 for web4.jpg)
 for web3a.jpg)
2023-07-15 06:47:22
16.7.2023 – 15th Sunday in Ordinary Time.
(၁၅) ကြီမ်မြောက် သာမန်တနင်္ဂနွေနေ့ (A)
သီးနှံများ ဝေဝေဆာသီးပွင့်နိုင်စေဖို့ဘုရားရှင်ရဲ့ကျေးဇူးတော်မိုးရွာသွန်းခြင်းကို ခံယူသိမ်းဆည်းနိုင်တဲ့စိုက်ခင်း(ယာ)မြေဆိုတာက ခြုံရှင်းပေါင်းသင်၊ထယ်ထိုးထွန်ယက်ထားတဲ့မြေသာ ဖြစ်ပါတယ်။လူ၊တိရိစ္ဆာန်တို့ဖြတ်သွားရာကျစ်လစ်သိပ်သည်းနေတဲ့လမ်း၊မာကြောနေတဲ့ ကျောက်ပေါများရာနေရာ၊ ခြုံနွယ်ထူထပ်မင်းမူရာအရပ်ပမာ မာနကြီးလွန်းသူ၊အထက်စီးဆန်တတ်သူဖြစ်နေခဲ့ရင်ကျေးဇူတော်မိုးရေကို ပြည့်ဝခံယူဖို့မလွယ်ကူနိုင်တော့ဘူးပေါ့။ သင့်ရဲ့တာဝန်က ခြောက်သွေ့နေတဲ့ရာသီမှာတောင်အသင့်ပြင်ဆင်ထားသောမြေအမျိုးအစားဖြစ်နေပါမှ မိုးရွာသွန်းပေးလိုက်တဲ့အချိန်မှာ ခံယူသိမ်းဆည်းနိုင်ပြီး မျိုးစေ့လေးများကိုအပင်လေးတွေ ပေါက်ပြီးရှင်သန်စေနိုင်ပါလိမ့်မယ်။ကြေမွကွဲအက်အောင် ထယ်ထိုးထွန်ယက်ခြင်းဆိုတာကသင့်ရဲ့အတွင်းပိုင်းကုစားခြင်းတစ်မျိုးပါပဲ။အဓိပ္ပါယ်ကတော့ သင့်ရဲ့ဒေါသစိတ်၊ခံပြင်းစိတ်၊နာကြဉ်းစိတ်၊မာနစိတ်၊ကြောက်ရွံ့စိတ်နဲ့ လိပ်ပြာမလုံသောစိတ်များကို မြှုပ်နှံလိုက်ခြင်း၊ညက်ညက်ကျေအောင် ချိုးဖဲ့ဖျက်ဆီးလိုက်ခြင်းသဘောပါပဲ။ယင်းအဖျက်စိတ်သဘောထားများကို ခွင့်လွတ်ခြင်းထယ်သွားနဲ့ ထွန်ယက်လိုက်ခြင်း၊ချစ်မေတ္တာများနဲ့ ကရုဏာသနားခြင်းများထွန်သွားများနဲ့ ကြေညက်ချေဖျက်လိုက်ခြင်းလို့ပုံခိုင်းနှိုင်းကြည့်နိုင်ပါတယ်။မြေကြီးက ဘယ်တော်မှ ခုခံတုန့်ပြန်လေ့မရှိဘူး။နေရောင်ခြည်ကို ခံယူတတ်သလို မိုးရေကိုလည်း စုပ်ယူတတ်ပြီး ပုံသွင်းပြုပြင်(ကုစား)ပေးတဲ့အတိုင်းလိုက်လျောနာခံတတ်ပါတယ်။ ထိုနည်းအတူ သင်လည်း ဘုရားရှင်ရဲ့ ကျေးဇူးတော်မိုးရေကိုတန်ဖိုးထားခံယူတတ်ရပါမယ်။လယ်(ယာ)သမားကြီးက သူ့ရဲ့ယာမြေကြီး ကို မြတ်နိုးပြီးအမြဲတမ်း အနစ်နာခံစိတ်နဲ့ ပြုပြင်မွမ်းမံလေ့ရှိတယ်။ မျိုးကြဲသူနဲ့မျိုးစေ့တို့ကြားမှာလည်းတွေးကြည့်နိုင်သလောက်စိစစ်ရွေးချယ်တန်ဖိုးထားကရုစိုက်မှုဆိုတာ ရှိတာကို တွေ့ရပါတယ်။မြေအောက်ကမျိုးစေ့၊ ဆိတ်ငြိမ်နေတဲ့အပင်၊ဆောင်းခိုနေတဲ့ငှက်၊ပိုးအိမ်ထဲက ပေါက်ဖတ်တွေဆိုတာ သေဆုံးနေကြတာမဟုတ်ဘူး။ သင့်လျှော်တဲ့အချိန်အခါ၊ လုံလောက်တဲ့အလင်း၊အနွေးဓါတ်၊မိုးရေစတဲ့အရာတွေကို မျှော်လင့်စောင့်ကြိုနေခြင်းဖြစ်ပြီးအချိန်ကျရောက်တဲ့အခါသူတို့အားလုံးဟာပေါ်ထွက်ရှင် သန်လာကြပါတယ်။မိမိတို့ပျိုးခဲ့တဲ့မျိုးစေ့၊ပြုစုခဲ့တဲ့ပန်းပင်၊ယုယခဲ့တဲ့ အိမ်မွေးသတ္တဝါတွေအခုလို အချိန်အခါနဲ့ရှင်သန်ပွင့်လန်းလာတဲ့အခါမိမိတို့ ပီတိအပြုံးတွေနဲ့ခံစားကြည်နူးခဲ့ရပါတယ်။ဘုရားရှင်ရဲ့နိုင်ငံတော်ဆိုင်ရာပြောင်းလဲတိုးတက်မှုဆိုတာကလည်း မျိုးစေ့ကြဲခြင်းပုံပမာနည်းတူတိတ်ဆိတ်လျှို့ဝှက်တဲ့ဖြစ်စဉ်တစ်ရပ်ပါပဲ။ လူတွေမသိ၊မမြင်နိုင်ပေမယ့်ဘုရားရှင်က မျိုးစေ့လေးတွေကိုတဖြည်းဖြည်းရှင်သန်စေပါတယ်။ ဆုတောင်းခြင်းနဲ့စွန့်လွတ်အနစ်နာခံခြင်းတွေရဲ့စွမ်းပကားတွေအတူပူးပေါင်းလုပ်ဆောင်နေပါတယ်။မျိုးကြဲသူပုံဥပမာလေးမှာ ယေဇူးဘုရားရှင်ကမိမိတို့အားလုံးကို အောက်ပါအတိုင်းလိုက်နာဆောင်ရွက်ဖို့ မိန့်မှာသွန်သင်နေပါတယ်။ နှုတ်ကပါတ်တော်မျိုးစေ့ကို တန်ဖိုးထားခံယူကြရမယ် (ယုံကြည်ခြင်း)။ နှုတ်ကပါတ်တော်ရဲ့စွမ်းပကားကိုယုံကြည်စိတ်ချကြရမယ်(မျှော်လင့်ခြင်း)။ သေဆုံးပြောင်းလဲဖို့(သို့)အနစ်နာခံစွန့်လွတ်ဖို့အဆင်သင့်ရှိရပါမယ်(ချစ်ခြင်း)။မိမိတို့ရဲ့နှလုံးသားတံခါးကိုဖွင့်ပြီး လိုအပ်ချက်များကိုဖြည့်ဆည်းလုပ်ဆောင်ခဲ့ရင်ဘုရားရှင်ရဲ့နှုတ်ကပါတ်တော်က မိမိတို့ဘဝကိုပြောင်းလဲသစ်လွင်စေပါလိမ့်မယ်။ချစ်ခြင်း၊ကောင်းမြတ်ခြင်းအသီးအပွင့်များကိုဝေဆာသီးပွင့်စေပါလိမ့်မယ်။
