 for web4.jpg)
 for web3a.jpg)
2023-01-06 10:26:56
ဇန်နဝါရီလ ၇ ရက်(စနေနေ့)
ရှင်ယောဟန် ၂ : ၁ - ၁၁
Sr.Theresa Myint Myint Naing(ISR)
Posted by Sr. Benedetta Myat Hnin Nwe(ISR)
သုံးရက်မြောက်သောနေ့တွင် ဂါလေလေးယနယ်၊ ကာနာမြို့၌ လက်ထပ်ပွဲတစ်ခုကျင်းပပြီး ယေဇူး၏မယ်တော်သည်လည်းထိုနေရာ၌ရှိ၏။ယေဇူးနှင့်အတူ တပည့်တော်တို့သည်လည်း ထိုလက်ထပ်ပွဲသို့ ဖိတ်ကြားခြင်းခံကြရ၏။ထိုအချိန်၌စပျစ်ရည်ကုန်သွားသောကြောင့် ယေဇူး၏မယ်တော်က သူတို့တွင် စပျစ်ရည်မရှိဟု ကိုယ်တော်အား ပြောလေ၏။ယေဇူးကလည်း အချင်းအမျိုးသမီး၊သင်သည် အကျွန်ုပ်နှင့်မည်သို့သက် ဆိုင်ပါသနည်း။ အကျွန်ုပ်၏အချိန် မရောက်သေး ဟု သူမအား မိန့်တော်မူ၏။ကိုယ်တော်၏မယ်တော်ကလည်းသူစေခိုင်းသမျှကို ပြုလုပ်ကြလော့ဟု အစေခံတို့အား မှာထားလေ၏။ထိုနေရာ၌ ဂျူးလူမျိုးတို့၏ဘာသာရေး ဝိနည်းအရ စင်ကြယ်ခြင်းအမှုပြုရာတွင် အသုံးပြုသောဂါလံနှစ်ဆယ်၊ သုံးဆယ်ခန့်ဝင်သည့်ကျောက်ရေအိုးကြီး ခြောက်လုံးရှိ၏။ယေဇူးကအိုးများကို ရေဖြည့်ကြလော့ဟု သူတို့အား မိန့်တော်မူလျှင် သူတို့သည်၎င်းအိုးတို့ကို နှုတ်ခမ်းတိုင်အောင် ရေဖြည့်ကြ၏။ထို့နောက် ယေဇူးက ယခုအနည်းငယ်ခပ်၍ ပွဲအုပ်ထံသို့ယူသွားကြလော့ဟု သူတို့အား မိန့်တော်မူသဖြင့် သူတို့သည် ယူသွားကြလေ၏။ပွဲအုပ်သည်လည်းစပျစ်ရည်ဖြစ်ပြီးသောရေကို မြည်းစမ်းကြည့်သောအခါ ရေခပ်လာခဲ့သောအစေခံတို့သည် ယင်းအား အဘယ်ကရခဲ့သည်ကိုသိကြသော် လည်း ပွဲအုပ်မှာမူ မသိသောကြောင့်မင်္ဂလာဆောင်သတို့သားကိုခေါ်ပြီးလျှင်၊လူတိုင်းသည် ကောင်းသောစပျစ်ရည်ကို ဦးစွာတည်ခင်း၍လူတို့၀အောင်သောက်ကြပြီးမှ စပျစ်ရည်အညံ့ကို တည်ခင်းလေ့ရှိကြ၏။ သင်မူကား ယခုအချိန်တိုင်အောင် ကောင်းသောစပျစ်ရည်ကို သိမ်းထားလေပြီတကားဟု ဆိုလေ၏။မိမိ၏တန်ခိုးလက္ခဏာများတွင် ပထမဆုံးဖြစ်သော ဤတန်ခိုးလက္ခဏာကို ယေဇူးသည် ဂါလေလေးယနယ်၊ ကာနာမြို့၌ပြလျက် မိမိ၏ဘုန်းတော်ကို ထင်ရှားစေတော်မူ၏။ တပည့်တော်တို့သည်လည်းကိုယ်တော်၌ ယုံကြည်ကြလေ၏။"အမေ"ဟူသောနာမ်စားကို ခေါ်ခွင့်ရသောသားသမီးတို့၏အသက်တာသည် နွေးထွေးသောမေတ္တာအရိပ်၏ လုံခြုံမှု၌ ရှိနေသကဲ့သို့ဖြစ်ပေမည်။မိမိ၏သားသမီးများကိုဂရုစိုက်တတ်၍အတ္တမဆန်သောမိခင်သည် အခြားသောသူများအပေါ်စာနာချစ်ခြင်းထားရှိတတ်သောသူများဖြစ်တတ်ကြပေသည်။အခြေခံလိုအပ်ချက်များကိုပြောစရာမလိုအောင် တောင့်စေ့ကြည့်ကာ ဖြည့်စွက်ပေးခြင်းများဖြင့် နှလုံးသားကြီးမာသော မေတ္တာတရားရှင်မှာ"အမေ"သာဖြစ်ပါသည်။ယနေ့ကြားနာရသော အသက်ပေးသည့်နှုတ်တော်ထွက်စကားတွင် ကာနန်လက်ထပ်ပွဲဝယ် မယ်တော်မာရိယာမှ စပျစ်ရည်မလောက်သည်ကိုသတိထားမိ၍ သားတော်ဘုရားထံတင်ပြတောင်းဆိုကာ ခရစ်တော်သခင်မှပထမဦးဆုံးသောတန်ခိုးတော်ကို ဤပွဲ၌ဖေါ်ပြသည့်အကြောင်း နှုတ်မြွက်ထားပါသည်။လူအပေါင်းတို့၏မြတ်မိခင် မယ်တော်မာရိယာသည် လိုအပ်မှုများနှင့် ပြည့်နှက်နေသောကျွန်ုပ်တို့၏ရှင်သန်ဖြစ်တည်မှုများတွင် အရိပ်တကြည့်ကြည့်ဖြင့်သားတော်ဘုရားထံတောင်းဆုပန်ကာ ဖြည့်ဆည်းပေးလျက်ရှိနေပါသည်။အထူးသဖြင့် ယနေ့ကဲ့သို့အရာရာပြိုကွဲပျက်စီးနေခြင်း၌ မယ်တော်သည် ကျွန်ုပ်တို့ကိုအဖေါ်ပြုကာ မျက်ရည်သုတ်ပေးလျက် ရှိနေပါသည်။သားဆုံးရှုံးသွားသောမိခင်များနှင့်မိခင်ဆုံးရှုံးသောသားသမီးများအနား မိခင်ပမာ ရှိနေပါသည်။နတ်ဆိုးမင်း၏ဦးခေါင်းကိုနင်းချေသည့်ကညာစင်မိခင် ယနေ့တန်ခိုးကြီးထွားမောက်မာလျက်ရှိသော လူ့ခန္ဓာနှင့်နတ်မိစ္ဆာများတို့၏ဦးခေါင်းကို နင်းချေလျက် ကျွန်ုပ်တို့အတွက်စစ်တိုက်ပေးတော်မူပါ။အောင်ပွဲများဆွတ်ခူးနိုင်စေတော်မူပါ။
