 for web4.jpg)
 for web3a.jpg)
2022-12-31 09:13:24
ဇန်နဝါရီလ ၁ ရက်
ဘုရားရှင်၏မြတ်မယ်တော်ပွဲ တနင်္ဂနွေနေ့
ရှင်လုကာ ၂ : ၁၆ - ၂၁
Sr. Theresa Myint Myint Naing(ISR)
Posted by Sr. Benedetta Myat Hnin Nwe(ISR)
ထို့နောက်သူတို့သည် အလျင်အမြန်သွားကြလျှင် မာရိယာနှင့်ဂျိုးဇက်ကိုလည်းကောင်း၊နွားစားခွက်၌သိပ်ထားသော သူငယ်တော်ကိုလည်းကောင်း တွေ့ကြ၏။သိုးထိန်းတို့သည်ဤဖြစ်ရပ်ကိုတွေ့မြင်ကြသောအခါ သူငယ်တော်နှင့်စပ်လျဉ်း၍ မိမိတို့အား ဗျာဒိတ်တော်ပေးသည့်မိန့်ကြားချက်ကိုပြန်ပြောကြ၏။ကြားရသောသူအပေါင်းတို့သည်လည်း မိမိတို့အားသိုးထိန်းတို့ပြောသည့်အကြောင်းအရာများ၌အံ့ဩကြ၏။မာရိယာမူကား ဤအကြောင်းအရာအလုံးစုံတို့ကို မိမိ၏စိတ်နှလုံးတွင်စဉ်းစားဆင်ခြင်လျက်သိမ်းထားလေ၏။သိုးထိန်းတို့သည်လည်း မိမိတို့အားပြောပြထားသည့်အတိုင်းမြင်ရကြားရသောကြောင့်ဘုရားသခင်၏ဘုန်းဂုဏ်တော်ကို ချီးမွမ်းလျက်ပြန်သွားကြလေ၏။ထို့နောက်ရှစ်ရက်မြောက်သောနေ့တွင်သူငယ်တော်ကိုအရေဖျားလှီးခြင်းမင်္ဂလာပေးသောအခါအမိဝမ်း၌ ပဋိသန္ဓေမစွဲမီကပင် ကောင်းကင်တမန်တော်က ပေးထားသည့်ယေဇူးအမည်ဖြင့်သူ့ကိုမှည့်ခေါ်ကြ၏။အိမ်ထောင်စုတစ်စုကို တည်ဆောက်နိုင်ရန် စီမံကိန်းချကြိုတင်ပြင်ဆင်ထားသော ကြင်စဦးဇနီးမောင်နှံများအနေဖြင့်ရင်သွေးရတနာသည်မိခင်၏ဝမ်းဗိုက်၌ သန္ဓေတည်လျက်ရှိနေကြောင်းသိရပါလျင်ဖော်မပြနိုင်သောဝမ်းမြောက်မှုများဖြင့် မိမိတို့နှစ်ဦးကြား ဝင်ရောက်လာခြင်းကိုလှိုက်လှဲစွာကြိုဆိုကြပေလိမ့်မည်။ဝမ်း၌ရှိနေကတည်းကပင် မိဘများအနေနှင့် မှည့်ခေါ်ပေးမည့်နာမည်နှင့် သူ၏ဘဝတစ်လျှောက်လုံး၌ မည်သို့ မည်ပုံပြုစုပျိုးထောင်ကြမည်ကိုကွန့်မြူးသောစိတ်ကူးဥာဏ်များဖြင့် ပြင်ဆင်နေခြင်းများရှိတတ်ကြပေသည်။ယနေ့သည်လူ့အဖြစ်မွေးဖွားခြင်းကို ခံယူသည့် မက်ဆီးယားသခင်ဘုရားရှင်၏မြတ်မယ်တော်ပွဲနေ့ဖြစ်ပါသည်။ကြားနာရသော အသက်ပေးသည့် နှုတ်တော်ထွက်စကားတွင် သိုးထိန်းတို့သည်ကောင်းကင်တမန်၏ဗျာဒိတ်တော်ပေးသောမှာကြားချက်အတိုင်းသူငယ်တော်ကိုမယ်တော်နှင့်အတူဖူးမြင်ရကာဝမ်းမြောက်ခြင်းနှင့်ပြောကြားသောစကားကိုမယ်တော်မှနှလုံးတွင်း စဥ်းစားဆင်ခြင်လျက်သိမ်းထားသည့်အကြောင်းနှင့် သူငယ်တော်ကိုကောင်းကင်တမန်ပေးထားသည့်"ယေဇူး"အမည်ဖြင့်မှည့်ခေါ်သည့်အကြောင်းနှုတ်မြွက်ထားပါသည်။ဆယ်ကျော်သက်သမီးကညာတစ်ယောက်အနေဖြင့် ဘုရားရှင်၏သားတော်ကိုသန့်ရှင်းသောဝိညာဥ်တော်၏တန်ခိုးတော်အားဖြင့် ဝမ်းကြာသိုက်တွင် လူ့အဖြစ်ယူရန် လက်ခံခြင်းအတွက် သာမန်သတ္တိရှိသူမဟုတ်ပေ။မိုက်ရူးရဲဆန်သည့်ဆုံးဖြတ်ချက်လည်းမဟုတ်ပေ။ ဘုရားရှင်၏ဗျာဒိတ်တော်ဖြစ်သည့် နှုတ်တော်ထွက်စကားကတိတော်ကိုအကြွင်းမဲ့ယုံကြည်ကာဘုရားရှင်ကို လုံးဝယုံကြည်အားကိုးသောကြောင့်ဖြစ်ပေသည်။မိသားစုများအနေဖြင့်လင်မယားအမှုပြုခြင်းကိုသာ အဓိကမထားဘဲသူစိမ်းနှစ်ဦးပေါင်းဖက်ခြင်းဖြစ်သောကြောင့်ဘုရားရှင်ကိုယုံကြည်၍ချစ်ခြင်းနှင့်မိသားစုကိုတည်ဆောက်ကြပါကဆွေစဉ်မျိုးဆက်၏အသက်တာသည်ကောင်းချီးမင်္ဂလာများဖြင့် ပြည့်ဝနေပေလိမ့်မည်။
