 for web4.jpg)
 for web3a.jpg)
2023-07-14 07:54:42
15.7.2023 – 14th Week in Ordinary Time, Saturday
ဇူလှိုင် ၁၅ ရက်၂၀၂၃၊ ၁၄ ကြိမ်မြောက်သာမန် စနေနေ့ (A)
သံမာတေဦး ၁၀:၂၄-၃၃
Reflection by Fr. Paul Aung Myint Win O.P
Posted by Sr. Benedetta Myat Hnin Nwe(ISR)
ကိုယ်ခန္ဓာကိုသတ်၍ ဝိညာဉ်ကိုမသတ်နိုင်သော သူတို့အား မကြောက်ကြနှင့်။ဝိညာဉ်နှင့်ကိုယ်ခန္ဓာကိုပါငရဲ၌ ဖျက်ဆီးနိုင်သောသူကိုသာကြောက်ကြလော့။လူ့ဘဝရဲ့အားနည်းချက်တစ်ခုဟာ အကြောက်တရားဖြစ်ပါတယ်။အကြောက်တရားဟာလူတွေရဲ့ဘဝအသက်ရှင်ခြင်းကို တုံ့ဆိုင်းစေသလို မဝံ့မရဲဖြစ်စေပါတယ်။ကိုယ့်ရဲ့ယုံကြည်ရာ၊ယုံကြည်ခြင်း၊ ကိုယ့်ရဲ့အရည်အချင်း၊ ကိုယ်ရဲ့ကြိုးစားမှု၊ကိုယ့်ရဲ့အနာဂတ်အိပ်မက်တွေ၊ကိုယ့်ရဲ့မျှော်လင့်ချက်တွေ၊ကိုယ်ရဲ့ဖြစ်တည်မှုတွေဟာ ဒီအကြောက်တရားကြောင့်သွက်ချာပါဒဖြစ်ရတတ်ပါတယ်။စိန့်သောမတ်စ်အကွိုင်နက်စ်ရဲ့အဆိုအရ ကြောက်တဲ့စိတ်ဟာအနာဂတ်မကောင်းမှုတစ်ခုခု၊ကံကြမ္မာဆိုးတစ်ခုခုကို ကြိုတင်ခံစားမိလို့လို့ဆိုပါတယ်။အပြင်အကြောင်းတရားတွေကြောင့် အကြောက်တရားဖြစ်ပေါ်ရသလို အတွင်းစိတ်ခံစားချက်တွေကြောင့်လည်း အကြောက်တရား ဖြစ်ပေါ်တတ်ပါတယ်။ ခရစ်တော်ဘုရားရှင်ကတော့ သူ့ရဲ့တပည့်တော်ကြီးတွေကို သာသနာပြုဖို့၊ဧဝံဂေလိသတင်းကောင်းကို ဟောပြောဖို့ စေလွှတ်တဲ့အခါမှာ သူတို့အတွက် ကြောက်ရမယ့်အကြောင်းတရား၊ အတွင်းကော အပြင်ကော မရှိဘူးလို့ဆိုပါတယ်။ ဘာကြောင့်လဲဆိုတော့ အဲဒီအကြောက်တရားတွေထက် အနှိုင်းအဆမဲ့ ကြီးမြတ်တဲ့ ဘုရားရှင်ဟာ သူတို့ရဲ့အမာခံတစ်ဆူတည်းသော ဆရာဖြစ်ပြီး အထူးဂရုစိုက်ပေးတဲ့အတွက်ကြောင့်ဖြစ်ပါတယ်။ဘယ်လောက်ထိ ဂရုစိုက်လည်းဆိုတော့ ဦးခေါင်းမှာရှိတဲ့ဆံပင်တို့ ကိုပင်ရေတွက် ထားပါတယ်တဲ့။ဒီလောက အသက်ရှင်တဲ့အခါ ဘုရားသခင်နဲ့အတူလျှောက်လှမ်းရှင်သန်တဲ့အခါ၊ဘုရားပေးတရားတွေနဲ့ မှန်မှန်ကန်ကန် အသက်ရှင်ကြတဲ့အခါ၊ ရိုးရိုးသားသားလျှောက်လှမ်းတဲ့အခါ ကျွန်ုပ်တို့ ကြောက်ရမယ့် အကြောင်းတရားဆို မရှိတော့ပါဘူး။ဖုံးကွယ်ထားတဲ့အရာဆိုတာလည်း ပွင့်လင်းလာရစမြဲ။ ဆိတ်ကွယ်ရာမှာပြုမှုဆောင်ရွက်သမျှဟာလည်း ပြန်ပေါ်လာရစမြဲပါ။ ဒါ့ကြောင့် ခရစ်တော်ဘုရားရှင်က"ကိုယ်ခန္ဓာကိုသတ်၍ ဝိညာဉ်ကို မသတ်နိုင်သောသူတို့အား မကြောက်ကြနှင့်။ဝိညာဉ်နှင့်ကိုယ်ခန္ဓာကိုပါငရဲ၌ ဖျက်ဆီးနိုင်သောသူကိုသာကြောက်ကြလော့။"လို့ဆုံးမထားပါတယ်။သင့်ဘဝမှာ ဘယ်အရာတွေကိုသင်ကြောက်နေပါသလဲ။ ခန္တာကိုယ်ကို ထိခိုက်စေမယ့်အရာတွေကိုကြောက်နေမိသလား။ စိတ်ဝိညာဉ်ကို ထိခိုက်စေမယ့်အရာတွေကို ကြောက်နေမိလား။ ခန္တာ၊ စိတ်ဝိညာဉ်နှစ်မျိုးလုံးကို ထိခိုက်စေမယ့်အရာတွေ ကြောက်နေမိလား။ အကြောက်တရားတွေထက်အနှိုင်းဆမဲ့ ပိုမိုကြီးမြတ်တဲ့ ဘုရားရှင်ဟာသင့်ကိုဂရုစိုက်တယ်ဆိုတာသင်သတိထားမိရဲ့လား။
