 for web4.jpg)
 for web3a.jpg)
2022-11-05 02:26:34
ရဟန္တာအပေါင်းတို့၏ပွဲ (၂၀၂၂)
တိုလီမုတ်စ ဩဝါဒ (မာတေး ၅:၁-၁၂)
ဖာသာရ် ဘယ်နာဒီးနိုနဲနယ်
Posted by Sr. Sabina Hla Yee Win, ISR
ဗျာဒိတ်တော်ကျမ်း (၈:၄) က “ထိုအခါ သူတော်စင်တို့၏ ဆုတောင်းပတ္ထနာများသည် ကောင်းကင်တမန်တော်တို့၏ လက်ထဲရှိ လော်ဗန်အခိုးအငွေ့များနှင့်အတူ ဘုရားသခင်၏ ရှေ့မှောက်တော်သို့ တက်လေ၏ . . “ လို့ဖော်ပြထားပါတယ်။ ဒီကျမ်းပိုဒ်လေးက ယုံကြည်သူတွေရဲ့ အသက်တာမှာ သူတော်စင်များရဲ့ကဏ္ဍကို အသိအမှတ်ပြုဖို့နဲ့ ၎င်းတို့ရဲ့ ကြားဝင်ဆုပန်ပေးမှုကို ရှာဖွေရယူကြဖို့ သတိပေးသွန်သင်နေပါတယ်။ ဒါကြောင့် . . . ဒီခံယူချက်နဲ့ ကနေ့တိုင်အောင် ကက်သလစ်အသင်းတော်ကြီးက နှစ်စဉ် နိုဝင်ဘာလ (၁) ရက်နေ့မှာ ရဟန္တာအပေါင်းတို့ရဲ့ပွဲကို ဂုဏ်ပြုကျင်းပလာခဲ့ပါတယ်။ ခရစ်ယာန်အားလုံးဟာ သူတော်စင်များဖြစ်ကြဖို့အတွက် နိူးဆော်ဖိတ်ခေါ်ခံရကြတာကို သမ္မာကျမ်းစာက အခုလို ရည်ညွှန်းဖော်ပြထားတယ်။ “သင်တို့သည် ဘုရားသခင်၏ နာမတော်ကိုထောက်၍ သူမ (အမူတော်ဆောင် ဖိုဘီ) အား သန့်ရှင်းသောသူတို့ကို လက်ခံသကဲ့သို့ လက်ခံကြ၍ သင်တို့ထံမှ သူမ လိုအပ်မည့်အကူအညီမှန်သမျှကို ပေးကြလော့ . . ” (ရောမ ၁၆:၂)။ “ကိုယ်တော်၏ ဆုလက်ဆောင်များသည်ကား အချို့ကို တမန်တော်များအဖြစ်၊ အချို့ကို ပရောဖက်များအဖြစ်၊ အချို့ကို ဧဝံဂေလိဟောပြောသူများအဖြစ်၊ အချို့ကို သိုးထိန်းအရာ၌ လုပ်ဆောင်သူများအဖြစ်၊ အချို့ကို သင်ကြားပေးသူဆရာများအဖြစ် ခန့်ထားတော်မူခြင်းပင် ဖြစ်၏။ ဤသို့ပြုလုပ်ခြင်းမှာ ကိုယ်တော်သည် သူတော်သူမြတ်တို့အား ခရစ်တော်၏ခန္ဓာတော်တည်းဟူသော အသင်းတော်ကို တည်ထောင်သောအမှုတော်၌ အတူတကွ လုပ်ဆောင်နိုင်ရန် ပြင်ဆင်ပေးခြင်း ဖြစ်၏ . . “ (ဧဖက် ၄:၁၁-၁၂)။ “သင်တို့အကြားတွင် ကာမဂုဏ်လိုက်စားခြင်း၊ အမျိုးမျိုးသော ညစ်ညူးခြင်းများနှင့် လောဘကြီးခြင်းတို့ မရှိစေကြနှင့်။ ယင်းတို့သည် သူတော်သူမြတ်တို့နှင့် မအပ်စပ်ပေ . . “ (ဧဖက် ၅:၃)။ အထက်ပါကျမ်းပိုဒ်(၃)ခုကို အမြဲထောက်ရှုခြင်းဖြင့် မိမိတို့ရဲ့ခရစ်ယာန်ဘဝခေါ်တော်မူခြင်းကို အစဉ်မျက်မှောက်ပြုနိုင်ပါလိမ့်မယ်။ ရဟန္တာများပွဲနေ့က မိမိတို့တစ်ဦးစီကို ယုံကြည်ခြင်းအသက်တာခရီးမှာ သန့်ရှင်းစုံလင်ခြင်းဆီသို့ အရောက်လှမ်းဖို့ တာဝန်ရှိကြောင်း သွန်သင်နေပါတယ်။ သန့်ရှင်းစုံလင်ခြင်းဟာ ရှင်ပေါလူရဲ့ ခံယူချက်အရ ခရစ်တော်၌၊ ခရစ်တော်နဲ့အတူ နေထိုင်ရှင်သန်ခြင်း ဖြစ်တယ်။ “ယခု အသက်ရှင်လျက်ရှိသည်မှာ ငါမဟုတ်တော့ဘဲ ငါ၌ ကိန်းဝပ်တော်မူသော ခရစ်တော် ဖြစ်၏ . . (ဂါလာဆီး ၂:၂၀)။ ဒါ့အပြင် . . ဖန်ဆင်းခြင်းအသစ် ဖြစ်တယ်။ “ထိုကြောင့် ခရစ်တော်၌ ရှိသောသူသည် ဖန်ဆင်းခြင်းအသစ် ဖြစ်လေ၏ . . (၂-ကော် ၅:၁၇)။ တနည်းအားဖြင့်တော့ သန့်ရှင်းစုံလင်ခြင်းဆိုတာ ခရစ်တော်ရှင်ရဲ့ သန့်ရှင်းစုံလင်ခြင်းကို ပုံတုယူကျင့်ကြံခြင်း ဖြစ်တယ်။ အခြားသောခရစ်တော် (another Christ)ဖြစ်လာခြင်းဆိုတာက အားလုံးအတွက်က ရေရှည်အားထုတ်ကြိုးပမ်းမှုဖြစ်တယ်။ ဆိုတော့က ရဟန္တာအသီးသီးမှာ ခြားနားသော ခရစ်တော်ရဲ့အသွင်သဏ္ဍာန်နဲ့ တူညီခြင်းအမျိုးမျိုးကို လေ့လာတွေ့ရှိနိုင်တယ်။ ခရစ်တော်ရှင်ကို အတုယူကြတဲ့ ရဟန္တာတို့ရဲ့ သွင်ပြင်လက္ခဏာတွေကတော့ - (၁) ရဟန္တာတို့မည်သည်ကား ဘုရားရှင်ကို ကြည်ညိုချစ်ခင်သူများတည်း။ (၂) ရဟန္တာတို့မည်သည်ကား လူအပေါင်းတို့ကို လေးစားတန်ဖိုးထားကြသူများ ဖြစ်သတည်း။ (၃) ရဟန္တာတို့မည်သည်ကား ဘုရားရှင်၌ အကြွင်းမဲ့ယုံကြည်၍ ရဲရင့်စွန့်စားသူများတည်း။ (၄) ရဟန္တာတို့မည်သည်ကား နိမ့်ချသူများဖြစ်သတည်း။ (၅) ရဟန္တာတို့မည်သည်ကား တောင်းဆုပြုသောသူများတည်း။ (၆) ရဟန္တာတို့ မည်သည်ကား နောင်တယူသော အပြစ်သားများပင်တည်း။ 
Daily Reflection
