 for web4.jpg)
 for web3a.jpg)
2022-12-17 08:36:41
အာဒ်ဝင်တူးစတုတ္ထတနင်္ဂနွေနေ့ (A)
တိုလီမုတ်စဩဝါဒ (မာတေးဦး ၁:၁၈-၂၄)
Rev.Fr. Bernardino Ne Ne
Posted by Sr. Benedetta. Myat Hnin Nwe(ISR)
ယေဇူးဘုရားရှင်က“ကောင်းကင်နိုင်ငံတော်သည် အကြမ်းဖက်တိုက်ခိုက်ခြင်းကိုခံရ၏”(မာတေး ၁၁:၁၂)လို့ မိန့်ဆိုထားခဲ့တယ်။ကယ်တင်ရှင်ရဲ့ရှေ့တော်ပြေးယောဟန်ဘတ္တဇံကသူ့သခင်ကြွမြန်းလာတော်မှုခြင်းလမ်းကိုကူညီပြင်ဆင်ပေးခဲ့ချိန်မှာ သူ့အသက်ကို စွန့်လွတ်ပေးဆက်ခဲ့ရတယ်။ကနေ့ဧဝံဂေလိကျမ်းသရုပ်ဆောင်များဖြစ်ကြသူ မာရိယာနဲ့ဂျိုးဇက်တို့လည်း ဘုရားရှင်ရဲ့နိုင်ငံတော်အတွက် များစွာဒုက္ခဆင်းရဲခြင်းတွေရင်ဆိုင်ခံစားခဲ့ရပြီး လူသားတွေထံဘုရားရှင်ကို ယူဆောင်လာပေးခဲ့တယ်။(၁)စိန်ခေါ်မှုတွေ၊ ဆင်းရဲဒုက္ခတွေရင်ဆိုင်ဖို့ အသင့်ရှိခြင်း၊ဒုက္ခဝေဒနာဆိုရင်ဝယ်ချင်သူမရှိ၊သုခချမ်းသာဆိုရင်လည်းရောင်းချင်သူမရှိ။’မာရိယာနဲ့ဂျိုးဇက်တို့နှစ်ဦးရဲ့ယုံကြည်ခြင်းခရီးလမ်းဟာဆင်းရဲဒုက္ခတွေ၊အကြမ်းဖက်မှုတွေပြည့်နှက်နေတဲ့ကန္တာရခရီးလမ်းပါ။ ကောင်းကင်နိုင်ငံတော်ကို တန်ဖိုးထားရှာဖွေကြသောသူတိုင်းရဲ့ခရီးလမ်းဆိုတာ ဒီဒုက္ခကားတိုင်လမ်းမှတစ်ပါး အခြားလမ်းမရှိနိုင်။ မာရိယာနဲ့ ဂျိုးဇက်တို့နည်းတူ ယေဇူးရှင်ရဲ့ နောက်လိုက်သားအားလုံးဟာ အရာရာကို အသစ်ပြုပြင်ဖန်ဆင်းတော်မူတတ်သောကိုယ်တော်ရှင်ကိုသာရှာဖွေကြပြီး လမ်းခရီးတစ်လျှောက် စိန်ခေါ်မှုနဲ့ ဆင်းရဲဒုက္ခတွေကိုရင်ဆိုင်ကျော်လွှားကြရပါမယ်။(၂)ဘုရားရှင်ရဲ့အလိုတော်နဲ့လိုက်လျောညီညွှတ်စေခြင်း။ဂျိုးဇက်ကမာရိယာရဲ့အရှက်ကိုဖုံးကွယ်ပေးဖို့အတွက် သူမကို တိတ်တဆိတ်စွန့်ခွါဖို့ တွေးတောကြံစည်ခဲ့တယ်။ခုလိုရွေးချယ်လုပ်ဆောင်ခြင်းကဂျိုးဇက်အနေနဲ့ မာရိယာအတွက်အကောင်းဆုံးငဲ့ညာစဉ်းစားပေးခြင်းလို့ယူဆခဲ့တယ်။ဒါပေမယ့် ဘုရားသခင်ကအခြားအကြံအစည်သစ် ရှိခဲ့တယ်။ဘဝမှာ ဘုရားရှင်က မိမိတို့ရဲ့မူလအကြံအစည်တွေကိုပြောင်းလဲပစ်တာမျိုး ကြုံတွေ့ခဲ့ဖူးကြလိမ့်မယ်။အဲ့လိုအချိန်မျိုးမှာမိမိတို့အနေနဲ့ ရုန်းကန်ရှင်သန်ခဲ့ကြရလိမ့်မယ်။သို့ပင်ငြားလည်း ဘုရားရှင်ကအရာရာကို အထူးသဖြင့်မိမိတို့ရဲ့ကြံစည်လုပ်ဆောင်မှုများကို အသစ်ပြုပြင်ဖော်ဆောင်ခဲ့တာကို ပြန်လည်လို့ သတိပြုဆင်ခြင်နိုင်ပါတယ်။(၃) ကယ်တင်ခြင်းစီမံကိန်းကြီးမှာ ဘုရားရှင်က သင့်ကို ပါဝင်ပူးပေါင်းစေချင်တဲ့ကဏ္ဍမှာ အကောင်းဆုံးဆက်ကပ်ပါဝင်ခြင်း၊ဂျိုးဇက်က မာရိယာအဖြစ်ကို စာနာပေးတယ်လို့ ယူဆခဲ့တယ်။တကယ်တော့ ဘုရားရှင်ကဂျိုးဇက်နဲ့မာရိယာတို့နှစ်ဦးကို စာနာဖေးမနေခြင်းသာဖြစ်တယ်။အကြောင်းရင်းကတော့ ဘုရားရှင်ကသူတို့နှစ်ဦးကို ကယ်တင်ခြင်းသမိုင်းပြဇတ်ရှည်ကြီးမှာပါဝင်သရုပ်ဆောင်ကြဖို့ကမ်းလှမ်းနေခြင်းဖြစ်တယ်။ ဘုရားသခင်ကသင့်ကိုလည်း ကယ်တင်ခြင်းဇတ်တော်ကြီးမှာပါဝင်အသုံးတော်ခံဖို့အလိုရှိတော်မူတယ်။ဘဝသက်တာမှာ ဘုရားရှင်ကသင့်အားဖြင့် ကြီးမြတ်သောအမှုတော်ကိုဖြည်းဆည်းလုပ်ဆောင်ဖို့အတွက်သင့်အနေနဲ့ကြည်ဖြူခွင့်ပြုနိုင်မလား။(၄) ကယ်တင်ရှင်ကြွလာရာလမ်း ဖြောင့်တန်းစေဖို့အတွက် ရဲဝံ့စွာ ဆက်လက်ပြင်ဆင်ခြင်း၊ကယ်တင်ရှင်ဘုရားက ကျေးဇူးတော်အားဖြင့် မိမိတို့နဲ့ နီးစပ်တည်ရှိနေကြောင်းကို အမြဲနှလုံးသွင်းဆင်ခြင်ကြရမယ်။ အထူးသဖြင့် ကိုယ်တော်မြတ်မင်္ဂလာအားဖြင့် နီးစပ်ရှင်သန်နေတယ်။ကိုယ်တော်မြတ်မင်္ဂလာကို တန်ဖိုးထားပြီးပုံမှန်သွားရောက်ပင့်ယူကြပါ။သင့်နဲ့အတူကိုယ်တော်ရှင်အားပေါင်းစည်းရှင်သန်ခွင့်ကိုပေးပါ။ကိုယ်တော်ရှင်ဟာ သင့်ဘဝမှာသင့်နဲ့အတူပါရှိခဲ့ရင်ဒုက္ခအခက်ခဲများ၊စုံစမ်းနှောက်ယှက်မှုများ၊ အထင်မြင်လွဲမှားမှုများနဲ့ အခြားသောအမှုကိစ္စအားလုံးတို့ကို ပျော်ရွှင်ကြည်နူးဖွယ်ကောင်းသော ဇတ်သိမ်းခန်းသို့ စောင့်ရှောက်ပို့ဆောင်ပေးပါလိမ့်မယ်။(၅) မျှော်လင့်ခြင်းကင်းမဲ့သောနေရာမှာ မျှော်လင့်ခြင်းသံတမန်ဖြစ်ခြင်း၊မာရိယာနည်းတူ နာကြင်ကြေကွဲစရာနဲ့ စိတ်ပျက်ဖွယ်ရာကြားမှာမျှော်လင့်ခြင်းကိုဆောင်ကြည်းပေးဖို့သင်ဟာအသင့်ရှိပါသလား။မိမိတို့ရဲ့လိုအင်ဆန္ဒများကိုဖယ်ရှားစွန့်လွတ်ပြီး ကိုယ်တော့်အလိုတော်ကိုဦးစားပေးလုပ်ဆောင်ခဲ့တဲ့အချိန်မျိုးမှာမိမိတို့ စိတ်ပျက်ဝမ်းနည်းခဲ့မိလေသလား။သင့်ဘဝသက်တာကို ကမ္ဘာလောကကြီးအတွက်ချစ်ခြင်းလက်ဆောင်မွန်လေးတစ်ခုဖြစ်စေပါလား။အကြောင်းရင်းကတစ်စုံတစ်ယောက်ဟာ ယင်းလက်ဆောင်လေးကိုမျှော်လင့်နေတယ်။တစ်စုံတစ်ယောက်ဟာယင်းလက်ဆောင်ကို ရရှိပိုင်ဆိုင်ဖို့စိတ်ပြင်းပြနေတယ်။တစ်စုံတစ်ယောက်ဟာ ယင်းလက်ဆောင်ကိုခံယူဖို့အထူးလိုအပ်နေတယ်။ညီအစ်ကိုမောင်နှမအပေါင်းတို့၊‘လောကီနိုင်ငံကို ဘုရားရှင်နိုင်ငံတော်အဖြစ်ပြောင်းလဲဖန်တီးနိုင်အောင်အတူပူပေါင်းပြီးဆက်ကပ်လုပ်ဆောင်ဖို့ ကျွန်ုပ်ကို စေလွတ်တော်မူပါသခင်’ဆိုတဲ့ တောင်းဆုကိုအစဉ်ရွတ်ဆိုပူဇော်ကြပါစို့။
