 for web4.jpg)
 for web3a.jpg)
2023-04-15 06:39:47
ကရုဏာရှင်ယေဇူးပွဲနေ့ (၂၀၂၃) တိုလီမုတ်စဩဝါဒ (ယော ၂၀:၁၉-၃၁)
Reflection by Rev. Fr. Bernardino Ne Ne
Posted by Sr. BVenedetta Myat Hnin Nwe(ISR)
ကရုဏာ(Mercy)’ဆိုတဲ့ ဝေါဟာရကို လာတင်ဘာသာစကားအရ စကားလုံးနှစ်လုံးပေါင်းစပ်ထားတဲ့“Misericordia”လို့ သုံးနူန်းထားပါတယ်။“Misereri’ ဆိုတာကသနားကြင်နာခြင်း၊စာနာရိုင်းပင်းခြင်းလို့အဓိပ္ပါယ်သက်ရောက်ပြီး‘Cor’ဆိုတဲ့ ဝေါဟာရကတော့ ‘နှလုံးသား’လို့ အနက်ဖွင့်ဆိုနိုင်ပါတယ်။ဆိုတော့က‘ကရုဏာ-Mercy’ ဆိုတဲ့စကားလုံးမှာ တစ်ပါးသူအပေါ် နှလုံးအကြွင်းမဲ့ စာနာရိုင်းပင်းခြင်းလို့ နားလည်သဘောက်ပေါက်နိုင်ပါတယ်။ ဂရိဘာသာစကားအရကတော့ သနားကရုဏာကို ‘Eleison’ ရယ်လို့ သုံးနူန်းကြတယ်။ဟေဗြဲဘာသာစကားမှာ သနားကရုဏာနဲ့နီးစပ်တဲ့စကားက ‘Hesed’ ဖြစ်ပြီး ‘ခိုင်မြဲသောမေတ္တာ’လို့ အနက်ဖွင့်နိုင်ပါတယ်။ဘာသာစကားတွေပေါင်းစပ်လိုက်ရင်တော့“ဘုရားသခင်၊အကျွန်ုပ်ကို သနားတော်မူပါ (Have mercy on me, God)”လို့ဆိုလိုက်တဲ့ဘုရားသခင်ထံအသနားခံခြင်းဟာ တစ်နည်းအားဖြင့်“အကျွန်ုပ်ကိုစာနာရိုင်းပင်းတော်မူပါဘုရား၊ကိုယ်တော့်ရဲ့ ခိုင်မြဲသောမေတ္တာဖြင့်အကျွန်ုပ်ကိုထိန်းသိမ်းစောင့်ရှောက်ပေးတောမူပါဘုရား ”လို့ တောင်းလျောက်အသနားခံခြင်းပင်ဖြစ်ပါတယ်။ကျမ်းစာတော်မြတ်ထဲမှာဘုရားသခင်ထံတောင်းလျောက်အသနားခံကြတဲ့ပုဂ္ဂိလ်များကိုအများအပြားတွေ့ရှိရပါတယ်။ဂျေရီခိုမြို့အထွက်မှာယေဇူးဘုရားရှင်ကိုမျက်မမြင်ဘာတီမေဦးက“ဒါဝိတ်ရဲ့သားတော်ယေဇူး၊အကျွန်ုပ်ကိုသနားတော်မူပါ”(မာကု ၁၀:၄၆-၅၂)လို့ ဟစ်အော်အသနားခံခဲ့တယ်။ဘာတီမေဦးဟာ မျက်စိပြန်မြင်ရသောအခွင့်ကို ခံစားရရှိခဲ့လေတယ်။ကာနန်အမျိုးသမီးတစ်ဦးက ယေဇူးကိုယ်တော်ကို“အိုသခင်၊ ဒါဝိတ်၏သားတော်၊ ကျွန်မကိုသနားတော်မူပါ၊ကျွန်မသမီးသည် နတ်ဆိုးညှင်းဆဲခြင်းကို ပြင်းထန်စွာ ခံနေရပါသည်”(မာတေး ၁၅:၂၁-၂၈)လို့ ဟစ်အော်လျှောက်ထားပြီးသူမရဲ့ကြီးမားတဲ့ယုံကြည်ခြင်းကြောင့် သူမရဲ့သမီးဟာရောဂါပျောက်ကင်းခြင်းသို့ရောက်ရှိခဲ့ပါတယ်။ ရွာတစ်ရွာသို့ ကြွဝင်တော်မူချိန်မှာအနာကြီးရောဂါသည်ဆယ်ဦးတို့ကအဝေးကရပ်နေကြပြီး“ဆရာသခင်ယေဇူး၊အကျွန်ုပ်တို့ကို သနားတော်မူပါ”(လု ၁၇:၁၁-၁၉)လို့ ကျယ်သောအသံနဲ့ဟစ်အော်တောင်းလျှောက်ခဲ့ကြတယ်။သူတို့အားလုံးမိမိတို့ကိုယ်ကိုရဟန်းတို့အားပြသဖို့ သွားကြတဲ့လမ်းခရီးမှာ စင်ကြယ်ခြင်းကို ရရှိခံစားခဲ့ကြတယ်။ ဗိမာန်တော်မှာ သွားရောက်ဆုတောင်းကြတဲ့ ဖာရီဇေးဦးနဲ့ အခွန်သူတို့ရဲ့ပုံဥပမာ(လု ၁၈:၉-၁၇)ထဲမှာအခွန်ခံသူဟာအဝေးမှာရပ်ပြီး အပေါ်ကိုမော်မကြည့်ဝံ့ဘဲ မိမိရင်ဘတ်ကိုပုတ်ရင်း “အိုဘုရားသခင်၊ အပြစ်ရှိသူ အကျွန်ုပ်ကို သနားတော်မူပါ”လို့သာ ဆုတောင်းခဲ့တယ်။သူဟာဖြောင့်မတ်သန့်ရှင်ခြင်းကို ပို၍ခံစားရလျက်အိမ်ကို ပြန်သွားနိုင်ခဲ့တယ်။ ညီအစ်ကိုမောင်နှမအပေါင်းတို့၊ ကျွန်ုပ်တို့လည်း ဘုရားသခင်ထံပါး နိမ့်ချစိတ်နဲ့တိုးဝင်ချည်းကပ်ပြီးကိုယ်တော်ရဲ့ကရုဏာတော်ကို ခံစားရရှိကြဖို့အသနားခံကြပါစို့။ ဆာလံကျမ်းပြုဆရာနဲ့အတူ“ထာဝရဘုရားသခင်သည် ကောင်းမြတ်တော်မူသောကြောင့် ကိုယ်တော့်ကိုကျေးဇူးတင်ကြစို့။ ကိုယ်တော်၏ ခိုင်မြဲသောမေတ္တာတော်(ကရုဏာတော်)သည် အစဉ်ထာဝရ တည်တော်မူ၏ (ဆာ ၁၁၈:၁)လို့ ဝန်ခံချီးမွမ်းကြပါစို့။
