ဟေရုဒ်မင်းကြီးလက်ထက်တွင် ဂျူဒေးယပြည်၊ဘက်သလေဟင်မြို့၌ ယေဇူးကိုဖွားမြင်သောအခါ အရှေ့တိုင်းနိုင်ငံများမှမင်းပညာရှိကြီးများသည် ဂျေရုဆလင်မြို့သို့ရောက်ရှိလာကြ၍ မေးမြန်းကြသည်မှာ၊ယခုဖွားမြင်တော်မူသောဂျူးလူမျိုးတို့၏ရှင်ဘုရင်ကား အဘယ်မှာရှိသနည်း၊ ငါတို့သည်သူ၏ကြယ်ကိုအရှေ့ပြည် ၌မြင်ကြရ သည်ဖြစ်၍ သူ့အားဖူးမြော်ပူဇော်ရန်ရောက်ရှိလာကြခြင်းဖြစ်သည်ဟုဆိုကြ၏။ဤအကြောင်းကိုဟေရုဒ်မင်းကြီးကြားလျှင်သူနှင့်တကွဂျေရုဆလင်တစ်မြို့လုံးသည်တုန်လှုပ်ချောက်ချားကြကုန်၏။ဟေရုဒ်မင်းကြီးသည်ရဟန်းအကြီးအကဲများနှင့်လူတို့ထဲမှ ကျမ်းတတ် ဆရာများကိုစုဝေးစေလျက် ခရစ်တော်သည် မည်သည့်အရပ်တွင် ဖွားမြင်လိမ့်မည်နည်းဟုသူတို့အား မေးမြန်းလေ၏။ထိုသူတို့ကလည်းဂျူဒေးယပြည်၊ဘက်သလေဟင်မြို့တွင် ဖွားမြင်ပါလိမ့် မည်။ အဘယ်ကြောင့်ဆိုသော်ပရောဖက်တစ် ပါးကရေးသားထားသည်မှာ၊ဂျုဒပြည်၌ရှိသောအိုဘက်သလေဟင်မြို့၊ဂျုဒမြို့များအလယ်တွင်သင်သည် မှေးမှိန်သိမ်ငယ်သောမြို့မဟုတ်။အကြောင်းမူကား ငါ၏အစ္စရာအဲလ်လူမျိုးကို အုပ်စိုးမည့်ဘုရင်တစ်ပါးသည်သင့်ထံမှ ပေါ်ထွန်းလိမ့်မည် ဟူ၍ ဖြစ်ကြောင်း သူ့အားလျှောက်ထား ကြ၏။ ထိုအခါဟေရုဒ်မင်းကြီးသည် မင်းပညာရှိတို့အား လျှို့ဝှက်စွာခေါ်ပြီးလျှင် ကြယ်ပေါ်ထွန်းသောအချိန်ကာ လကိုသေချာစွာ မေးမြန်းလေ၏။ထို့နောက် သူကသင်တို့သွားကြ၍ ထိုသူငယ်ကို ရှာဖွေကြလော့။တွေ့လျှင် ငါသည်လည်းသွား၍ သူ့ကိုဖူးမြော်ပူဇော်နိုင်ရန်ငါ့ထံသို့ လာရောက်အကြောင်းကြားကြပါဟုမိန့်မှာလျက်ထိုသူတို့ကိုဘက်သလေဟင်မြို့သို့ စေလွှတ်လိုက်လေ၏။ထိုသူတို့သည်မင်းကြီး၏စကားကိုကြားနာပြီးမှထွက်ခွာသွားကြသောအခါ အရှေ့တိုင်းနိုင်ငံတွင်သူတို့မြင်ခဲ့ ကြသောကြယ်သည် သူတို့၏ရှေ့မှဦးဆောင်သွား၍သူငယ်တော်ရှိသောအရပ်သို့ရောက်လျှင်ထိုအပေါ်၌ရပ်တန့်နေလေ၏။သူတို့သည်လည်းကြယ်ရပ်တန့်သွား သည်ကိုမြင်ကြသောအခါ လွန်စွာပင် ဝမ်းမြောက်ကြလေ၏။ထို့နောက်သူတို့သည် အိမ်ထဲသို့ ဝင်သောအခါ သူငယ်တော်ကို သူ၏မယ်တော် မာရိယာနှင့်အတူ တွေ့မြင်ကြ၍ သူ့ကို ပျပ်ဝပ်ရှိခိုးကြလေ၏။ ထို့နောက် သူတို့ သည် မိမိတို့၏အဖိုးတန်ပစ္စည်းတို့ကို ဖွင့်ကြပြီး ရွှေ၊လော်ဗန်နှင့်မီးရာတို့ကိုလက်ဆောင်အဖြစ် သူ့အားဆက်ကပ်ကြ၏။ထို့နောက်သူတို့သည်ဟေရုဒ်မင်းကြီးထံသို့ မပြန်ကြရန်အိပ်မက်၌ဗျာဒိတ်တော်ခံရသဖြင့်မိမိတို့၏ တိုင်းပြည်သို့ အခြားသောလမ်းဖြင့် ပြန်သွားကြလေ၏။"ဤသည်ကား ခရစ်​တော်သခင်၏ မြတ်​သောဧဝံ​ဂေလိတရား​တော်​ပေတည်း။"ဖန်ဆင်းရှင်ဘုရားသခင်သည် ဖန်ဆင်းခြင်းများမှတစ်ရက်တာစီပြီးဆုံးသည်နှင့်“အလွန်ကောင်းမြတ်တော်မူ၏”ဟုဆိုကာကျေနပ်နှစ်ခြိုက်ခဲ့ပါသည်။သတ္တကမ္ဘာကြီးကိုဖန်ဆင်းပြီးသောအခါတွင် လူသားများကိုဖန်ဆင်းတော်မူ၍လူသားများနှင့်သဘာဝတရားတို့သည်အပြန်အလှန်အမှီသဟဲပြုကြရန်နှင့်၎င်းတို့ကိုအုပ်စိုးရန်လူသားများကိုခန့်ထားတော်မူခဲ့ပါသည်။ဘုရားရှင်ဖန်ဆင်းထားသော စိမ်းလန်းစိုပြေသည့်သဘာဝလောကကြီးအကြောင်းကို ယနေ့ ကျွန်ုပ်တို့ ပြောဆိုကြမည်ဆိုပါလျှင် အိပ်ရာဝင်ပုံပြင်တစ်ပုဒ်ပမာ ကမ္ဘာလောကကြီးသည် သစ်ပင်များ ပြုန်းတီးလျက်၊ကပ်ရောဂါထူပြောလျက် ရှိနေပါသည်။ယနေ့ ဤအချိန်အခါတွင်လူသားများ၏စီမံအုပ်စိုးမှုကြောင့်ဖြစ်ပျက်နေသောသဘာဝတရားနှင့် ပတ်သက်၍ဘုရားရှင်သည်ကျေနပ်နှစ်ခြိုက်နိုင်ပါဦးမည်လား။မိဘဦးတို့၏မနာခံခြင်းနှင့် မာနထောင်လွှားခြင်းအပြစ်ကြောင့်ကမ္ဘာ​လောကကြီး ကမောက်ကမဖြစ်ခဲ့ရသည်မှာ ယနေ့တိုင်ပင်ဖြစ်ပါသည်။အဘယ်ကြောင့်နည်း။ယနေ့သည်ထူးဆန်းသောကြယ်တော်ပေါ်ထွန်းခြင်းကြောင့်ဝေးလံသောအရပ်မှထွက်လာ၍မင်းလောင်းကိုဖူးမြော်ရန်ကြွလာသည့်ပညာရှိမင်းသုံးပါးတို့၏ပွဲနေ့ဖြစ်ပါသည်။ဖန်ဆင်းခံအရာခပ်သိမ်းတို့ကိုအပြစ်ကျေးကျွန်ဘဝမှကယ်တင်မည့်သူဖွားမြင်သောအခါသဘာဝတရားနှင့်ကြယ်တာရာတို့သည်ရွှင်မြူးလျက်ဖန်ဆင်းရှင်ကိုချီးမွမ်းကာမိမိတို့၌ရှိသည့်ကျေးဇူးတော်အလှတရားများဖြင့်ပညာရှင်များအားထူးခြားသောအသွင်ဖြင့်ကယ်တင်ရှင်၏ဖွားမြင်ခြင်းကိုတိတ်ဆိတ်စွာညွန်ပြပေးခြင်းဖြစ်ပေမည်။လောကဓါတ်တို့သည် ရွှင်မြူး၍ကျိန်စာသင့်ခြင်းခံရသောသတ္တဝါခပ်သိမ်းတို့ကို ကယ်ချွတ်မည့်အရှင်ကို စောင့်မျော်၍ကြွလာတော်မူခြင်းကို လက်ခံကြိုဆိုနေပါသည်။ကယ်တင်ရှင်သည်လူသားတစ်ဦးပမာဖွားမြင်တော်မူ၍လူသားများအားလုံး၏ကိုယ်စား စော်ကား ပြစ်တင်ကဲ့ရဲ့ဝေဖန်ညင်းပမ်းနှိပ်စက်ခြင်းကိုခံကာအသွေးတော်သွန်းလောင်းခြင်းဖြင့်အသေခံတော်မူခဲ့ပါသည်။ကယ်တင်ရှင်သည် ကျွန်ုပ်တို့အတွက် အသက်ပေး၍ ငရဲသားဘဝမှ ကယ်နှုတ်တော်မူခဲ့ပြီးဖြစ်ပါသည်။ သို့ဖြစ်လျက်နှင့် ကမ္ဘာလောကကြီးသည် အဘယ်ကြောင့်ပိုမိုဆိုးရွားသောအခြေအနေသို့ လျင်မြန်စွာ ကျဆင်းသွားရပါသနည်း။အ​ကြောင်းမှာ ကမ္ဘာလောကသားကို ကယ်တင်ရန်ကြွလာတော်မူသည့်ငြိမ်းချမ်းရေးအရှင်၊အံ့ဩဖွယ်တိုင်ပင်ဖက်တန်ခိုးကြီးသောဘုရားရှင်ကို ကျွန်ုပ်တို့လက်မခံကြသောကြောင့်ဖြစ်ပါသည်။သိမှတ်လက်ခံယုံကြည်ပါသည်ဟုဆိုသောယုံကြည်သူကျွန်ုပ်တို့သည်ပင်လျှင်ယုံကြည်သည့်အတိုင်း လိုက်ကျင့် နေထိုင်ရန်မစွမ်းဆောင်ကြသောကြောင့်ဖြစ်ပေမည်။ အမည်ခံခရစ်တော်နောက်လိုက်များ ပေါများလာ၍ အမာခံယုံကြည်သူများ နည်းလာသောကြောင့်လည်းဖြစ်နိုင်ပေမည်။ထိုသို့ဆိုပါလျှင် ကျွန်ုပ်တို့ယုံကြည်သူများသည်မည်သည့်အမှုများ ပြုလုပ်ရန်လိုအပ်မည်နည်း။ခရစ်​တော်သခင် နှုတ်မြွက်သွန်သင်ထားသည့်"သင်တို့သည်ကမ္ဘာအရပ်ရပ်သို့သွား၍ ဧဝံဂေလိတရားတော်ကိုဟောပြောကြလော့။" အတိုင်း နီးစပ်သူများအား ကမ္ဘာ​လောကကြီးအားကျွန်ုပ်တို့အကျင့်ပုံစံအ​ပြောအဆိုအားဖြင့် သက်​သေခံရန်လိုအပ်​နေ​ပေသည်။မင်းပညာရှိများသည် အချိန်​​ပေးကာ အပင်ပန်းခံ၍ကိုယ်​တော်ရှင်ကိုလာ​ရောက်ဖူး​မြော်သကဲ့သို့ တပည့်​တော်တို့၏အသက်တာကို အသုံးပြု​တော်မူပါဘုရား။