 for web4.jpg)
 for web3a.jpg)
2023-01-23 08:11:24
ဇန်နဝါရီလ ၂၄ ရက်(အင်္ဂါနေ့)
ရှင်မာကု ၃ : ၃၁ - ၃၅
Sr.Theresa Myint Myint Naing(ISR)
Posted by Sr. Benedetta Myat Hnin Nwe(ISR)
“ထိုအခါ ကိုယ်တော်၏မယ်တော်နှင့် ညီအစ်ကိုတို့သည်လာ၍အပြင်၌ရပ်နေကြပြီးကိုယ်တော့်ကိုခေါ်စေခြင်းငှာ လူစေလွှတ်ကြ၏။လူအစုအဝေးသည် ကိုယ် တော်၏ထံတော်ပါး၌ ဝိုင်းလျက်ထိုင်နေကြသည်ဖြစ်၍ သူတို့က ကိုယ်တော်၏မယ်တော်နှင့် ညီအစ်ကိုတို့သည်ကိုယ်တော့်ကိုတွေ့လိုသဖြင့် အပြင်၌ရပ်နေကြပါသည်ဟုလျှောက်ကြ၏။ကိုယ်တော်ကလည်းငါ၏အမိနှင့်ငါ၏ညီအစ်ကိုတို့ကား မည်သူတို့နည်းဟု မေးတော်မူပြီးနောက်၊မိမိအနီး၌ဝိုင်းရံ၍ ထိုင်နေကြသောသူများကို ကြည့်တော်မူကာ ဤသူတို့သည်ကား ငါ၏အမိနှင့်ငါ၏ညီအစ်ကိုများပေတည်း။ဘုရားသခင်၏အလိုတော်ကို ဆောင်ရွက်သောသူမှန်သမျှသည်ငါ၏ညီအစ်ကို၊ငါ၏နှမနှင့်ငါ၏အမိတို့ဖြစ်ကြသတည်းဟု မိန့်တော်မူ၏။”ကျွန်ုပ်တို့၏စိတ်ခံစားမှုအတိုင်း ကျွန်ုပ်တို့နေသောအခါ ခင်မင်ရာအပေါင်းအသင်းမိတ်ဆွေများသည် ကျွန်ုပ်နှင့်အဆင်ပြေသောသူများနှင့်သာဆက်သွယ်ဆက်ဆံနေမည်ဖြစ်သည်။မောင်နှမရင်းခြာများ၌ပင် ကျွန်ုပ်တို့ပြောဆိုနေကြသည့်"မျက်ကြောတည့်သည်"ဆိုသောသူများနှင့်ပို၍လေပေး ဖြောင့်တတ်ကြသည်မှာကျွန်ုပ်တို့လူသားဟုခေါ်သောလူသားဖြစ်ခြင်းကြောင့်ပင်ဖြစ်ပေမည်။ယနေ့ကြားနာရသော အသက်ပေးသည့်နှုတ်တော်ထွက်စကားတွင်ခရစ်တော်သခင်သည် ဘုရားသခင်၏အလိုတော်ကိုဆောင်ရွက်သောသူမှန်သမျှကို သူ၏ညီအစ်ကို၊သူ၏ နှမနှင့် သူ၏အမိတို့ဖြစ်ကြောင်းနှုတ်မြွက်ထားပါသည်။ကျွန်ုပ်တို့သည် မပြည့်စုံသောလူသားများ၊အားနည်းချက်နှင့်လူသားများဟူသော ဆင်ခြင်များနှင့် ဖန်ဆင်းရှင်ဘုရားသခင်ကိုထိခိုက်ပြစ်မှားဆန့်ကျင်မိသည်သာမက နီးစပ်သူများဖြစ်သော ဘဝတူလူသားများကိုလည်း ဆန့်ကျင်နာကျင်စေပါသည်။လူတစ်ဦးမှားယွင်းလမ်းလွှဲနေခြင်း၌ကျွန်ုပ်တို့နှုတ်ဆိတ်နေပါမူ သို့မဟုတ် အမှားပြုသူကို ကျွန်ုပ်တို့ဝန်းကျင်မှရှောင်ရှားဖယ်ကြဉ်ထားပါမူ ကျန်းမာသောဝန်းကျင်ကို တည်ဆောက်နိုင်ပါမည်လော။ယနေ့ ဘဝတူလူသားများဖြစ်သည်သာမက တမြေတည်းနေ၊ တရေတည်းသောက်ကြသောသူများတို့၏ အမြင်မတူ၊ခံယူချက်ကွဲပြားလျက် အမုန်းပွားသတ်ဖြတ်ခြင်းသည်သာအရာရာ၏အဖြေ ဟူ၍တွေးထင်မှတ်ကာကြောက်ရွံ့ထိတ်လန့်ခြင်းများနှင့် သွေးချောင်းစီးနေကြခြင်းသည်သာ ကျွန်ုပ်တို့နေ့စဉ်အဖေါ်ပြုရာမိတ်ဆွေဖြစ်နေရပါသည်။ဤအတိုင်းဆိုလျင် ခရစ်တော်သခင်သည် သူ၏ညီအစ်ကိုမောင်နှမများကို ကျွန်ုပ်တို့တွင်ရှာဖွေတွေ့ရှိနိုင်ပါမည်လော။အိုသခင်ခါးသီးနာကျည်းမှုဟုသောအသီးလှိုင်လှိုင်ပေါနေသည့် ယနေ့အချိန်အခါတွင်ကိုယ်တော်၏အလိုတော်ကိုရှာဖွေတွေ့ရှိနိုင်စေ၍ ညီရင်းမောင်နှမများဟူသော ချစ်ခြင်းအသီးကို ဖူးပွင့်ပေါများစေတော်မူပါ။
