 for web4.jpg)
 for web3a.jpg)
2023-01-09 06:01:34
ဇန်နဝါရီလ ၁၀ ရက်(အင်္ဂါနေ့)
ရှင်မာကု ၁ : ၂၁ - ၂၈
Sr.Theresa Myint Myint Naing(ISR)
Posted by Sr. Benedetta Myat Hnin Nwe(ISR)
“ထို့နောက် သူတို့သည် ကာဖာနာအုမ်မြို့သို့ဝင်ကြလေ၏။ကိုယ်တော်သည်လည်း ဥပုသ်နေ့၌ ချက်ချင်းပင်တရားဇရပ် သို့ဝင်၍သွန်သင်တော်မူ၏။ထိုအခါ လူတို့သည် ကိုယ်တော်၏သွန်သင်ချက်ကို အလွန်အံ့ဩကြ၏။ အကြောင်းမူကား ကိုယ်တော်သည် ကျမ်းတတ်ဆရာများကဲ့သို့မဟုတ်ဘဲ ဩဇာအာဏာရှိသောသူကဲ့သို့သွန်သင်တော်မူသောကြောင့်ဖြစ်၏။ထိုအချိန်၌ သူတို့၏တရားဇရပ်တွင်ညစ်ညူးသောနတ်ဆိုးပူးခြင်းခံရသည့် လူတစ်ယောက်ရှိ၏။ထိုသူက နာဇရက်မြို့သားယေဇူး၊ကိုယ်တော်သည် အကျွန်ုပ်တို့ကို မည်သို့ပြုလိုပါသနည်း။အကျွန်ုပ်တို့ကို ဖျက်ဆီးရန်ကြွလာတော်မူပါသလော။ကိုယ်တော်မည်သူဖြစ်သည်ကို အကျွန်ုပ်သိပါ၏။ကိုယ်တော်သည် ဘုရားသခင်၏သန့်ရှင်းမြင့် မြတ်သောသူဖြစ်ပါသည်ဟု အော်ဟစ်လေ၏။သို့သော် ယေဇူးသည်သူ့ကို ကြိမ်းမောင်းကာ တိတ်ဆိတ်စွာနေလော့၊ဤသူ့ထံမှ ထွက်သွားလော့ဟု အမိန့်ပေးတော်မူလျှင်၊ညစ်ညူးသောနတ်ဆိုးသည် ထိုသူ့ကို ပြင်းထန်စွာလှုပ်ခါ၍ကျယ်သောအသံဖြင့် အော်ဟစ်လျက် သူ့ထံမှထွက်သွားလေ၏။လူအပေါင်းတို့သည်လည်း အံ့ဩကြလျက် ဤအခြင်းအရာသည် မည်သို့သောအရာဖြစ်သနည်း။၎င်းသည် သွန်သင်ချက်အသစ်ပါတကား။သူသည် နတ်ဆိုးတို့ကိုပင် အာဏာနှင့်အမိန့်ပေးသောအခါ ၎င်းတို့သည် သူ၏စကားကိုနားထောင်ကြပေသည်ဟုအချင်းချင်းမေးမြန်းပြောဆိုကြ၏။ကိုယ်တော်၏သတင်းကျော်ကြားခြင်းသည်လည်းတစ်ခဏချင်းပင် ဂါလေလေးယနယ် ပတ်ဝန်းကျင်ဒေသတစ်ခုလုံးသို့ ပျံ့နှံ့သွားလေ၏။”ဘုရားရှင်၏နှုတ်တော်မှထွက်သောစကားသည်တန်ခိုးသြဇာနှင့်ပြည့်ဝ၏။စိတ်နှလုံးအတွင်းထဲအထိ တို့ထိစေ၍ဝမ်းမြောက်သောစိတ်ကိုဖြစ်ပေါ်စေပြီးလူသားဆန်ခြင်းမှကိုယ်တော်၏နောက်လိုက်ခရစ်ယာန်ပီသစေရန် ပြောင်းလဲပေးနိုင်စွမ်းပါ၏။အကြောင်းမှာ ချစ်ခြင်း၏မူလအရင်းအမြစ်ဖြစ်သော ဘုရားရှင်သည်စိတ်နှလုံးအတွင်းမှ ချစ်သည့်အတိုင်း နှုတ်မှမြွက်ဆိုကာလူသားများ၏နှလုံးသားတောင့်တစ်နေရာမှ ဆာမွတ်တောင့်တခြင်းကိုဖြည့်ဆည်းပေးသောကြောင့်ဖြစ်သည်။ယနေ့ကြားနာရသောအသက်ပေးသည့်နှုတ်တော်ထွက်စကားတွင်ကိုယ်တော်ရှင်၏သွန်သင်ချက်သည် သြဇာအာဏာနှင့်ပြည့်ဝ၍လူအပေါင်းကိုအံ့သြဝမ်းမြောက်စေသည့်အကြောင်းနှင့် ညစ်ညူးသောနတ်ဆိုးမှာ မခံမရပ်နိုင်ဖြစ်ကာ အော်ဟစ်ဝန်ခံရသည့်အကြောင်း နှုတ်မြွက်ထားပါသည်။သမ္မာတရားရှင်ခရစ်တော်သခင်သည်သေမင်းတမန်နတ်ဆိုး၏နိုင်ငံပြိုကွဲစေရန်နှင့်လူသားများ သမ္မာတရားနှင့်ပြည့်ဝသောဘုရားရှင်၏နိုင်ငံတော်ကို ဤကမ္ဘာမြေတွင်သာမကနောင်ဘဝတွင်ထာဝရသုခချမ်းသာခံစားရရှိရန်အတွက်ဤလောကသို့ကြွလာခြင်းဖြစ်သည်။ခရစ်တော်သခင်၏နောက်လိုက်များဖြစ်သည့်ယုံကြည်သူကျွန်ုပ်တို့အနေ ဖြင့်ယနေ့ကြီးစိုးလွှမ်းမိုးလျက်ရှိသောမာရ်နတ်အုပ်စိုးသည့်မျက်မှောက်ကာလတွင်၎င်းတို့ကို ကျွန်ုပ်တို့အားနှင့်တိုက်ပါလျှင် မည်သို့မျှမဖြစ်နိုင်ပါ။ဘုရားရှင်သည် ကျွန်ုပ်တို့ကို အစွမ်းတန်ခိုးထက်မြက်လှသောနှုတ်ကပါတ်တော်ကို ပေးထားပြီးဖြစ်သည်။ကျွန်ုပ်တို့ဖတ်ရှုရန်၊စားသောက်ရန်လိုအပ်ပါသည်။ကျွန်ုပ်တို့ဘဝ၏အနက်အဓိပ္ပါယ်ဖွင့်ဆို၍ ရှင်သန်ပြောင်းလဲရန်လိုအပ်ပါသည်။ကျွန်ုပ်တို့ချစ်သော ကျွန်ုပ်တို့၏မျော်လင့်ရာအာရုံဦးကလေးများမှဆိုးရွားလှသောသေမင်းတမန်ကိုအရာရာစွန့်လျက် တန်ပြန်တွန်းလှန်နေကြသည့်အချိန်ဝယ်ကျွန်ုပ်တို့အနေဖြင့် တတ်နိုင်သည့်နည်းဖြင့် ပါဝင်ရာတွင်အလုံးစုံကိုတတ်နိုင်သောဘုရားရှင်ထံချစ်မေတ္တာနှင့်ဝပ်စင်းတွားလျက် တောင်းလျှောက် သင့်ပါသည်။
