 for web4.jpg)
 for web3a.jpg)
2023-01-25 06:28:05
ဇန်နဝါရီလ ၂၆ ရက်(ကြာသပတေးနေ့)
ရှင်လုကာ ၁၀ : ၁ - ၉
Sr. Theresa Myint Myint Naing(ISR)
Posted by Sr. Benedetta Myat Hnin New(ISR)
“ထို့နောက် ကိုယ်တော်သည် အခြားသောတပည့်တော်အပါးခုနစ်ဆယ်တို့ကို ရွေးကောက်ပြီးလျှင် ကိုယ်တော်တိုင် ကြွရောက်မည့်မြို့ရွာအသီးသီးသို့ နှစ်ပါးစီကြိုတင် စေလွှတ်တော်မူ၏။- ထိုအခါ ကိုယ်တော်က သူတို့အား မိန့်တော်မူသည်မှာ ရိတ်သိမ်းစရာအသီးအနှံများစွာရှိ၏။လုပ်ဆောင်သောသူတို့မူကားနည်းကြ၏။ ထို့ကြောင့် မိမိ၏လယ်ကွင်းထဲသို့ လုပ်သားများကို စေလွှတ်မည့်အကြောင်း လယ်ပိုင်ရှင်ကို တောင်းလျှောက်ကြလော့။သွားကြလော့။ ဝံပုလွေတို့အလယ်၌သိုးငယ်များကဲ့သို့ သင်တို့ကို ငါစေလွှတ်၏။ပိုက်ဆံအိတ်ကို လည်းကောင်း၊ လွယ်အိတ်ကိုလည်းကောင်း၊ဖိနပ်ကိုလည်းကောင်း သင်တို့ယူဆောင်မသွားကြနှင့်။လမ်း၌လည်းမည်သူ့ကိုမျှ နှုတ်မဆက်ကြနှင့်။မည်သည့်အိမ်သို့မဆို သင်တို့ဝင်ကြသောအခါ ဤအိမ်၌ ငြိမ်းချမ်းသာယာခြင်းရှိပါစေဟု ဦးစွာနှုတ်ဆက်ကြလော့။ငြိမ်းချမ်းသာယာခြင်းကိုလိုလားသောသူသည် ထိုနေရာ၌ရှိလျှင် သင်တို့၏ ငြိမ်းချမ်းသာယာခြင်းသည် သူ့အပေါ်သို့ သက်ရောက်လိမ့်မည်။ သို့မဟုတ်လျှင် ၎င်းသည် သင်တို့ထံသို့ ပြန်လာလိမ့်မည်။သင်တို့သည် ထိုအိမ်တွင်နေပြီးလျှင် သူတို့တည်ခင်းကျွေးမွေးသမျှကို စားသောက်ကြလော့။ အကြောင်းမူကား အလုပ်လုပ်သောသူသည် မိမိ၏လုပ်အားခကို ရထိုက်၏။ တစ်အိမ်မှတစ်အိမ်သို့မရွှေ့ပြောင်းကြနှင့်။- မည်သည့်မြို့သို့မဆို သင်တို့ဝင်ကြ၍ လူတို့သည် သင်တို့ကိုလက်ခံကြလျှင် သင်တို့ရှေ့တွင် တည်ခင်းကျွေးမွေးသမျှကိုသင်တို့စားကြလော့။ထိုအရပ်၌ရှိသော လူနာများကို ရောဂါပျောက်ကင်းစေကြ၍ဘုရားသခင်၏နိုင်ငံတော်သည် သင်တို့နှင့်နီးလာပြီဟု သူတို့အားဆိုကြလော့။” ငြိမ်းချမ်းသာယာခြင်းကို လူတိုင်းနှစ်သက်လိုလားကြသည်။အထူးသဖြင့် ယနေ့ကဲ့သို့ အရာရာဖရိုဖရဲဖြစ်နေသည့်အချိန်တွင် ငြိမ်းချမ်းသာယာခြင်းကို ပို၍တောင့်တကြသည်။ လိုချင်သောဆန္ဒရှိကြသော်လည်း အားနည်းသူများကို အစေခံကျွန်သာသာ ဆက်ဆံလို၍ ကြီးစိုးလိုသောသူများကြောင့်ငြိမ်သက်ခြင်းသည် ဝေးသထက်ဝေးခဲ့ရလေပြီ။ဆုံးရှုံးမှုများနှင့် နာကျင်မှုများအကြား အနိုင်ကျင့်ဖျက်ဆီးသော အရာများဖြင့် အဝေးမှလည်းကောင်း၊လာရောက်ခြင်းဖြင့်လည်းကောင်း သေကြေပျက်စီးစေခြင်းကြောင့်ကျွန်ုပ်တို့လူမှုအသိုင်းအဝိုင်းတွင် တစ်သက်တာနာကျည်းမှုများသာ တိုးပွားလာစေရာ ခွင့်လွတ်ခြင်းသည် အဝေးသို့ခရီးနှင်သွားခဲ့လေပြီးဖြစ်သည်။သို့သော် ယနေ့ကြားနာရသော အသက်ပေးသည့် နှုတ်တော်ထွက်စကားတွင်နှုတ်မြွက်တော်မူသည်ကား ယနေ့အချိန်အခါသည် ရိတ်သိမ်းရန်အကောင်းဆုံးသောအချိန်ဖြစ်၍ လိုအပ်နေသူများနှင့်အဖေါ်ပြုကာ ကိုယ်တော်ရှင်၏ငြိမ်းချမ်းသာယာခြင်းကိုကြေငြာကြရမည်ဟူ၍ဖြစ်သည်။မည်သည့်နေ့တွင် မည်ကဲ့သို့သောပုံစံဖြင့် ဤလောကမှ လူ့ဂုဏ်သိက္ခာကင်းမဲ့စွာဖြင့် ထွက်ခွာသွားရမည်မသိသော စိုးထိတ်ကြောက်ရွံ့နေသည့်ကျွန်ုပ်တို့ညီအစ်ကိုများအကြားသို့သွားရန် ကျွန်ုပ်တို့ကိုကိုယ်တော်ရှင်ဖိတ်ခေါ်နေပါသည်။ကိုယ်တော်ရှင်၏ ကယ်တင်ခြင်းသတင်းကောင်းနှင့် ငြိမ်းချမ်းသာယာခြင်းကို ကြေငြာရန် ယုံကြည်သူကျွန်ုပ်တို့တစ်ဦးစီကိုကိုယ်တော်ရှင်စေလွှတ်နေပါသည်။တစ်ဦးစီ၏စိတ်နှလုံးထဲတွင်ငြိမ်းချမ်းသာယာခြင်းကြီးစိုးမှသာ ကိုယ်တော်၏ ငြိမ်းချမ်းသာယာခြင်းကို ပေးသူနှင့် လက်ခံသူပါ ထိုက်တန်ပေမည်။အိုသခင် ကျွန်ုပ်ကို ကိုယ်တော်၏ငြိမ်းချမ်းရေးလက်နက်ဖြစ်စေတော်မူပါ။
