ထိုအခါ တစ်ဆယ့်နှစ်ပါးထဲမှတစ်ဦးဖြစ်သော ဂျူဒအစ္စကာရီယုဒ်သည်ရဟန်းအကြီးအကဲများထံသို့သွား၍၊ထိုသူကို သင်တို့လက်သို့ အကျွန်ုပ်အပ်ပေးလျှင်သင်တို့သည် အကျွန်ုပ်အား မည်သည့်အရာကိုပေးမည်နည်းဟုဆိုသော်သူတို့သည်သူအား ငွေဒင်္ဂါးသုံးဆယ် ပေးလိုက်ကြ၏။ထိုအချိန်မှစ၍ သူသည်လည်းကိုယ်တော့်ကို အပ်နှံခြင်းငှါအခွင့်ကောင်းကိုရှာကြံလျက်နေ၏။တဆေးမပါသောပေါင်မုန့်ပွဲတော်၏ပထမနေ့၌ တပည့်တော်တို့သည်ယေဇူးထံတော်သို့ချဉ်းကပ်ကြပြီးလျှင်၊ကိုယ်တော်သည်ပါစကားပွဲညစာကိုသုံးဆောင်ရန်တပည့်တော်တို့ကို မည်သည့်နေရာတွင် ပြင်ဆင်စေလိုသနည်းဟုမေးလျှောက်ကြ၏။ကိုယ်တော်ကလည်း မြို့ထဲရှိ ဤမည်သောသူထံသို့သွားကြ၍ ဆရာသခင်မှာလိုက်သည်ကား ငါ၏အချိန်နီးပြီ၊ငါ၏တပည့်တော်တို့ နှင့်အတူ သင်၏အိမ်၌ ပါစကားပွဲကိုကျင်းပမည်ဟူ၍ သူ့အား ပြောကြားကြလော့ဟု မိန့်တော်မူ၏။ထိုအခါ တပည့်တော်တို့သည် မိမိတို့အားယေဇူးမိန့်မှာတော်မူသည့်အတိုင်း ပြုလုပ်ကြ၍ပါစကားပွဲကိုကျင်းပရန် ပြင်ဆင်ကြလေ၏။ညနေအချိန်ရောက်သောအခါ ကိုယ်တော်သည်တပည့်တော်တို့ တစ်ဆယ့်နှစ်ပါးတို့နှင့်အတူ စားပွဲ၌ထိုင်တော်မူ၏။ထို့နောက် သူတို့သည်ညစာစားလျက် နေကြစဉ်၊ယေဇူးက၊သင်တို့အား ငါအမှန်ဆိုသည်ကားသင်တို့ထဲမှတစ်ဦးသည်ငါ့ကိုသစ္စာဖောက်လိမ့်မည်ဟုမိန့်တော်မူ၏။ထိုအခါသူတို့သည်အလွန်ပင်ဝမ်းနည်းကြသဖြင့်သခင်တပည့်တော်ြဖစ်သလောဟု အသီးသီးမေးလျှောက်ကြ၏။ကိုယ်တော်ကလည်း ငါနှင့်အတူပန်းကန်တွင်လက်နှိုက်သောသူသည်ငါ့ကို သစ္စာဖောက်လိမ့် မည်။လူသားသည် မိမိနှင့်ပတ်သက်၍ ကျမ်းစာတော်မြတ်၌ရေးသားထားသည့်အတိုင်း သွားရမည်မှန်၏။သို့သော် လူသားအပေါ်၌ သစ္စာဖောက်သောသူသည် အမင်္ဂလာရှိ၏။ထိုသူသည် မွေးဖွားခြင်းမခံခဲ့ရလျှင် သာ၍ကောင်း၏ဟုမိန့်တော်မူ၏။ကိုယ်တော်ကိုသစ္စာဖောက်သောဂျူဒကကလည်း၊သခင်ဘုရား၊တပည့်တော်ဖြစ်သလောဟု မေးလျှောက်လျှင်ကိုယ်တော်က သူ့အား သင်ဆိုလေပြီဟုမိန့်တော်မူ၏။သူတို့ ညစာစားနေကြစဥ်တွင်ယေဇူးသည်ပေါင်မုန့်ကိုယူ၍ကောင်းချီးပေးတော်မူပြီးလျှင်ဖဲ့၍ မိမိ၏တပည့်တော်ကြီးတို့အားပေးလျက်၊ဤအရာသည် ငါ၏ခန္ဓာကိုယ်ဖြစ်၏၊ယူ၍စားကြလော့ဟု မိန့်တော်မူ၏။ထို့နောက်ကိုယ်တော်သည် ခွက်တော်ကိုလည်းယူတော်မူ၍ ကျေးဇူးတော်ကိုချီးမွမ်းပြီးနောက် တပည့်တော်တို့အားပေးလျက်မိန့်တော်မူသည်ကား သင်တို့အားလုံးဤခွက်မှသောက်ကြလော့။ ဤသည်ကား လူအားလုံးတို့အတွက်အပြစ်ဖြေလွှတ်ခြင်းငှါသွန်းလောင်းခံရမည့်ပဋိညာဉ်သစ်နှင့်ဆိုင်သောငါ၏သွေးဖြစ်၏။သင်တို့အား ငါဆိုသည်ကား ငါ့ခမည်းတော်၏ နိုင်ငံတော် တွင် ဤစပျစ်နွယ်၏အသီးမှ စပျစ်ရည်အသစ်ကို သင်တို့နှင့်အတူ သောက်ရသည့်နေ့တိုင်အောင်၎င်းကို နောက်တစ်ဖန်ငါသောက်လိမ့်မည်မဟုတ်ဟု မိန့်တော်မူ၏။ထို့နောက် သူတို့သည်ဓမ္မသီချင်း တစ်ပုဒ်ကိုသီဆိုကြပြီးလျှင်သံလွင်တောင်သို့ထွက်သွားကြ၏။ထို့နောက် ယေဇူးကတပည့်တော်တို့အား မိန့်တော်မူသည်မှာဤည၌သင်တို့အားလုံးသည်ငါ့ကိုစွန့်ခွာသွားကြလိမ့်မည်။အကြောင်းမူကား ကျမ်းစာတော်မြတ်၌ရေးထားသည်ကား သိုးထိန်းကိုငါတိုက်ခိုက်မည်။ထိုအခါသိုးစုထဲမှ သိုးတို့သည်တကွဲတပြားဖြစ်ကြလိမ့်မည်ဟူ၍ဖြစ်သတည်း။သို့သော်လည်း ငါသည်သေခြင်းမှရှင်ပြန်ထမြောက်ပြီးနောက်သင်တို့ရှေ့မှကြို၍ ဂါလေလေးယနယ်သို့ သွားနှင့်မည်ဟုမိန့်တော်မူ၏။ထိုအခါ ပေတရုကသူတို့အားလုံးသည် ကိုယ့်တော်ကိုစွန့်ခွာသွားကြသော်လည်း တပည့်တော်သည်မည်သည့်အခါမျှစွန့်ခွာသွားလိမ့်မည်မဟုတ်ဟုလျှောက်လေ၏။ယေဇူးကလည်းသင့်အားငါအမှန်ဆိုသည်ကား ဤည၌ပင်ကြက်မတွန်မီသင်သည်ငါ့ကိုသုံးကြိမ်ငြင်းပယ်လိမ့်မည်ဟု မိန့်တော်မူ၏။ပေတရုက၊အကယ်၍ တပည့်တော်သည်ကိုယ်တော်နှင့်အတူအသက်သေရမည်ဆိုလျှင်ပင်ကိုယ်တော့်ကို ငြင်းပယ်လိမ့်မည်မဟုတ်ပါဟု လျှောက်လေ၏။တပည့်တော်အားလုံးတို့သည်လည်း ထိုနည်းတူလျှောက်ကြ၏။ထိုအခါယေဇူးသည်တပည့်တော်တို့နှင့်အတူဂျက်ဆေမာနီအမည်ရှိသောဥယျာဉ်သို့ ရောက်တော်မူလျှင်၊သူတို့အား ငါသည်ထိုနေရာသို့သွား၍ဆုတောင်းစဥ်တွင်ဤနေရာ၌ ထိုင်နေကြလော့ဟုမိန့်တော်မူပြီးမှ၊ပေတရုနှင့်ဇေဘေဒေးဦး၏သားနှစ်ယောက်တို့ကို အတူခေါ်သွားတော်မူ၏။ဤတွင်ကိုယ်တော်သည် ပူဆွေးညှိုးငယ်၍ပူပန်ခြင်းကို စတင်ခံစားရတော်မူ၏။ထိုအခါ ကိုယ်တော်ကငါ၏စိတ်နှလုံးသည် သေလုမတတ် ပူဆွေးခြင်းကို ခံစားရ၏။ သင်တို့ ဤအရပ်တွင် နေကြ၍ ငါနှင့်အတူ နိုးကြားစွာ စောင့်နေကြလော့ဟု မိန့်တော်မူ၏။ ထို့နောက် ကိုယ်တော်သည် ထိုနေရာမှ ရှေ့သိုအနည်းငယ် ကြွတော်မူ၍ မျက်နှာကို ‌မြေတွင်အပ်ကာ ပျပ်ဝပ်လျက် ဆုတောင်း တော်မူသည်မှာ အိုအဖ၊ ဖြစ်နိုင်လျှင် ဤခွက်ကို အကျွန်ုပ်ထံမှ လွှဲဖယ်တော်မူပါ။သို့ရာတွင် အကျွန်ုပ်၏ အလိုအတိုင်းမဟုတ်ဘဲ ကိုယ်တော်၏ အလိုတော်အတိုင်းသာ ဖြစ်ပါစေသော်ဟု ဆုတောင်းတော်မူ၏။ထို့နောက် ကိုယ်တော်သည် တပည့်တော်တို့ထံသို့ လာတော်မူ၍ သူတို့အိပ်ပျော် လျက်ရှိကြသည်ကိုတွေ့လျှင်၊ ပေတရုအား သင်တို့သည် တစ်နာရီမျှ မအိပ်ဘဲ ငါနှင့်အတူ မစောင့်နိုင် ကြပြီလော။စုံစမ်းနှောင့်ယှက်ခြင်းသို့မပါဝင်ရစေရန်ဆုတောင်းလျက်နိုးကြားစွာ စောင့်နေကြလော့။စိတ်ဆန္ဒသည် ပြင်းပြသော်လည်း ကိုယ်ခန္ဓာမူကား အားနည်းလှသည်ဟုမိန့်တော်မူ၏။တစ်ဖန်ကိုယ်တော်သည် ဒုတိယအကြိမ်ထွက်သွားတော်မူ၍ အကျွန်ုပ်၏အဖဤခွက်ကိုလွှဲဖယ်ရန်မဖြစ်နိုင်ဘဲအကျွန်ုပ်သောက်ရမည်ဆိုလျှင်ကိုယ်တော်၏ အလိုတော်အတိုင်းဖြစ်ပါစေဟုဆုတောင်းပြန်၏။ထိုမှတစ်ဖန်ကိုယ်တော်သည် ပြန်လာသောအခါ တပည့်တော်တို့အိပ်ပျော်လျက်ရှိကြသည်ကို တွေ့တော်မူ၏။ အကြောင်းမူကား သူတို့၏မျက်စိများသည် လေးလံသောကြောင့် ဖြစ်၏။ ဤသို့ဖြင့် ကိုယ်တော်သည် သူတို့ကို တစ်ဖန်ထားခဲ့၍ ထွက်သွားပြီးလျှင်၊ယခင်က မြွက်ဆိုခဲ့သည့်အတိုင်းပင်သုံးကြိမ်မြောက်ဆုတောင်းတော်မူ၏။ထို့နောက် ကိုယ်တော်သည်တပည့်တော်တို့ထံသို့ပြန်လာ၍ သင်တို့သည် အိပ်စက်အနားယူဆဲပင် ရှိသေးသလော။လူသားကို အပြစ်သားတို့၏လက်သို့အပ်နှံသောအချိန်နာရီရောက်ပြီးထကြ၊သွားကြစို့၊ငါ့ကို အပ်နှံမည့်သူသည်အနီးသို့ရောက်လာပြီဟု မိန့်တော်မူ၏။ထိုသို့ကိုယ်တော်မိန့်တော်မူစဥ် တစ်ဆယ့်နှစ်ပါးတို့တွင်တစ်ဦးအပါအဝင်ဖြစ်သောဂျူဒနှင့် အတူရဟန်းအကြီးအကဲများနှင့် သက်ကြီးဝါကြီးများက စေလွှတ်လိုက်သည့် များပြားသော လူအစု အ‌ဝေးတို့သည် တုတ်၊ ဓားများကို ကိုင်ဆောင်လျက် လာကြ၏။ ကိုယ့်တော်ကို သစ္စာဖောက်သော သူက ငါနမ်း၍ နှုတ်ဆက်သောသူသည် ထိုသူပင် ဖြစ်၏။ သူ့ကို ဖမ်းကြလော့ဟုကြိုတင်၍ အချက်ပေးထားလေ၏။ထို့နောက် ဂျူဒသည်ယေဇူးထံတော်သို့ ချက်ချင်းပင်ချဉ်းကပ်၍ အာဝေ၊ရဗွီဟု ဆိုလျက် ကိုယ်တော့်ကိုနမ်းလေ၏။ယေဇူးကလည်း မိတ်ဆွေ၊သင်ပြုလုပ်ရန်လာသည့်အမှုကိစ္စကို ပြုလုပ်ပါလော့ဟု မိန့်တော်မူလျှင်သူတို့သည်လာကြ၍ကိုယ့်တော်ကိုဖမ်းဆီးချုပ်နှောင်ကြ၏။ထိုအခါ ယေဇူးနှင့်အတူရှိနေသော သူတစ်ဦးသည် လက်ကိုဆန့်၍ ဓားကိုဆွဲထုတ်ပြီးလျှင် ရဟန်းချုပ် ၏ အစေခံတစ်ဦးကိုခုတ်သဖြင့် ထိုသူ၏နားရွက် ပြတ်လေ၏။ယေဇူးကလည်း ထိုသူအား သင့်ဓားကို ဓားအိမ်၌ ပြန်သွင်းထားလော့။အကြောင်းမူကား ဓားကိုကိုင်သောသူတို့သည် ဓားဖြင့်ပျက်စီးခြင်းသို့ ရောက်လိမ့်မည်။ငါ့ထံသို့ ယခုချက်ချင်း ကောင်းကင်တမန်တော် တစ်ဆယ့်နှစ်တပ်မျှမကစေလွှတ်ရန်အတါက် ငါ့ခမည်းတော်ထံငါမတောင်းခံနိုင်ဟု သင်ထင်သလော။သို့ရာတွင် ထိုသို့ပြုပါက မည်သို့ဖြစ်ရမည်ဟုဆိုထားသောကျမ်းချက်များသည်မည်သို့ ပြည့်စုံနိုင်ပါမည်နည်းဟု မိန့်တော် မူ၏။ထိုအချိန်နာရီ၌ ယေဇူးသည်လူအစုအ‌ဝေးတို့အားဆိုသည်မှာသင်တို့သည် တုတ်၊ဓားများကိုကိုယ်ဆောင်လျက်ဓားပြဖမ်းသကဲ့သို့ ငါ့ကိုဖမ်းဆီးရန် ထွက်လာကြသလော။ငါသည် ဗိမာန်တော်၌ထိုင်၍ နေ့စဉ်နေ့တိုင်းသွန်သင်ဟော‌ပြောနေစဉ်သင်တို့သည်ငါ့ကို မဖမ်းဆီးကြ။သို့ရာတွင် ဤအဖြစ်အပျက်အားလုံးသည် ပရောဖက်ကျမ်းများပြည့်စုံစေမည့်အ‌ကြောင်းဖြစ်သတည်းဟုမိန့်တော်မူ၏။ထိုအခါတပည့်တော်အားလုံးတို့သည်ကိုယ်တော့်ကို ထားခဲ့၍ထွက်ပြေးကြလေ၏။ထိုအခါ ယေဇူးကိုဖမ်းဆီးကြသောသူတို့သည် ကိုယ်တော့်ကို ကျမ်းတတ်ဆရာများနှင့် သက်ကြီးဝါကြီးတို့ စုဝေးလျက်ရှိသော ရဟန်းချုပ်ကာအိဖ၏အိမ်သို့ ခေါ်ဆောင်သွားကြ၏။ပေတရုမူ ကား ရဟန်းချုပ်၏ အိမ်တော်ဝင်းတိုင်အောင်နောက်တော်သို့ မလှမ်းမကမ်းမှ လိုက်ပါလျက်အတွင်းသို့ ဝင်ပြီးလျှင်ထိုအမှုအခင်းကို အဆုံးတိုင်အောင် သိမြင်နိုင်ရန်အစောင့်များနှင့်အတူထိုင်နေလေ၏။ရဟန်းအကြီးအကဲများနှင့်တရားစီရင်သော အဖွဲ့တစ်ခုလုံးသည်ယေဇူးကိုသေဒဏ်စီရင်အံ့ သောငှါ မမှန်သောသက်သေအထောက်အထားများကို ရှာကြ၏။မမှန်သော သက်သေခံသူများလာကြသော်လည်း မည်သည့်သက်သေအထောက်အထားမျှမူသူတို့မတွေ့ကြချေ။နောက်ဆုံး၌ကား မမှန်သောသက်သေခံနှစ်ဦးလာကြ၍၊ဤသူကငါသည်ဘုရားသခင်၏ ဗိမာန်တော်ကိုဖျက်ဆီး၍၎င်းကို သုံးရက်အွင်းပြန်လည်တည် ဆောက်နိုင်စွမ်းရှိသည်ဟုပြောခဲ့သည်ဟုထွက်ဆိုကြ၏။ထိုအခါ ရဟန်းချုပ်သည် ထ၍၊သင်၌ဖြေကြားစရာမရှိသလော။သင့်ကို စွပ်စွဲ၍ ထွက်ဆိုကြသောဤသူတို့၏ သက်သေခံချက်များကား မည်သည့်အရာကိုဆိုလိုသနည်းဟုကိုယ်တော်အားမေးလေ၏။ယေဇူးမူကား တိတ်ဆိတ်စွာနေတော်မူ၏။ရဟန်းချုပ်ကလည်း သင်သည် ခရစ်တော်တည်းဟူသောဘုရားသခင်၏ သားတော်ဟုတ်၊ မဟုတ်ကိုငါတို့အား ပြောပြမည့်အကြောင်း အသက်ရှင်တော်မူသောဘုရားသခင်ကို တိုင်တည်၍သင့်အား ငါအမိန့်ရှိသည်ဟုဆို၏။ယေဇူးကလည်း သင်ဆိုလေပြီ။သို့သော် သင်တို့အားငါဆိုသည်ကား လူသားသည်တန်ခိုးတော်ရှင်၏လက်ယာဘက်၌ထိုင်လျက် မိုးတိမ်ပေါ်ကြွလာသည်ကို နောင်ကာလ၌ သင်တို့ မြင်ကြရလိမ့်မည်ဟုသူ့အားမိန့်တော်မူ၏။ထိုအခါ ရဟန်းချုပ်သည်မိမိ၏ဝတ်ရုံတို့ကို ဆုတ်လျက်သူသည်ဘုရားသခင်အား ထိခိုက်သောစကားကိုပြောဆိုခဲ့လေပြီ။မည်သည့်သက်သေများ အကျွန်ုပ်တို့လိုပါသေးသနည်း။ဘုရားသခင်အား ထိခိုက်သောသူ၏စကားကို ယခုပင်သင်တို့ ကြားကြရလေပြီ။သင်တို့ မည်သည့်ထင်မြင်ကြသနည်းဟုဆိုလျှင်သူတို့က ဤသူသည် သေထိုက်၏ဟုပြန်ဖြေကြ၏။ထို့နောက် သူတို့သည်ကိုယ်တော်၏မျက်နှာတော်ကို တံတွေးနှင့်ထွေးကြ၍ကိုယ်တော့်ကိုလက်သီးနှင့်ထိုးကြ၏။တချို့သည်ကိုယ်တော်၏ပါးကို ရိုက်ကြလျက်၊အသင်ခရစ်တော်၊သင့်အား မည်သူရိုက်သည်ကိုအကျွန်ုပ်တို့အား ပရောဖက်ဉာဏ်နှင့်ဟောတောမူပါဟုဆိုကြ၏။ပေတရုမူကား အိမ်တော်ဝင်းအပြင်ဘက်၌ ထိုင်နေစဉ်အစေခံအမျိုးသမီးတစ်ဦးသည်သူ့ထံသို့လာ၍၊သင်သည်လည်း ဂါလေလေးယနယ်သားယေဇူးနှင့်အတူရှိခဲ့သည်ဟုဆို၏။သို့သော် သူကသင်မည်သည့်အရာကိုပြောဆိုကြောင်း အကျွန်ုပ်မသိဟုဆို၍လူအပေါင်းတို့၏ရှေ့၌ ငြင်းဆိုလေ၏။ထို့‌နောက် သူသည်အိမ်တော်ဝင်းတံခါးဆီသို့ထွက်သွားသောအခါ၊အ‌ခြားအစေခံအမျိုးသမီးတစ်ဦးသည် သူ့ကိုမြင်၍ထိုနေရာ၌ရှိသောသူတို့အား ဤသူသည်နာဇရက်မြို့သားယေဇူးနှင့်အတူရှိခဲ့ပါသည်ဟုဆိုလျှင်၊သူက ထိုသူကိုအကျွန်ုပ်မသိပါဟုကျိန်ဆို၍တစ်ဖန်ငြင်းဆိုပြန်၏။အချိန်အနည်းငယ်ကြာပြီးနောက် အနီးတွင်ရပ်နေသောသူများသည် ပေတရုထံသို့လာကြ၍အမှန်စင်စစ်သင်သည်လည်း ထိုသူတို့တွင်တစ်ဦးအပါအဝင်ဖြစ်၏။အကြောင်းမူကား သင်ပြောဆိုသော စကားသံကပင် သိသာထင်ရှားစေသည်ဟုဆိုကြ၏။ထိုအခါ သူကထိုသူကို အကျွန်ုပ်မသိဟု မိမိကိုယ်ကိုကျိန်တွယ်ပြောဆိုလေ၏။ထိုခဏချင်းတွင်ပင်ကြက်တွန်လေ၏။ဤတွင် ပေတရုသည်ကြက်မတွန်မီ သင်သည်ငါ့အားသုံးကြိမ်တိုင်တိုင်ငြင်းပယ်လိမ့်မည်ဟုယေဇူးမိန့်တော်မူသောစကားကို အောက်မေ့သတိရသဖြင့်အပြင်သို့ထွက်၍သည်းထန်စွာငိုကြွေးလေ၏။နံနက်အချိန်ရောက်သော်ရဟန်းအကြီးအကဲတို့နှင့်သက်ကြီးဝါကြီးအားလုံးတို့သည်ယေဇူးကို သေဒဏ်စီရင်ခြင်းငှါဆွေး‌နွေးတိုင်ပင်ကြ၏။ထို့နောက် သူတို့သည်ကိုယ်တော့်ကိုချည်နှောင်လျက် ခေါ်ဆောင်သွားကြပြီးလျှင်ဘုရားခံပီလာတုမင်း၏လက်သို့အပ်လိုက်ကြ၏။ထိုအခါကိုယ်တော်သည်သေဒဏ်စီရင်ခြင်းခံရသည်ကိုသစ္စာဖောက်သူ ဂျူဒမြင်လျှင်နောင်တရ၍ ‌ငွေဒင်္ဂါးသုံးဆယ်ကိုရဟန်းအကြီးအကဲတို့နှင့်သက်ကြီးဝါကြီးတို့ထံသို့ ပြန်ယူခဲ့ပြီး၊ အကျွန်ုပ်သည် အပြစ်ကင်းသူ၏သွေးအပေါ်သစ္စာဖောက်ခြင်းဖြင့်အပြစ်ပြုမိခဲ့ပြီဟုဆို၏။သူတို့ကလည်း၊အကျွန်ုပ်တို့နှင့်အဘယ်သို့ဆိုင်သနည်း။သင်၏အမှုကိစ္စကို သင်ဖြေရှင်းလော့ဟုဆိုကြ၏။ထိုအခါသူသည် ဗိမာန်တော်အတွင်း၌ထိုငွေများကိုပစ်ချခဲ့ပြီး ထွက်ခွာသွား၏။ထို့နောက် သူသည်သွား၍ မိမိကိုယ်ကိုဆွဲကြိုးချသေလေ၏။ရဟန်းအကြီးအကဲတို့မူကား ထိုငွေကိုကောက်ယူ၍ ‌ပြောကြသည်မှာ၊ဤငွေကိုဘဏ္ဍာတော်တိုက်၌မထည့်အပ်။အကြောင်းမူကား ယင်းသည်သွေး၏တန်ဖိုးငွေဖြစ်သည်ဟုဆိုကြ၏။ထို့ကြောင့် သူတို့သည်တိုင်ပင်ကြပြီးမှသူစိမ်းဧည့်သည်တို့အားသင်္ဂြိုဟ်ခြင်းငှါအိုးထိန်းသည်၏မြေတစ်ကွက်ကိုထိုငွေဖြင့်ဝယ်ကြ၏။ ထို့ကြောင့် ထိုမြေကွက်ကိုယနေ့တိုင်အောင်သွေးဖြင့်ရင်းရသောမြေဟုခေါ်ဆိုကြ၏။ထိုအခါ ပရောဖက်ဂျေရေမိယ၏ဟောထားချက်သည်ပြည့်စုံခြင်းသို့ရောက်လေ၏။ဟောထားချက်သည်ကားသူတို့သည် ထိုသူ၏တန်ဖိုးအဖြစ် အစ္စရာအဲလ်လူမျိုးတချို့ တန်ဖိုးဖြတ်ထားသောငွေဒင်္ဂါးသုံးဆယ်ကိုယူကြ၍၊ငါ့အား ထာဝရဘုရားသခင် ဗျာဒိတ်ထားတော်မူခဲ့သည့်အတိုင်းအိုးထိန်းသည်၏ မြေကွက်အတွက်ပေးကြလေပြီဟုလာသတည်း။ယေဇူးသည်ဘုရင်ခံ၏ရှေ့မှောက်၌ရပ်နေတော်မူသောအခါဘုရင်ခံက သင်သည်ဂျူးလူမျိုးတို့၏ဘုရင်ဖြစ်သလောဟုမေးလျှင်ယေဇူးကသင်ဆိုလေပြီဟုသူ့အားမိန့်တော်မူ၏။သို့သော် ရဟန်းအကြီးအကဲနှင့် သက်ကြီးဝါကြီးတို့သည်ကိုယ်တော်အားစွပ်စွဲပြောဆိုကြသောအခါကိုယ်တော်သည် မည်သို့မျှပြန်ဖြေတော်မမူ။ထိုအခါ ပီလာတုမင်းက၊သင့်အပေါ်စွပ်စွဲထားသော ထွက်ဆိုချက်မည်မျှများပြားသည်ကိုသင်မကြားသလောဟု မေးလေ၏။သို့သော် ကိုယ်တော်သည် စွပ်စွဲချက်တစ်ခုကိုမျှပြန်လည်ဖြေကြားခြင်းမပြုသောကြောင့် ဘုရင်ခံသည်အလွန်အံ့သြလေ၏။ဘုရင်ခံသည် ပွဲတော်အချိန်အခါတွင် လူအများတောင်းဆိုသည့်အကျဉ်းသားတစ်ဦးကို လွှတ်မြဲထုံးစံရှိ၏။ထိုအချိန်တွင်ဆိုးသွမ်းခြင်း၌ကျော်ကြားသော ဘာရဘဟုအမည်တွင်သည့် အကျဉ်းသားတစ်‌ယောက်ရှိ၏။လူအများစုရုံးလာကြ‌သောအခါ ပီလာတုမင်းကသင်တို့အဖို့မည်သူကို ငါလွှတ် ပေးရန်သင်တို့အလိုရှိကြသနည်း။ဘာရဘကိုလော၊ခရစ်တော်ဟုခေါ်သောယေဇူးကိုလောဟုသူတို့အားမေးလေ၏။အကြောင်းမူကား သူတို့သည်မနာလိုသောစိတ်ဖြင့်ကိုယ်တော့်ကို အပ်နှံခဲ့ကြ‌ကြောင်းသူသိ၏။ထိုအပြင် သူသည်တရားပုလ္လင်တွင်ထိုင်နေစဉ် သူ၏ဇနီးက သတင်းပို့သည်မှာထိုဖြောင့်မတ်သောသူ၏အမှု၌မည်သို့မျှမပတ်သက်ပါနှင့်။အဘယ်ကြောင့်ဆိုသော် ယနေ့ကျွန်မသည် ထိုသူကြောင့်အိမ်မက်တွင် စိတ်ဒုက္ခများစွာခံစားခဲ့ရပြီဟုမှာကြားထားလေ၏။ရဟန်းအကြီးအကဲတို့နှင့်သက်ကြီးဝါကြီးတို့ကမူဘာရဘကိုလွှတ်၍ယေဇူးကိုသတ်စေမည့် အကြောင်းတောင်းဆိုရန်လူအစုအဝေးကိုသွေးဆောင်စည်းရုံးကြ၏။ဘုရင်ခံကသူတို့အား ဤသူနှစ်ယောက်တို့တွင်မည်သူ့ကိုသင်တို့အဖို့လွှတ်စေလိုကြသနည်းဟုမေးသောအခါသူတို့က ဘာရဘဟုဆိုကြ၏။ပီလာတုမင်းကလည်း သို့ဖြစ်လျှင်ခရစ်တော်ဟုခေါ်သောယေဇူးကို ငါမည်သို့ပြုရမည်နည်းဟု သူတို့အားမေးသော်သူတို့အားလုံးကသူ့တို့လက်ဝါးကပ်တိုင်တင်၍သတ်ပါဟုဆိုကြ၏။ထိုအခါ ဘုရင်ခံက အဘယ် ကြောင့်နည်း။သူသည် မည်သည့်မကောင်းမှုကိုပြုခဲ့မိသနည်းဟုမေးလေ၏။သို့သော် သူတို့ကသူ့ကိုလက်ဝါးကပ်တိုင်တင်၍သတ်ပါဟုပိုမိုကျယ်လောင်စွာအော်ဟစ်ကြ၏။ပီလာတုမင်းသည်ကား မိမိ၏စကား အကျိုးသက်ရောက်မှုမရှိသည်သာမကစတင်၍ ရုန်းရင်းဆန်ခတ်ဖြစ်လာသည်ကိုပင်မြင်သောအခါရေကိုယူ၍လူအများရှေ့တွင်မိမိ၏လက်များကိုဆေးလျှက် ဤ‌‌ဖြောင့်မတ်သောသူ၏သွေးနှင့်အကျွန်ုပ်ကင်းရှင်း၏။သင်တို့၏အမှုကိစ္စကိုသင်တို့သာလျှင်လုပ်ဆောင်ကြလော့ဟုဆို၏။ လူအပေါင်းတို့ကလည်း၊သူ၏သွေးသည် အကျွန်ုပ်တို့နှင့်အကျွန်ုပ်တို့၏သားသမီးများအပေါ်ကျရောက်ပါစေဟုပြန်‌ပြောကြ၏။ထို့နောက်သူသည်သူတို့အတွက်ဘာရဘကိုလွှတ်ပေး၍ယေဇူးကိုမူကားကျိန်နှင့်ရိုက်စေပြီးမှလက်ဝါးကပ်တိုင်တင်စေခြင်းငှါ အပ်လိုက်လေ၏။ထိုအခါဘုရင်ခံ၏စစ်သူရဲများသည် ယေဇူးကိုဘုရင်ခံ၏ အိမ်တော်အတွင်းသို့ခေါ်ဆောင်သွားကြလျှက်၊စစ်သူရဲတစ်တပ်လုံးကိုလည်းအထံတော်၌ စုရုံးစေကြ၏။ထို့နောက် သူတို့သည်ကိုယ်တော်၏အဝတ်များကိုချွတ်၍ကိုယ်တော့်အပေါ်၌နီသောဝတ်ရုံကိုခြုံပေးကြ၏။သူတို့သည် ဆူးခက်နှင့်ခွေထားသောဦးရစ်ကိုလည်းပြုလုပ်ကြ၏။၎င်းကို ကိုယ်တော်၏ ဦးခေါင်းတော်ပေါ်၌တင်ကြကာ၊ ကျူရိုးတစ်ချောင်းကိုလည်းကိုယ်တော်၏လက်ယာတော်၌ ကိုင်စေပြီးလျှင်၊ရှေ့တော်၌ဒူးထောက်ကြလျှက်၊ဂျူးလူမျိုးတို့၏ဘုရင်အားမင်္ဂလာရှိစေသတည်းဟု ပြက်ရယ်ပြုကြ၏။ထို့နောက် သူတို့သည်ကိုယ်တော်ကို တံတွေးနှင့်ထွေးကြ၍ကျူရိုးကိုယူပြီးလျှင်ဦးခေါင်းတော်ကို ရိုက်ကြ၏။သူတို့သည်ကိုယ်တော်ကိုထိုသို့ပြက်ရယ်ပြကြပြီးနောက်၊နီသောဝတ်ရုံကိုချွတ်၍ကိုယ်တော်၏အဝတ်များကိုပြန်ဝတ်စေပြီးလျှင်ကိုယ်တော်ကိုလက်ဝါးကပ်တိုင်တင်ခြင်းငှါခေါ်ဆောင်သွားကြ၏။သူတို့ သည်ရုံးတော်မှထွက်ခွာလာကြစဥ်စီမွန်အမည်ရှိသောဆီရီနေမြို့သားတစ်ဦးကိုတွေ့ကြသောအခါ ထိုသူ့ကိုအနိုင်အထက်ပြု၍ကိုယ်တော်၏လက်ဝါးကပ်တိုင်ကို ထမ်းစေကြ၏။ထို့နောက် ဦးခေါင်းခွံအရပ်ဟုအဓိပ္ပာယ်ရသောဂေါလ်‌ဂေါသအရပ်သို့ ရောက်ကြသောအခါ၊သူတို့သည်ကိုယ်တော်အားသည်းခြေနှင့်ရောသောစပျစ်ရည်ကိုသောက်ရန်ပေးကြ၏။သို့သော် ကိုယ်တော့်ကိုလက်ဝါးကပ်တိုင်တင်ပြီးသောအခါကိုယ်တော်၏အဝတ်များကိုမိမိတို့အချင်းချင်းမဲချ၍ခွဲဝေယူကြ၏။ ထို့နောက်သူတို့သည်ထိုင်၍ကိုယ်တော့်ကိုထိုအရပ်မှစောင့်ကြည့်နေကြလေ၏။ကိုယ်တော်၏ဦးခေါင်းတော်အပေါ်၌လည်းဤသူသည်ကားဂျူးလူမျိုးတို့၏ဘုရင်ယေဇူးဖြစ်သတည်းဟူသောကိုယ်တော့်အပေါ်စွဲချက်တင်ထားသည့်စာတမ်းကိုတပ်ထားကြ၏။ထိုအချိန်၌ဓားပြနှစ်ယောက်တို့သည်ကိုယ်တော်နှင့်အတူ လက်ယာဘက်၌ တစ်‌ယောက်၊လက်ဝဲဘက်၌တစ်ယောက် လက်ဝါးကပ်တိုင်တင်ခြင်းခံကြရ၏။လမ်းသွားလမ်းလာတို့သည်လည်းမိမိတို့ ဦးခေါင်းများကိုယမ်းကြလျက်လှောင်ပြောင်ကာ၊ဗိမာန်တော်ကို ဖြိုဖျက်၍သုံးရက်အတွင်းတည်ဆောက်မည့်သူ သင်ကိုယ်သင်ကယ်တင်ပါလော့။သင်သည် ဘုရားသခင်၏သားတော်ဖြစ်လျှင်လက်ဝါးကပ်တိုင်မှ ဆင်းလာပါလော့ဟုဆိုကြ၏။ထိုနည်းတူပင် ရဟန်းအကြီးအကဲတို့လျက်၊ဤသူသည် တခြားသောသူတို့ကိုကယ်တင်ခဲ့၏။မိမိကိုယ်ကိုမူကား မကယ်တင်နိုင်။သူသည် အစ္စရာအဲလ်လူမျိုး၏ဘုရင်ဖြစ်လျှင်လက်ဝါးကပ်တိုင်ပေါ်မှယခုဆင်းလာပါစေ။ထိုအခါ အကျွန်ုပ်တို့သည်သူ့ကိုယုံကြည်ပါတော့မည်။သူသည်ဘုရားသခင်ကို ယုံကြည်အားထားသောသူဖြစ်၏။ဘုရားသခင်သည်သူ့ကို အလိုတော်ရှိတော်မူလျှင်ယခုပင်သူ့ကို ကယ်တင်တော်မူပါစေ။အကြောင်းမူကား သူကငါသည် ဘုရား သခင်၏သားတော်ဖြစ်၏ဟုဆိုခဲ့သည်ဟူ၍ပြောဆိုကြလေ၏။ကိုယ်တော်နှင့်အတူ လက်ဝါးကပ်တိုင်တင်ခံကြရသောဓားပြတို့သည်လည်းကိုယ်‌တော့်ကို ထိုနည်းတူ ပုတ်ခတ်ပြောဆို ကြ၏။မွန်းတည့်ချိန်မှစ၍ မွန်းလွဲသုံးနာရီအချိန်တိုင်အောင်မြေတစ်ပြင်လုံး၌ မှောင်မိုက်အတိကျရောက်လေ၏။သုံးနာရီအချိန်ခန့်တွင်ယေဇူးသည် ကျယ်လောင်သောအသံနှင့်၊ဧလိ၊ဧလိ၊လာမားဆဘတ္တနီဟုဟစ်အော်တော်မူ၏။အဓိပ္ပာယ်ကား အကျွန်ုပ်၏ဘုရား၊အကျွန်ုပ်၏ဘုရား၊အဘယ်ကြောင့်အကျွန်ုပ်တို့ စွန့်ပစ်ထား‌‌တော်မူပါသနည်းဟု ဆိုလိုသတည်း။ထိုနေရာ၌ ရပ်နေသူအချို့တို့သည်ထိုစကားကိုကြားကြလျှင်၊ဤသူသည်ဧလိယကိုခေါ်နေသည်ဟုဆိုကြ၏။ထိုသူတို့ တွင်တစ်ယောက်သည်ချက်ချင်းပြေးကာရေမြှုပ်တစ်ခုကိုယူ၍ပုန်းရည်ဖြင့်ပြည့်စေပြီးလျှင်၊၎င်းကိုကျူရိုးတွင်တပ်လျက်ကိုယ်တော်အားသောက်စေခြင်းငှါပေးလေ၏။ သို့‌သော် အခြားသောသူတို့က၊ခေတ္တစောင့်ပါဦး၊သူ့အားကယ်တင်ရန်ဧလိယလာ၊မလာကိုကြည့်ကြစို့ဟုဆိုကြ၏။ယေဇူးမူကားကျယ်သောအသံဖြင့်တစ်ဖန်ဟစ်အော်တော်မူ၍ အသက်တော်ကိုစွန့်လိုက်တော်မူ၏။ထိုအချိန်တွင် ဗိမာန်တော်၏ကန့်လန့်ကာသည်အထက်စွန်းမှအောက်စွန်းတိုင်အောင်စုတ်၍နှစ်ခြမ်းကွဲသွားလေ၏။ မြေငလျင်ကြီးစွာလှုပ်၍ ကျောက်ဆောင်များလည်း ကွဲအက်လေ၏။ သင်္ချိုင်း ဂူများသည်လည်း ပွင့်သဖြင့် သေလွန်ပြီးသော သူတော်ကောင်းတို့၏ ခန္ဓာကိုယ်များသည် ပြန်ရှင်ကြ၏။ထိုသူတို့သည် ကိုယ်တော်ရှင်ပြန်ထမြောက်တော်မူပြီးသည့်နောက်တွင်သင်္ချိုင်းဂူများမှထွက်လာကြ၍သန့်ရှင်းသောမြို့တွင်းသို့ဝင်‌ရောက်ကြကာ၊လူများစွာတို့အားထင်ရှားပြကြလေ၏။ယေဇူးကိုစောင့်ကြည့်လျက်ရှိကြသောလူတစ်ရာတပ်မှူးနှင့်သူနှင့်အတူရှိသော သူတို့သည်ငလျင်လှုပ်ခြင်းနှင့်ဖြစ်ပျက်သမျှအခြင်းအရာတို့ကိုတွေ့မြင်ကြရသောအခါလွန်စွာထိတ်လန့်အံ့သြကြ၍၊ဤသူသည် ဘုရားသခင်၏သားတော်ဧကန်အမှန်ဖြစ်ပေသည်ဟုဆိုကြ၏။ယေဇူး၏ နောက်တော်သို့ဂါလေလေးယနယ်မှလိုက်၍အလုပ်အကျွေးပြုနေကြသည့်အမျိုးသမီးများစွာသည်ထိုနေရာတွင်ရှိနေကြပြီးခပ်လှမ်းလှမ်းမှကြည့်ရှုနေကြ၏။ထိုသူတို့ထဲတွင်မာရိယာမာဒလေးနာ၊ယာကုပ်နှင့်ဂျိုးဇက်တို့၏အမိဖြစ်သောမာရိယာနှင့်ဇေဘေဒေးဦး၏သားတို့၏မိခင်သည်လည်းပါရှိလေ၏။ညနေအချိန်ရောက်လျှင်ယေဇူး၏တပည့်တစ်ဦးဖြစ်သည့်အာရီမာတေးယမြို့သားဂျိုးဇက်အမည်ရှိသော ချမ်းသာကြွယ်ဝသူတစ်ဦးရောက်လာလေ၏။သူသည် ပီလာတုမင်းထံသို့သွားပြီးလျှင် ယေဇူး၏အလောင်းတော်ကိုတောင်းလေ၏။ထိုအခါ ပီလာတုမင်းကအလောင်းတော်ကိုသူ့အားပေးရန်အမိန့်ချလိုက်လေ၏။ဂျိုးဇက်သည်လည်းအလောင်းတော်ကို ယူဆောင်၍ဖြူစင်သောပိတ်အဝတ်ဖြင့်ပတ်ရစ်ပြီး၊ကျောက်ဆောင်တွင်ထွင်းထားသောမိမိပိုင်ဆိုင်သည့်သင်္ချိုင်းဂူအသစ်၌ကိုယ်တော်၏အလောင်းတော်ကိုသွင်းထားလေ၏။ထို့နောက် သူသည်သင်္ချိုင်းတွင်းအဝ၌ကြီးမားသောကျောက်တုံးတစ်တုံးကိုလှိမ့်၍ပိတ်ထားခဲ့ပြီးမှထွက်ခွာသွားလေ၏။မာရိယာမာဒလေးနာနှင့်အခြားသော မာရိယာတို့သည်သင်္ချိုင်းတော်ကိုမျက်နှာမူလျက် ထိုနေရာ၌ထိုင်နေကြလေ၏။ပွဲတော်အတွက်ပြင်ဆင်ရသောနေ့လွန်ပြီးနောက်တစ်ရက်တွင်ရဟန်းအကြီးအကဲတို့နှင့်ဖာရီဇေးဦးတို့သည်ပီလာတုမင်းရှေ့တွင်စုရုံးကြလျက်၊အရှင်မင်းကြီးထိုလှည့်ဖြားတတ်သောသူအသက်ရှင်စဉ်ကငါသည်သုံးရက်‌မြောက်သောနေ့၌တစ်ဖန်ထမြောက်လိမ့်မည်ဟုဆိုခဲ့ဖူးသည်ကိုအကျွန်ုပ်တို့မှတ်မိပါသည်။ထို့ကြောင့် သူ၏တပည့်တို့သည်သွားကြ၍သူ၏အလောင်းကိုခိုးယူကြပြီး၊သူသည်သေခြင်းမှရှင်ပြန်ထမြောက်လေပြီဟုလူတို့အားပြောဆိုကပါလျှင်၊ယခင်လှည့်ဖြားခြင်းထက်နောက်လှည့်ဖြားခြင်းကပို၍ကြီးမည်ကိုစိုးရိမ်ရပါသည်။သို့ဖြစ်၍သင်္ချိုင်းဂူကိုသုံးရက်မြောက်သောနေ့တိုင်‌အောင်လုံခြုံစွာစောင့်ကြပ်ပေးစေရန်အမိန့်ပေးတော်မူပါဟုလျှောက်ကြလေ၏။ပီလာတုမင်းက၊သင်တို့၌အစောင့်တပ်ရှိ၏။သွား၍သင်တို့တတ် နိုင်သမျှလုံခြုံအောင်စောင့်ကြပ်ကြလော့ဟုသူတို့အားဆိုလေ၏။ထို့ကြောင့် သူတို့သည်လည်းသွားကြ၍ကျောက်တုံးကိုတံဆိပ်ခတ်နှိပ်ကာအစောင့်များချထားကျလျက်သင်္ချိုင်းဂူကိုလုံခြုံအောင်စောင့်ကြပ်စေကြ၏။

ထောက်ရှုချက်-သခင်ယေဇူးသည်ဘုရား၏ ချစ်ခြင်းမေတ္တာဖြင့်ကိုယ်‌တော်ကိုယုံကြည်သူများကိုကုသခဲ့သည်။သခင်ယေဇူးသည်အမှန်တရားဖြစ်သည်။လမ်းခရီးဖြစ်သည်။အသက်လည်းဖြစ်သည်။အမှန်တရားကို ဟော‌ပြောသောကြောင့်ဂျူးလူမျိုးတို့၏ခေါင်း‌ဆောင်ကိုစော်ကားသလိုဖြစ်သွားသည်။သို့ပါ၍ယေဇူးကိုသတ်ရန်အထိအပြစ်ရှာကြသည်။သခင်ယေဇူးသည်မိမိ၏အသက်ကိုစွန့်သည့်တိုင်အောင်လူသားများကိုချစ်တော်မူ၏။သခင်ယေဇူးကိုယ်တော်တိုင်သည် ချစ်ခြင်းမေတ္တာဖြစ်တော်မူ၏။ကျွန်ုပ်တို့သခင်ယေဇူးကို ချစ်ပါသလား။