 for web4.jpg)
 for web3a.jpg)
2023-01-08 06:55:56
ဇန်နဝါရီလ ၉ ရက်(တနင်္လာနေ့)
ရှင်မာတေးဦး ၃:၁၃-၁၇
Sr.Theresa Myint Myint Naing(ISR)
Posted by Sr. Benedetta Myat Hnin Nwe(ISR)
“ထိုအခါယေဇူးသည်ယောဟန်အားဖြင့် ဆေးကြောခြင်းခံယူရန်ဂါလေလေးယနယ်မှနေ၍ သူရှိရာဂျော်ဒန်မြစ်ကမ်းသို့ကြွလာတော်မူ၏။ယောဟန်ကလည်း အကျွန်ုပ်သည် ကိုယ်တော့်ထံမှဆေးကြောခြင်းကိုခံယူရမည့်သူဖြစ်ပါလျက်နှင့်ကိုယ်တော်သည် အကျွန်ုပ်ထံသို့ ကြွလာတော်မူပါသလောဟုဆိုကာ ကိုယ်တော့်ကိုတားမြစ်လေ၏။သို့သော် ယေဇူးကသူ့အားယခုအခါတွင်မူဤသို့ရှိပါစေ။အကြောင်းမူကား ဖြောင့်မှန်ရာအလုံးစုံတို့ကိုငါတို့လိုက်နာသင့်သည်ဟုမိန့်တော်မူသဖြင့်ယောဟန်သည်လည်း လက်ခံလေ၏။ယေဇူးသည် ဆေးကြောခြင်းခံတော်မူပြီးရေထဲမှတက်လာသည်နှင့်တစ်ပြိုင်နက် ကောင်းကင်သည်ပွင့်လာပြီးလျှင်ဘုရားသခင်၏ဝိညာဉ်တော်သည် မိမိအပေါ်သို့ချိုးငှက်သဏ္ဌာန်ဖြင့်ဆင်းသက်လာသည်ကိုကိုယ်တော်မြင်တော်မူ၏။ထို့နောက် ဤသူသည်ငါနှစ်သက်မြတ်နိုးရာငါ၏ချစ်သားပေတည်းဟူ၍ ကောင်းကင်မှပြောဆိုသောအသံသည်ရုတ်တရက်ထွက်ပေါ်လာလေ၏။”ယနေ့တွင်အမိသာသနာတော်ကြီးမှခရစ်တော်သခင်၏ဆေးကြောခြင်းခံယူသည့်ပွဲနေ့ကိုကျင်းပပါသည်။လောက၏အလင်းရှင်ခရစ်တော်သခင်သည် မိမိကြီးပြင်းလာရာဂျူးလူမျိုးတို့၏ ထုံးတမ်းစဥ်လာများအတိုင်းလိုက်နာကျင့်ကြံလိုသောသူဖြစ်ပါသည်။ကယ်တင်ခြင်းခရီးစဥ်ကိုရှင်ယောဟန်ဘတ္တိဇံထံမှ ဆေးကြောခြင်းကို နှိမ့်ချစွာခံယူခြင်းအားဖြင့်စတင်ခဲ့ပါသည်။ကျွန်ုပ်တို့စံပြုရာသခင်၊ကျွန်ုပ်တို့၏ကယ်တင်ရှင်၊ ပရောဖက်များ၏ဟောကြားချက်များကို ပြည့်စုံစေသောအရှင်၊ လူမျိုးတိုင်းတောင့်တသည့် ချစ်ခြင်းမေတ္တာဘုရင်သည် လမ်းမှားပျောက်ကွယ်နေသောသူ၏လူသားများကို အလင်းသို့ ပြန်ခေါ်နိုင်ရန်အတွက်သူ၏အလင်းကိုကျွန်ုပ်တို့တစ်ဦးစီအပေါ်၌ထွန်းလင်းစေခြင်းအားဖြင့် လောကမှောင်မိုက်ခြင်းကိုဖြိုခွင်းစေမည်ဖြစ်သည်။ယနေ့ကြားနာရသော အသက်ပေးသည့် နှုတ်တော်ထွက်စကားတွင်ကယ်တင်ရှင်ဖြစ်သော်ငြားပရောဖက်ယောဟန်ထံ ဆေးကြောခြင်းခံယူနေစဥ်ကောင်းကင်ပွင့်၍အသံလာသည်မှာ"ဤသူသည် ငါနှစ်သက်မြတ်နိုးရာငါ၏ချစ်သား"ဖြစ်ကြောင်းနှုတ်မြွက်ထားပါသည်။ကျွန်ုပ်တို့စံပြုရာသခင်၊ကျွန်ုပ်တို့ဘုရားရှင်သည်သူ၏ဘုရားကိုကျွန်ုပ်တို့ဘုရားဖြစ်စေသည်။ကျွန်ုပ်တို့အား သူ၏ညီအစ်ကိုမောင်နှမများဖြစ်စေလျက် ခမည်းတော်ဘုရားကိုကျွန်ုပ်တို့၏ဖခင်ဖြစ်စေပါသည်။နတ်ဆိုး၏အဖျက်အမှောင့်လုပ်ဆောင်မှုများဟူသောလောကီအမှောင်ကို ဘုရားရှင်ကိုယုံကြည်ခြင်း၊ ချစ်လေးမြတ်နိုးခြင်းနှင့်အလိုတော်အတိုင်းလိုက်နာခြင်းတို့ဖြင့် ဖြိုခွင်းအောင်မြင်ခဲ့ပါသည်။ဤလောကအသက်တာကို ဆက်လက်လျှောက်လှမ်းရှင်သန်ကြမည့်ကျွန်ုပ်တို့ကိုလည်း အောင်မြင်စေရန်ဆေးကြောခြင်းမင်္ဂလာခံယူခြင်းအားဖြင့်ကျေးဇူးတော်များ ပေးထားပြီးဖြစ်ပါသည်။နတ်ဆိုး၏မှောင်မိုက်ခြင်းတန်ခိုးကိုအဝေးသို့လွင့်ပြယ်သွားစေရန်ကျွန်ုပ်တို့၏အလင်းကိုထွန်းလင်းရန် အဆင်သင့်ရှိပြီလော။
