 for web4.jpg)
 for web3a.jpg)
2023-02-13 04:24:21
ဖေဖေါ်ဝါရီလ ၁၄ ရက်နေ့၊ ၂၀၂၃၊ အင်္ဂါနေ့ ၊ သာမန်ကာလ ဆဌမအပတ်
Mk.8:14-21
Sr. Christine Dah (RGS)
Posted by Sr. Benedetta Myat Hnin Nwe(ISR)
ထိုအချိန်တွင် တပည့်တော်တို့သည်ပေါင်မုန့်ယူဆောင်လာရန်မေ့လျော့ခဲ့ကြသဖြင့် လှေပေါ်တွင်သူတို့၌ပေါင်မုန့်တစလုံးသာရှိ၏။ကိုယ်တော်ကလည်း ဖာရီဇေးဦးတို့ တဆေးနှင့်ဟေရုဒ်၏ တဆေးကိုရှောင်ရန်သတိပြုကြလော့ဟု မိန့်တော်မူ၏။ထိုအခါသူတို့က ငါတို့၌ပေါင်မုန့်မပါသောကြောင့် ဤသို့ပြောသည်ဟုအချင်းချင်းပြောဆိုကြ၏။ ရှင်မာကု ၈:၁၄-၁၆
#ထောက်ရူချက် ငယ်ငယ်က အိမ်မှာခေါင်ချက်ခဲ့ဖူးသည်။ခေါင်ချက်ရာတွင်တဆေးသည် အရေးပါသောအရာဖြစ်သည်။မေမေက တဆေးဖောက်မည့်နေ့တွင်အိမ်၌အချဥ်၊အခါးရှောင်သည်။အိမ်သူအိမ်သား ရွှင်လန်းပျော်ရွှင်သော ရက်မျိုးရွေးသည်။သမီးပျိုတို့၏ ဥတုရာသီစက်ဝန်းကအစ အကဲခတ်သည်။ဧည့်သည်ကိုကန့်သတ်သည်။မေမေသည် ဥပုပ်မစောင့်ရရုံတမင်။ခေါင်ချက်သောအခါတွင်လည်းတဆေးထည့်မည်လူကိုရွေးရပြန်သည်။အိမ်၌မမကစိတ်ရှည်၍ အေးအေးဆေးဆေးရှိသည်။ စကားနည်းသည်။သူတဆေးထည့်လျှင်ခေါင်ရည်ချိုသည်။ကျွန်မတဆေးထည့်လျှင် ခေါင်ရည်ချဥ်သည်။မေမေက"မရဘူး ဒီခလေးမ စိတ်ဆတ်တယ်"ဟု ကောက်ချက်ချသည်။သို့ဖြစ်ခေါင်ချက်သည့်နေ့တွင်ကိုယ်သည် နောက်ဆုံး စဥ့်အိုးထဲထည့်သည့်အဆင့်သာ လုပ်ရသည်။သို့သော် မုန်ညင်းချဥ်တည်လျှင်ကိုယ်သည် အားကိုးရသောဆေးဆရာ။အစွဲအလန်းအယူအဆကြောင့်လော့ တိုက်ဆိုင်မှုကြောင့်လော။မယုံပြန်တော့လည်း စဥ့်အိုးလိုက် ခေါင်ရည်သွန်ပစ်ရတဲ့အဖြစ်မျိုးကြုံရသည်။ခပ်ချဥ်ချဥ် လက်အစုံကိုမှ ဘုရားကခေါ်သည်။ခရစ်တော်၏အချိုဓာတ်ခံတဆေးနှင့်ထိတွေ့ပြီးနောက် ချဥ်သောလက်တစုံသည် ချိုးသောလက်တစုံသို့ ဖြည်းဖြည်းပြောင်းလဲလာသည် ဟုဆိုရမည်။ခုရက်ပိုင်း "THE CHOSEN" ရုပ်ရှင်ကြည့်ဖြစ်သည်။သခင်ယေဇူးတပည့်တော်များ၏ အောက်ခြေလူနေမှုဘဝ၊သာမန်လူတို့ကျင့်စဥ်၊ ဂုရုမပါ၊ဆေးဆရာမဟုတ်၊မာတေဦးလိုပေစောင်းပေစောင်းနှင့် ပေတရူလို လူတွင်ကျယ်လေးတွေ နှင့်ပုထုစဥ်လူသားစရိုက်လေးတွေကိုသဘောကျမိသည်။ သို့သော် ခရစ်တော်၏ အချိုဓာတ်ခံတဆေးကြောင့် အသင်းတော်၏ ဗျည်းအက္ခရာထိပ်က သူတို့နာမည်ထာဝရတည်သည်။ယနေ့ကျမ်းစာတွင် တပည့်တော်များသည်ရုပ်ပိုင်းဆိုင်ရာအစားအသောက်အတွက်သာ အာရုံရောက်စိတ်ပူသည်။သို့သော် ခရစ်တော်ကသူတို့၏ကိုယ်ကျင့်တရားနှင့်ယုံကြည်ခြင်းတို့ကို ဖာရီဇေဦးနှင့်ဟေရုဒ်တို့၏ ချဥ်သောတဆေးကြောင့် ပျက်စီးမည်ကိုစိုးရိမ်သည်။ထို့ကြောင့် ခရစ်တော်သည်တပည့်တော်တို့အား ဖာရီဇေဦးတို့ရန်ဘေးမှသတိပြုရန်"Watch out"ဟူ၍ပြင်းပြစွာသတိပေးသည်။ ခေတ်မီသော IT နှင့် ပျက်စီးသောစနစ်ဆိုးအောက်မှာ အပျက်သဘောဆောင်သော အတွေးအခေါ် အပြောအဆို အကျင့်အကြံတို့၏လောင်းရိပ်အောက်၌ လှောင်ပိတ်မနေရလေအောင်ခရစ်တော်ကိုသာ မျက်ချည်မပြတ် ယုံကြည်အားကိုးလျှက် ကိုယ်သည် ချိုမြိန်သောတဆေးအဖြစ်ပတ်ဝန်းကိုပြောင်းလဲနိုင်သူဖြစ်ရန် ကြိုးစားဆုတောင်းကြပါစို့။ထိုသို့ဆိုလျှင် သင်သည်လည်း စိတ်နှလုံးအေးချမ်းရပါမည်။အားလုံးကိုယ်စိတ်ငြိမ်းချမ်းကြပါစေ။
