အမိကက်သလစ်သာသနာတော်ကြီးသည်ယခင်အပတ်ကယေဇူးသခင်ကောင်းကင်ဘုံသို့ တက်ကြွတော်မူသောပွဲနေ့ကိုကျင်းပခဲ့သည်။ယေဇူးသခင်သည်သေခြင်းမှဘုန်းတော်ဂုဏ်တော်နှင့်ရှင်ပြန်ထမြောက်ပြီးရက်ပေါင်း(၄၀)သူ၏တပည့်တော်ကြီးများ အားမကြာခဏကိုယ်ယောင်ထင်ရှားပြ၍သီတင်းသုံးနေခဲ့သည်။(တမန်တော်၀တ္ထု ၁း၃)ထို့နောက်ကောင်းကင်ဘုံသို့ပြန်လည်တက်ကြွသွားခဲ့သည်။သန့်ရှင်းသောဝိညာဥ်တော်ဘုရားဆင်းသက်သောပွဲနေ့ကိုဂျူးဘာသာ၌'ပင်တေကော့စ်'ပွဲနေ့ဟုခေါ် သည်။'ပင်တေကော့စ်'ဤအနက်ကား'၅၀'ဟုဆိုလိုသည်။အဘယ်ကြောင့်ဆိုသော် ဤပွဲနေ့ကို'ပါစကား'ပွဲတော်ကျင်းပပြီး ရက်ပေါင်း(၅၀)အကြာတွင်ကျင်းပ သည်။ကျင်းပရသည့်အကြောင်းအရင်းမှာကောက်ပဲသီးနှံရိတ်သိမ်းခြင်းကိုအမှတ်ရရန် ဖြစ်သကဲ့သို့အီစ္စရေးလူမျိုးတို့အီဂျစ်နိုင်ငံ၌ကျွန်ခံနေရာမှဘုရားသခင်မိုးဇက်အားစေလွှတ်၍ကယ်နှုတ်စေခဲ့ပြီးဆီနာရီတောင်ခြေအရောက်၌ဘုရားသခင်နှင့်အီစ္စရေးလူမျိုးတို့သည်'ပဋိညာဉ်'ကိုပြုခဲ့ကြသည်။ထိုနေ့ကိုလည်းပြန်လည်အမှတ်ရရန်ဖြစ်သည်။ထိုပဋိညာဉ်အားဖြင့်အီဂျစ်ကျွန်ခံနေခဲ့သောအီစ္စရေးလူမျိုးတို့သည်ဘုရားသခင်ရွှေးကောက်ခြင်းခံရသောဘုရားသခင်၏လူမျိုးတော်အဖြစ်အသစ်တစ်ဖန်မွေးဖွားခဲ့သည်။ထို့အတူဓမ္မာသစ်ကျမ်းစာ၌လည်းသန်းရှင်းသောဝိညာဥ်တော်ဘုရားဆင်းသက်ခြင်းသည်ပဋိညာဉ်သစ်ကိုပြုခြင်းဖြစ်ပြီးထိုသို့ဆင်းသက်ခဲ့ခြင်းကြောင့်သာသနာတော်ကြီးသည်အဘယ်သူ၏ကျွန်မျှမဟုတ်တော့ဘဲဘုရားသခင်၏သားသမီးများအဖြစ်အသစ်တဖန်ပြန်လည်မွေးဖွားခဲ့သည်။ဂျူးတို့၏အရေးကြီးလှသောဘာသာရေးရက်ကြီးအခါကြီး(၃)ပွဲ ဂျူးတို့၏ဘာသာရေး၀တ္တရား၌မိမိတို့ကိုယ်ကိုဘုရားတရားရှိသည်၊ဘာသာရေးကိုင်းရှိုင်းသည်ဟုဆိုလျှင်'ပင်တေကော့စ်'ပွဲနေ့၌ဂျေရူးဆလင်မြို့နှင့်ဗိမာန်တော်သည်ဘုရားဖူးများဖြင့်ကျိတ်ကျိတ်တိုးစည်ကားလေ့ရှိသည်။'ပင်တေကော့စ်'ပွဲကဲ့သို့လူစည်ကားသောပွဲနှစ်ပွဲကျန်သေးသည်။၎င်းတို့မှာ 'ပါစကားပွဲနှင့်တဲတော်ပွဲ' (Tabernacles, Tents or Booths) တို့ဖြစ်ကြသည်။ဤပွဲတော်ကြီး(၃) ပွဲသည်အသက်(၁၂)ပြည့်သောအီစ္စရေးအမျိုးသားများအတွက်ဘာသာရေး၀တ္တရားမဖြည့် ဆည်းဘဲပျက်ကွက်၍မရသောပွဲတော်များဖြစ်သည်။ ထို့ကြောင့်လည်းယေဇူးသခင်သည်ဂျေရုဆလင်မြို့သို့သွားပြီး ဗိမာန်တော်၌ကျန်ခဲ့သည်။(သံလုကာ ၂း၄၁-၄၂၊တရားဟောရာကျမ်း ၁၆း၁၆)ပင်တေကော့စ်ပွဲနေ့၌နေထိုင်ရာဒေသမတူသောဂျူးလူမျိုးများအဆိုပါရက်ကြီးအခါကြီးနေ့၏၀တ္တရားကိုဖြည့်ဆည်းရန်အတွက်ရောက်ရှိနေကြခြင်းဖြစ်သည်။၎င်းတို့သည်ပါသိယလူမျိုး၊မေဒလူမျိုး၊ဧလာမိလူမျိုး၊မေဆိုပိုတမိယ၊ဂျူဒေးယ၊ကပ္ပါဒိုးစိယပြည်၊ပုန္တုပြည်၊အာရှ-ဖရိဂျီယနှင့်ပမ်ဖိလိယပြည်၊ အီဂျစ်ပြည်၊ဆီးရီးနေမြို့လက်အောက်ရှိလစ်ဗျားပြည်မှနယ်ပယ်တို့တွင်နေထိုင်သူများ၊ရောမမြို့မှလာကြသောဂျူးလူမျိုးများနှင့်ဂျူးဘာသာသို့ကူးပြောင်းလာသူများ၊ခရိကျွန်းသူကျွန်းသားများနှင့်အာရေးဘိယပြည်သားများရောက်ရှိနေကြခြင်းဖြစ်သည်။ဂျူးလူမျိုးတို့သည်မိမိတို့၏ဇာတိချက်ကြွေမွေးရပ်မြေဖြစ်သောဘုရားကတိထားသောတိုင်းပြည်၊၎င်းတို့ဘိုးဘေးများရိုးကျခဲ့သောမြေကိုအလွန်စွာသံယောဇဥ်ကြီးကြသည်။သို့သော်အဘယ်ကြောင့်ယခုကဲ့သို့ပါလက်စတိုင်း(ယေဇူးသခင်လောက၌သက်ရှိ ထင်ရှားရှိစဉ်ကာလကိုညွှန်းဆိုသည်။)အပြင်ဖက်အာရှမိုင်းနားဒေသများသို့ပျံ့နှံ့သွားကြရသနည်း။ဂျူးလူမျိုးများပါလက်စတိုင်းဒေသ၏အပြင်ဖက်သို့ရောက်ရှိသွားရခြင်း၏အကြောင်းအရင်းအကြမ်းအားဖြင့်(၃)ချက်ရှိသည်။(၁)နိုင်ငံရေးကြောင့်(စစ်ရှုံး)၊(၂)ရေ ကြည်ရာမျက်နုရာရှာခြင်း၊(၃)ဘာသာရေးပဋိပက္ခကြောင့်ဖြစ်သည်။(၁)နိုင်ငံရေးကြောင့်ဟုဆိုရာ၌ဂျူးလူမျိုးတို့၏သမိုင်း၌လူမျိုးခြားများနှင့်စစ်မခင်းဘဲအေးချမ်းလုံခြုံစွာနေခဲ့ရသည့်အချိန်ဟူ၍ဆောလုဘုရင်အုပ်ချုပ်သောအစောပိုင်းကာလ၊ဒါဝိတ်ဘုရင်နှင့်စောလမှုန်ဘုရင်တို့အုပ်ချုပ်သောနှစ်(၈၀)ကာလ၌သာရှိခဲ့သည်။ကျန်ကာလများ၌မူတောင်ပြည်၊ မြောက်ပြည်ကွဲသွား၍နိုင်ငံရေးအရရန်သူပြိုင်ဘက်များ ဖြစ်သွားကာအချင်းချင်းစစ်တိုက်ခြင်း၊ဘာသာရေးသက်၀င်ယုံကြည်မှုကွဲလွဲသွားခြင်းများ ဖြစ်ပေါ်လာခဲ့သည်။ လူမျိုးကြားဘာသာရေးအရ၊ လူမျိုးရေးအရစည်းလုံးညီညွှတ်မှု မရှိသောကြောင့်သူတစ်ပါး၏ကျွန်တစ်ပေါက်ဘ၀ဖြင့်နေခဲ့ရသည်။စစ်ရှုံးသည့်အခါစစ်နိုင်သောလူမျိုးတို့၏ကျွန်အဖြစ်၎င်းတို့နိုင်ငံသို့ခေါ်ဆောင်သွားခြင်းကိုလည်းခံခဲ့ရရာမှတစ်ကြောင်းပါလက်စတိုင်းအပြင်သို့ ဂျူးလူမျိုးများရောက်ရှိသွားခဲ့သည်။(၂)ရေကြည်ရာမျက်နုရာရှာခြင်းဖြင့်လည်းပါလက်စတိုင်းအပြင်ဘက်သို့ရောက်ရှိသွားခဲ့သည်။ပါလက်စတိုင်းအတွင်း၌လုပ်ကိုင်စားသောက်ရန်မြေဆီမြေနစ်ကောင်းသောနေရာသိပ်မကျယ်ပြောလှ။တောင်ကုန်းတောင်တန်းများသာထူထဲနေခဲ့သည်။ထို့ကြောင့် လုပ်ကိုင်စားသောက်ရန်၊မျိုးဆက်သစ်တို့၏နောင်ရေးကိုတွေးသူများ၊အမြင်ရှိသူများသည် မိမိတို့၏ဇာတိချက်ကြွေမြေကိုစွန့်၍လုပ်ကိုင်စားသောက်ရန်ကောင်းသေ ာနေရာဒေသများသို့ပြောင်းရွေ့သွားရာမှပါလက်စတိုင်း၏ပြင်ပသို့ရောက်ရှိသွားခဲ့ကြသည်။(၃)ဘာသာရေးပဋိပက္ခကြောင့်လည်းဂျူးလူမျိုးတို့သည်ပါလက်စတိုင်းပြင်ပသို့ရောက်ရှိသွားခဲ့ကြသည်။ဤအခြေအနေသည် လက်ဦး၌ဂျူးဘာသာကိုသက်၀င်ယုံကြည်သောသူများနှင့်ရှေ့ဦးခရစ်ယာန်တို့ကြား၌တင်းမာမှုများဖြစ်ရာမှသန္ဓေတည်လာခဲ့ခြင်းဖြစ်သည်။ဆိုလိုသည်မှာဂျူးဘာသာ၀င်တို့သည်ခရစ်ယာန်တရားကို သာသနာဖျက်၊သာသနာပျက်ဟုသတ်မှတ်စော်ကားနှောက်ယှက်ပြီးစောလုကဲ့သို့ကိုယ်ထိလက်ရောက် တိုက်ခိုက်သောတက်ကြွများစွာလည်းပေါ်ထွက်ခဲ့ကြသည်။ (တမန်တော်၀တ္ထု ၈၁-၃၊ ၉း၁-၁၉)လက်ဦးပိုင်း၌ရောမအစိုးရသည်အချင်းချင်းဖြစ်သောဘာသာရေးပဋိပက္ခဖြစ်၍ မကြာမီငြိမ်သွားမည်ဟုထင်မှတ်ခဲ့သော်လည်းထိုသို့ဖြစ်မလာခဲ့။တစ်စတစ်စအရှိန်မြင့်တက်လာသည်။ထို့ကြောင့်ရောမအစိုးရမှဂျူးမှန်သမျှကိုနှိပ်ကွပ်သည့် အဆင့်ထိဖြစ်သွား ရာမှ လွတ်ရာ၊ဝေးရာထွက်ပြေးရင်းပါလက်စတိုင်းအပြင်ဘက်သို့ရောက်ရှိသွားခဲ့ကြသည်။ထိုသို့ပါလက်စတိုင်းအပြင်ဖက်သို့ရောက်ရှိသွားသောဂျူးလူမျိုးတို့သည်အနည်းစုမျှသာမိမိတို့၏မိခင်ဘာသာစကားကိုဆက်လက်ထိန်းသိမ်းနိုင်ကြပြီးအများစုမှာမူမိမိတို့ပတ်၀န်းကျင်ရှိဂရိယဉ်ကျေးမှု၊စာပေတို့၏လွှမ်းမိုးမှုကိုခံခဲ့ကြရသည်။ထို့ကြောင့်သွေးအားဖြင့်ဂျူးဟုဆိုသော်လည်းအာမိုက်စကားကိုမပြောတတ်ကြသူများလာခဲ့သည်။သန့်ရှင်းသောဝိညာဥ်တော်ဆင်းသက်ပြီးနောက်ပေတရုဟောပြောသည်ကို၎င်းတို့သည်မိမိတို့ပြောဆိုသောဘာသာစကားများဖြင့်ကြားရကြသည်။(တမန်တော်၀တ္ထု ၂း၁-၁၃)ဖာသာရ်ကလေးမင်းအိန်ဂျယ်