 for web4.jpg)
 for web3a.jpg)
2023-01-01 09:23:48
ဇန္နဝါရီလ ၂ ရက် (တနင်္လာနေ့)
ရှင်ယောဟန် ၁: ၁၉ - ၂၈
Sr.Theresa Myint Myint Naing(ISR)
Posted by Sr. Benedetta Myat Hnin Nwe(ISR)
ဂျူးလူမျိုးတို့ကသင်သည်မည်သူဖြစ်သနည်းဟုယောဟန်ကိုမေးမြန်းစေခြင်းငှာဂျေရုဆလင်မြို့မှရဟန်းများနှင့်လေဝိမျိုးနွယ်များကို စေလွှတ်ကြသောအခါတွင်ယောဟန်သည်ဤသို့သက်သေခံလေ၏။ယောဟန်သည် ထိမ်ဝှက်ခြင်းမရှိဘဲ ငါသည် ခရစ်တော်မဟုတ်ဟု အတိအလင်းဝန်ခံလေ၏။ထိုသူတို့ကလည်းဤသို့ဆိုလျှင်သင်သည်ဧလိယဖြစ်သလောဟု မေးမြန်းကြသော် သူကငါမဟုတ်ဟု ပြန်ဖြေလေ၏။သင်သည်ပရောဖက်ဖြစ်သလောဟုမေးကြပြန်လျှင် သူကငါမဟုတ်ဟုပြန်ပြောလေ၏။ထိုအခါသူတို့ကသင်သည်မည်သူဖြစ်သနည်း။ငါတို့ကို စေလွှတ်သောသူတို့အား ငါတို့ပြောပြနိုင်ရန်သင်မည်သူဖြစ်ကြောင်းသင်ကိုယ်တိုင်ပြောပြပါလော့ဟုဆိုကြ၏။ထိုအခါ သူကငါသည်ပရောဖက်အီဇာယဟောထားခဲ့သည့်အတိုင်းသခင်ဘုရား၏လမ်းတော်ကို ဖြောင့်တန်းစေကြလော့ဟူ၍တောကန္တာရ၌ ကြွေးကြော်သောသူ၏အသံဖြစ်သတည်းဟု ဆိုလေ၏။ထိုသို့မေးမြန်းရန် စေလွှတ်ခြင်းခံရသောသူတို့တွင် ဖာရီဇေးဦးများလည်းပါဝင်ကြ၏။ထိုသူတို့က သင်သည်ခရစ်တော်လည်းမဟုတ်၊ဧလိယလည်းမဟုတ်၊ပရောဖက်လည်းမဟုတ်ပါလျှင်အဘယ်ကြောင့် ဆေးကြောခြင်းကိုပေးသနည်းဟုမေးကြ၏။ယောဟန်က သူတို့အားပြန်ဖြေသည်မှာငါသည် ရေဖြင့်ဆေးကြော၏။သင်တို့အလယ်၌မူကား သင်တို့မသိသောသူတစ်ဦးရှိ၏။ထိုသူသည်ငါ့နောက်မှ ကြွလာသူဖြစ်သော်လည်း ငါသည် သူ၏ခြေနင်းတော်ကြိုးကိုမျှ ဖြေပေးခြင်းငှာ မထိုက်တန်ပါ ဟုဆို၏။- ဤအကြောင်းအရာများသည် ယောဟန်ဆေးကြောခြင်းပေးနေသော ဂျော်ဒန်မြစ်တစ်ဖက်ကမ်းရှိဘက်သနီရွာတွင် ဖြစ်ပျက်ခဲ့ခြင်းဖြစ်၏။"ဤသည်ကား ခရစ်တော်သခင်၏မြတ်သောဧဝံဂေလိတရားတော်ပေတည်း။"ကျွန်ုပ်တို့လူသားများတစ်ဦးစီတွင် မတူညီသောကျေးဇူးတော်များနှင့် ဘဝအသက်တာအတွက် ရှင်သန်ကြရမည့်သမိုင်းပေးတာဝန်များအသီးသီးရှိကြကြောင်းကို သိရှိကြပြီးဖြစ်ပါသည်။ကျွန်ုပ်တို့အချင်းချင်းသည်အပြန်အလှန်မှီခိုကြရသောသူများဖြစ်ကြ၍ပိုမို တတ်သိသောပညာ၊သူတစ်ပါးထကပို၍ ပိုင်ဆိုင်ထားဟန်ရှိသောဥစ္စာပစ္စည်းများကြောင့် သူတစ်ပါးထက်သာသည်ဟူ၍ မယူဆသင့်ပေ။အထက်စီးဆန်ဆန် နေထိုင်ဆက်ဆံအနိုင်ယူတတ်ခြင်းများမပြုသင့်ပေ။အကြောင်းမှာ ကျွန်ုပ်တို့သည် ဤလောကတွင် အကန့်အသတ်ရှိသောအသက်ဖြင့်နေထိုင်ကြရ၍ တည်မြဲခြင်းမရှိသည့်လောကီပစ္စည်းဥစ္စာများကိုအသုံးပြုကြရသောသူများဖြစ်သောကြောင့်ပင်ဖြစ်သည်။ယနေ့ကြားနာရသောအသက်ပေးသည့် နှုတ်တော်ထွက်စကားတွင်လူအများ၏ပါးစပ်ဖျားတွင် ရေပန်း စားလျက် စိတ်ဝင်စားခြင်းခံရသော ယောဟန်ဘတ္တဇံသည်ထိုသို့ဖြစ်ခြင်းအပေါ် သာယာခြင်းမရှိဘဲ သူအစေခံသည့်အရှင်နှင် သူ၏ခေါ်တော်မူခြင်းအတိုင်း လုပ်ဆောင်ရမည့်တာဝန်ဝတ္တရားများကိုသိ၍ “သင်တို့အလယ်တွင်သင်တို့မသိသောသူတစ်ဦးရှိသည်”ဟူ၍ ကြွလာတော်မူသည့်သခင်ကို ဖော်ပြကာညွန်ပြပေးသည့်အကြောင်းကို နှုတ်မြွက်ထားပါသည်။ကျွန်ုပ်တို့ရှင်သန်သောပတ်ဝန်းကျင်၊ကျွန်ုပ်တို့ပေါင်းသင်းဆက်ဆံ ဆက်သွယ်လျက်နေသောအသိုင်းအဝိုင်းတွင်ကျွန်ုပ်တို့သည်မာနထောင်လွှားနေပါလျှင်ကျွန်ုပ်တို့ထက် သိတတ်၍ ဘုရားရှင်အသုံးပြုမည့်သူ၊ကျွန်ုပ်တို့မသိသောသူတစ်ဦးရှိနေသည်ကိုသတိမူမိမည်မဟုတ်ချေ။ ရှင်ယောဟန်ဗတ္တဇံကဲ့သို့ နိမ့်ချသောနှလုံးသားရှိမှသာလျှင် ကျွန်ုပ်တို့နှင့်အတူ ရှိနေသောသူ၊ ကျွန်ုပ်တို့အလယ်တွင်ရှိနေသောသူ၊ကျွန်ုပ်တို့နောက်တွင် လူဖြစ်လာမည့်သူ၊ ကျွန်ုပ်တို့၏မျိုးဆက်သစ်များသည်ကျွန်ုပ်တို့ထက်ကြီးမြတ်သောသူများ လူမှုဝန်းကျင်ကို ပို၍တိုးတက်အောင်မြင်ရန်ပြုပြင်ဆောင်ရွက်ပေးနိုင်သောသူများဖြစ်ကြောင်းကိုသိမှတ်လက်ခံလာပေလိမ့်မည်။အနာဂတ်မျိုးဆက်သစ်များအတွက်လမ်းဖေါ်ပေးနိုင်သူများပြင်ဆင်ပေးနိုင်သူများလက်တွဲလုပ်ဆောင်ပေးနိုင်၍လက်ဆင့်ကမ်းပေးသူများအဖြစ်ကျွန်ုပ်တို့ဖြစ်နေကြရန်လိုအပ်ပေသည်။အိုသခင်ကိုယ်တော်၏ရွှေမျက်နှာတော်ကိုနီးစပ်သူများတွင်တွေ့ရှိနိုင်၍ ချစ်မေတ္တာထားနိုင်စေတော်မူပါ။
