁၂: ၂၄-၂၆
Bro. John Theresan O.P
Posted by Sr.Sabina Hla Yee Win,ISR
ထောက်ရှုချက်
ဤနေ့သည်သာသနာတော်ကြီးမှဆင်းရဲသားများကိုအထူးကာကွယ်စောင့်သူစိန့်လောရင်းစ်ပွဲနေ့ကိုဂုဏ်ပြုကျင်းပသောနေ့ဖြစ်သည်။စိန့်လောရင့်စ်၏ဘဝအကြောင်းကိုလေ့လာကြည့်သည့်အခါယနေ့ထောက်ရှုရမည့်နှုတ်တော်ထွက်စကားနှင့်ကိုက်ညီသောအချက်သုံးချက်ရှိသည်ကိုတွေ့ရှိရသည်။ပထမအချက်။မြေပေါ်၌ကျသောမျိုးစေ့သည်မသေမပျက်ဘဲရှိသော်၎င်းသည်တစ်စေ့တည်းအဖြစ်ဆက်လက်တည်ရှိပြီးသေကျေပျက်စီးလျှင်မူကားများစွာသောအသီးတို့ကိုသီးစေတတ်၏။ထိုကျမ်းပိုဒ်လေးသည်ခရစ်တော်ကိုသာရည်ညွှန်းထားသည်ထင်ရသော်လည်းစိန်လောရင့်နှင့်အခြားသောဓမ္မအာဇာနည်အပေါင်းတို့သည်လည်းမိမိတို့၏ယုံကြည်ခြင်းအတွက်မိမိတို့အသက်ကိုရဲရဲဝံ့ဝံ့စတေးခံခဲ့ကြခြင်းကြောင့်ထိုကျမ်းပိုဒ်သည်ပိုမိုထင်ပေါ်ကျော်ကြားလာခဲ့သည်။စိန့်လောရင်းစ်နှင့်ရှေးဦးထောင်ပေါင်းများစွာသောခရစ်ယာန်အပေါင်းတို့သည်လည်းမိမိတို့၏ယုံကြည်ခြင်းကိုအနက်ရှိုင်းဆုံးသောနှလုံးသားထဲတစ်နေရာ၌သိမ်းဆည်းထားပြီးယုံကြည်ခြင်းအတွက်မြေကြီးပေါ်သွေးမြေခသည်အထိအသက်ကိုပေးခဲ့ကြလေသည်။ဤကဲ့သို့မြေကြီးပေါ်သို့ကျခဲ့သည့်ဓမ္မအာဇာနည်တို့၏သွေးသည်မြေပေါ်၌ကျပြီးမပျက်စီးသောမျိုးစေ့မဟုတ်ပဲသေကျေပျက်စီးသောမျိုးစေ့နှင့်တူလေ၏။ထိုသို့သောမျိုးစေ့သည်မျှော်လင့်ထားသည်ထက်များစွာသောအသီးကိုသီးစေတတ်လေသည်။
ဒုတိယအချက်။မိမိအသက်ကိုချစ်သောသူသည်အသက်ကိုဆုံးရှုံးလိမ့်မည်။ဤလောက၌မိမိအသက်ကိုမုန်းသောသူသည်ထာဝရအသက်ကိုရလိမ့်မည်။စိန်လောရင်းစ်သည်မိမိ၏အသက်ကိုမုန်းတီးသည်ဟုမဆိုနိုင်သော်လည်းသူသည်မိမိအသက်ထက်ဆင်းရဲသားများကိုပို၍ချစ်ခဲ့သည်ဟုဆိုနိုင်ပါသည်။မိမိ၏အသက်ကိုမငဲ့ဘဲဆင်းရဲသားတို့၏ဘဝကိုခုခံကာကွယ်ပေးသည့်ရဟန္တာတစ်ပါးလည်းဖြစ်ခဲ့လေသည်။တစ်နေ့တွင်စိန်လောရင်းစ်သည်ဆင်းရဲသားများကိုဧကရာဇ်ဘုရင်မင်းဗာလေးရီယန်အားလက်ညိုးညွှန်ပြပြီးသူတို့သည်သာသာသနာတော်၏တန်ဖိုးအရှိဆုံးသောရတနာများဖြစ်သည်ဟုထွက်ဆိုရင်းထိုသို့သောရပ်တည်ချက်အတွက်အသတ်ခံခဲ့ရလေသည်။နောင်တစ်ချိန်တွင်ခရစ်ယာန်ဧကရာဇ်မင်းကွန်စတန်တင်းသည်စိန်လောရင်းစ်၏သန့်ရှင်းဖြူစင်ခြင်းကိုလေးစားဂုဏ်ပြုအားဖြင့်စိန်လောရစ်၏အုတ်ဂူပေါ်တွင်ခမ်းနားထည်ဝါလှသည့်ဘုရားကျောင်းတောကြီးတစ်ဆောင်ကိုတည်ဆောက်ခဲ့လေသည်။သာသနာတော်ကြီးသည်လည်းမိမိ၏အသက်ကိုသာသနာတော်အတွက်ပေးခဲ့သောဓမ္မအာဇာနည်စိန့်လောရင်းစ်သည်ကောင်းကင်နိုင်ငံတော်၌ခရစ်တော်နှင့်အတူထာဝရအသက်ရရှိကြောင်းလက်ခံယုံကြည်လေ၏။
သတိယအချက်။ငါ၏အမှုတော်ကိုထမ်းဆောင်လျှင်ငါ့နောက်သို့လိုက်ရမည်။ငါရှိရာအရပ်၌လည်းငါ၏အစေခံရှိလိမ့်မည်။တစ်နေ့သောစိန်လောရင်းစ်၏ပွဲနေ့၌စိန်သြဂုတ်စတင်းကဤသို့တရားဟောလေ၏။“သူ့ဘဝ၌ခရစ်တော်ကိုချစ်ခဲ့သည်။ခရစ်တော်၏ခြေရာတော်ကိုလိုက်ရင်းအသက်စတေးခြင်းခံခဲ့ရလေသည်။”စိန်ပီတာကလည်းသူ၏သြဝါဒပထမစောင်(၂း၂၁)တွင်“ခရစ်တော်သည်ငါတို့အတွက်ဒုက္ခခံတော်မူသည်ဖြစ်၍ခြေတော်ရာကိုလိုက်လျှောက်စေခြင်းငှာပုံသက်သေကိုထားတော်မူပြီ”။ခရစ်တော်ရှိသည့်အရပ်တွင်စိန်လောရင်းစ်ရှိကြောင်းကိုဤကျမ်းပိုဒ်ကပေါ်လွင်ထင်ရှားစေသည်။ကျွန်ုပ်တို့သည်လည်းခရစ်တော်၏ခြေရာတော်ကိုလိုက်မည်ဆိုလျှင်ခရစ်တော်သည်ကျွန်ုပ်တို့နှင့်အတူရှိပါလိမ့်မည်။ဆိုလိုသည်မှာခရစ်တော်နှင့်အတူဒုက္ခခံယူခြင်း၊ခရစ်တော်နှင့်အတူအသေခံခြင်းနှင့်ခရစ်တော်နှင့်အတူရှင်ပြန်ထမြောက်ပြီးသူနှင့်အတူထာဝရအသက်စံစားရပါလိမ့်မည်။ယုံကြည်သူအပေါင်းတို့...ယနေ့ခေတ်လူသားတို့သည်စည်းစိမ်ကိုသာလိုက်စားပြီးမိမိအတွက်ရနိုင်သမျှစုဆောင်းထားရမည်ဟုသောအသိစိတ်ဖြင့်သာအသက်ရှင်နေထိုင်ကြသည်။ထို့ကြောင့်သူတို့အတွက်စွန့်လွတ်၊ပေးကမ်းလိုသောဆန္ဒအလျင်းမရှိကြပေ။သာသနာတော်သည်ပေးကမ်းခြင်းတွင်စံပြုထိုက်သောစိန်လောရင်းစ်၏ပွဲနေ့ကိုကျင်းပခြင်းအားဖြင့်ဤသူတော်စင်ကဲ့သို့စွန့်လွတ်ပေးဆပ်တတ်ရန်ကျွန်ုပ်တို့ကိုဖိတ်ခေါ်နေသည်။မိမိ၏အသက်ကိုပဓာနမထားဘဲဘုရားအတွက်ပေးကမ်းစွန့်ကြဲသောသူသည်ဘုရားသခင်ကကြီးမြတ်သောဆုလဒ်ကိုပေးတော်မူလိမ့်မည်။ချစ်လှစွာသောမိတ်ဆွအပေါင်းတို့...မမြဲသောလောစည်းစိမ်ဥစ္စာကိုစုဆောင်းခြင်းမပြုပဲဝေမျှပေးကမ်းခြင်းအားဖြင့်စိန်လောရင်းစ်ကဲ့သို့ကောင်းကင်နိုင်ငံတော်၌စည်းစိမ်ဘဏ္ဍာကိုစုဆောင်းကြပါစို့။
