 for web4.jpg)
 for web3a.jpg)
2023-07-22 10:34:10
23.7.2023 - 16th Week in Ordinary time Sunday
၂၀၂၃ ခုနှစ်၊ ဇူလှိုင်လ (၂၃) ရက် (၁၆) ကြိမ်မြောက် သာမန်ကာလတနင်္ဂနွေနေ့
ပထမကျမ်း ။ ။ ပညာပါရမီ ၁၂း ၁၃၊ ၁၆-၁၉
ဒုတိယကျမ်း ။ ။ ရောမ ၈း ၂၆-၂၇
ဧဝံဂေလိကျမ်း ။ ။ မာတေဦး ၁၃း ၂၄-၃၄
Reflection By Rev. Fr. Paul Thu Reh OP
Posted by Sr. Benedetta Myat Hnin Nwe(ISR)
ဒီကနေ့ ဧဝံဂေလိကျမ်းစာမှာ လယ်လုပ်သားတချို့တွေဟာ စိတ်ရှည်စွာနဲ့အချိန်စောင့်ဆိုင်းဖို့၊သည်းခံဖို့ရန် ခက်ခဲတဲ့အကြောင်းကြားခဲ့ရပါတယ်။ လယ်သမားတွေက၊ဂျုံစပါးခင်းထဲမှာ မလိုလားအံ့တဲ့ မြက်ပင်၊ပေါင်းပင်တွေကို ချက်ခြင်းအမျှစ်ပါနှုတ်ပစ်ဖို့ဆန္ဒပြင်းပြကြပါတယ်။သို့ပေမယ့်လည်း ခရစ်တော်ရဲ့ဆုံးမစကားဟာ မှတ်သားစရာကောင်းလှပါတယ်။သခင်ယေဇူးက ရိတ်သိမ်းတဲ့အချိန်ရောက်တဲ့အခါ အရင်ဆုံးမြက်ပင်တွေကို ရိတ်သိမ်းပြီး မီးရှို့ခိုင်းမယ်။ ကောင်းတဲ့ ဂျုံစပါးတွေကျတော့ စပါးကျီထည့်မှာ သိမ်းထားခိုင်းမယ်တဲ့။ဆိုလိုတာက အကောင်းနှင့်အဆိုး၊အမှားနဲ့အမှန်၊ အတုနဲ့အစစ်၊ဓမ္မနှင့်အဓမ္မ ရောထွေးနေတဲ့ ဒီလောကကြီးထဲမှာ အမှန်တရားပေါ်ပေါက်လာဖို့အတွက် အချိန်ယူပြီး သည်းခံဖို့ လိုအပ်တယ်လို့ ဆိုလိုတဲ့သဘောပါပဲ။အဓိကကတော့ စိတ်လိုက်မှန်ပါ မလုပ်မိစေဖို့၊အရာရာတိုင်းကို အလျှင်စလိုမဆုံးဖြတ်မိဖို့၊သူတပါးရဲ့လုပ်ရပ်၊သူတပါးရဲ့အပြစ်ကိုအလွယ်တကူစီရင်မဆုံးဖြတ်မိစေဖို့ရန်အတွက် သတိပေးခြင်းပဲဖြစ်ပါတယ်။ကျွန်တော်တို့ တရားကျင့်ရမှာက စိတ်ရှည်သည်းခံရမယ်။ ကိုယ်ချင်းစာ စိတ်ရှိရပါမယ်။မြက်ပင်၊ပေါင်းပင်ကဲ့သို့သောလူမျိုးကို အလျှင်စလိုမသွန်းသင်၊မရှင်းလင်းဖို့ ဖြစ်တယ်။တစ်ပါးသူ၏ လုပ်ရပ်မှားတစ်ခုနဲ့ သူ့ရဲ့ပင်ကိုယ်တစ်ခုလုံး မကောင်းပါဘူးလို့ သတ်မှတ်လို့မရပါဘူး။ သူ့ရဲ့လုပ်ရပ် အမှားတစ်ခုစီကိုပဲ အပြစ်တင်ရမယ်။ဒါပေမယ့်လူကိုတော့ လုံးဝဉဿုံမစီရင်ဖို့ လိုပါတယ်။ဘာဖြစ်လို့လဲဆိုတော့ စီရင်ဆုံးဖြတ်ခြင်းသည်ဘုရားသခင်နဲ့ သက်ဆိုင်လို့ပဲဖြစ်တယ်။ဒီကနေ့ ပထမကျမ်းမှာကြားရသလိုမျိုး ဘုရားသခင်ရဲ့ စီရင်ချက်ဟာအမြဲတမ်းမှန်ကန်ပါတယ်။ မြက်ပင်ကဲ့သို့သောသူသည် ဘုရားသခင် စီရင်လိမ့်မယ်။ဒါကြောင့် မြက်ရိုင်းပင်တွေကို ကျွန်တော်တို့ သုတ်သင်ဖို့ အခွင့်မရှိပါဘူး။ဘုရားသခင်တစ်ပါးတည်းသာလျှင်အခွင့်ရှိပါတယ်။မြက်ပင်ကြားမှာ ဂျုံစပါးကြီးထွားလာသလို အခက်ခဲတွေကြား၊စိန်ခေါ်မှုတွေကြား၊နှောက်ယှက်မှု တွေကြား၊ကျွန်တော်တို့၏ယုံကြည်ခြင်းကို ခိုင်မြဲဖို့၊ ဘုရားသခင်ရဲ့ အစီအစဉ်နဲ့ တရားမျှတမူကို ယုံကြည်ကိုးစားဖို့ ကြိုးစားအားထုတ်ကြပါစို့။ ကျွန်တော်တို့လုပ်ဆောင်သမျှအရာရာတိုင်းမှာဘုရားသခင်၏လမ်းညွန်မှု၊ကျေးဇူးတော်ကို ခံယူပြီး ဘုရားသခင်အပေါ်ကတိပြုခဲ့တဲ့ကတိသိစ္စာတွေကို သစ္စာရှိရှိ ဆက်လက်အသက်ရှင်သွားကြပါစို့။
